Esera 4:1-24
4 Ina ua faalogo fili o Iuta ma Peniamina+ ua fausia le malumalu mo Ieova le Atua o Isaraelu, e i latou na toe foʻi mai i le aveina faapagota,+
2 ona latou faalatalata mai loa lea iā Serupapelu ma ulu o aiga o tamā, ua faapea mai iā i latou: “Seʻi o tatou fausia faatasi ia ma outou; auā i le pei o outou, ua matou tapuaʻi atu* i lo outou Atua,+ ua matou fai taulaga atu foʻi iā te ia, talu mai aso o Esara-atona+ le tupu o Asuria, o lē na aumaia i matou i inei.”+
3 Ae ua fai atu Serupapelu, o Iesua, ma isi alii sili o aiga o tamā o Isaraelu iā i latou: “E tou te lē faia ma i matou le fale o lo matou Atua,+ auā e na o i matou e fausia le fale o Ieova le Atua o Isaraelu, e pei ona poloaʻi mai ai le tupu o Kuresa le tupu o Peresia iā i matou.”+
4 Ua faaauau pea ona faalotovaivaia e tagata o le nuu tagata o Iuta, ma faamata‘u i latou ina ia taofia ai le fausiaina o le fale.+
5 Ua latou totogi foʻi tagata faufautua e tetee atu i tagata Iutaia+ i aso uma o Kuresa le tupu o Peresia, seʻia oo i le taimi o le nofoaiga a Tariu+ le tupu o Peresia.
6 I le amataga o le nofoaiga a Asueru, na latou tusia ai se tusi e molia ai ē na nonofo i Iuta ma Ierusalema.
7 I aso foʻi o Aretaseta le tupu o Peresia, na tusi atu ai iā Aretaseta o Piselama, o Metereta, o Taveele ma isi uma o ana aumea; na latou faaliliuina le tusi i le gagana Arama,+ ma tusia i mata‘itusi Arama.*
8 * Na tusia e Rekuma le tagata sili o le malo ma Semesai le tusiupu, se tusi iā Aretaseta le tupu e tuuaʻia ai Ierusalema, e faapea:
9 (O lenei tusi na aumai mai iā Rekuma le tagata sili o le malo, o Semesai le tusiupu, ma isi uma o a la aumea, o faamasino, o isi kovana, o failautusi, o tagata o Areka,+ o tagata Papelonia, o ē na nonofo i Susa,+ o tagata Elama ia,+
10 ma isi uma nuu na aveina faapagota e Asenapa le alii sili ma mamalu, ma faanonofo i aai o Samaria+ ma le vaipanoa i tala atu o le vaitafe,* ma
11 o le kopi lenei o le tusi na latou auina atu iā te ia.)
“I le tupu o Aretaseta, e mai i au auauna, o tagata o loo i le vaipanoa i tala atu o le vaitafe: O lenei
12 ia silafia e le tupu, ua taunuu i Ierusalema tagata Iutaia na ō mai iā i matou mai iā te oe. O loo latou toe fausia le aai fouvale ma amioleaga, ma o loo latou faauma foʻi pā+ ma toe faaleleia faavae.
13 Ia silafia foʻi e le tupu, afai e toe fausia lenei aai ma faaumaina ona pā, e latou te lē toe totogi atu ni lafoga a tagata taʻitoʻatasi, o lafoga o oloa,+ po o lafoga o auala, ma o le a faaitiitia ai tupe a tupu.
14 O lenei, ona o loo matou maua le totogi mai i le maota o le tupu,* ma ua lē fetaui foʻi iā i matou le vāai atu o aafia le tupu i se mea leaga, o le mea lea ua matou auina atu ai lenei tusi ma faailoa atu ai i le tupu,
15 ina ia faia se suʻesuʻega o le tusi o faamaumauga a ou tuaa.+ O le a e maua ma iloa mai i lea tusi o faamaumauga, o lenei aai o se aai fouvale, o le a aafia ai tupu ma itumalo, ma o loo tusia i le tusi ē na faia fouvalega mai i aso anamua. O le mea lea na faatafunaina ai lenei aai.+
16 Ua matou faailoa atu i le tupu, afai e toe fausia lenei aai ma faaumaina ona pā, o le a e lē toe maua le pule* i le vaipanoa i tala atu o le vaitafe.”+
17 Ona auina mai lea e le tupu o le tusi iā Rekuma le tagata sili o le malo, o Semesai le tusiupu, o isi uma o a la aumea o ē na nonofo i Samaria, ma isi uma i le vaipanoa i tala atu o le vaitafe:
“Talofa lava! O le
18 tusi na outou auina mai iā i matou, ua faitauina ma le manino* i oʻu luma.
19 Na ou avatu le faatonuga e faia se suʻesuʻega, ma ua iloa ai o lenā aai sa fouvale i tupu mai lava i aso anamua, ma na iai fo‘i fouvalega ma teteega i lenā aai.+
20 Sa iai foʻi tupu malolosi na pule i Ierusalema ma pulea le vaipanoa atoa i tala atu o le vaitafe, na totogi atu foʻi iā i latou o lafoga a tagata taʻitoʻatasi, o lafoga o oloa, ma lafoga o auala.
21 O lenei, ia outou faatonuina na tagata ina ia taofia le galuega, ina ia aua neʻi toe fausia lenā aai, seʻia oo atu saʻu faatonuga.
22 O lea, ia faaeteete ina neʻi outou faatamala i lenei mea, ina neʻi aafia atili ai le tupu i se mea leaga.”+
23 O lea, ina ua uma ona faitauina le kopi o le tusi a le tupu o Aretaseta i luma o Rekuma ma Semesai le tusiupu, ma a la aumea, ona latou faanatinati atu loa lea i Ierusalema i tagata Iutaia, ma taofia faamalosi i latou.
24 O le taimi lenā na taofia ai loa le galuega o le fale o le Atua sa i Ierusalema; ma na taofia pea seʻia oo i le tausaga lona lua o le nofoaiga a Tariu le tupu o Peresia.+
Faamatalaga Pito i Lalo
^ Epe., “saʻili atu.”
^ Pe atonu “tusia i le gagana Arama ona faaliliuina lea.”
^ Na uluaʻi tusia le Esr 4:8 e oo i le 6:18 i le gagana Arama.
^ O le vaipanoa i tala atu o le vaitafe, e faasino atu i laueleele i le itu i sisifo o le vaitafe o Eufirate.
^ Ara., “matou aai i masima mai i le maota o le tupu.”
^ Ara., “tofi.”
^ Pe atonu “ua faaliliuina ma faitauina.”
