Esera 1:1-11

  • Poloaʻi le tupu o Kuresa e toe fausia le malumalu (1-4)

  • Sauniuniga mo le toe foʻi mai o ē na ave faapagota i Papelonia (5-11)

1  I le tausaga muamua o le nofoaiga a Kuresa+ le tupu o Peresia, na faatupu ai e Ieova i le loto o Kuresa ina ia faaoo atu se feʻau i lona malo uma, ina ia faataunuu ai le afioga a Ieova na fai mai ai Ieremia.+ Na tusia foʻi e Kuresa le feʻau+ e faapea:  “O le mea lenei ua fai mai ai Kuresa le tupu o Peresia, ‘Ua foaʻi mai e Ieova le Atua o le lagi o malo uma o le lalolagi+ iā te aʻu, ua ia tofia foʻi aʻu e fausia se fale mo ia i Ierusalema,+ lea o loo i Iuta.  O so o se tasi o outou uma e mai i lona nuu, ia faatasi lona Atua iā te ia, ma ia alu aʻe o ia i Ierusalema, lea o loo i Iuta, ma toe fausia le fale o Ieova le Atua o Isaraelu, o le Atua moni o ia, o lē o loo iai lona fale i Ierusalema.*  O so o se tasi o loo aumau o se tagata ese,+ po o fea lava o loo iai, ia fesoasoani ane i ai ona tuaoi e ala i le avatu iā te ia o siliva, o auro, o oloa, o lafumanu, faatasi ai ma taulaga tauofo mo le fale o le Atua moni+ o loo i Ierusalema.’”  Ona sauni lea o alii sili o aiga o tamā o Iuta ma Peniamina, o ositaulaga ma le ʻau sa Levī, o ē na uunaʻia uma* e le Atua moni, ina ia ō aʻe ma toe fausia le fale o Ieova o loo i Ierusalema.  Ua fesoasoani o latou tuaoi iā i latou, e ala i le avatu o ipu siliva, o auro, o oloa, o lafumanu, ma mea tautele, e ese mai i taulaga tauofo uma na foaʻi atu.  Ua toe faafoʻi atu foʻi e le tupu o Kuresa ipu o le fale o Ieova, ia na ave e Nepukanesa mai i Ierusalema ma tuu i le fale o lona atua.+  Ona aumaia lea o nei mea e Kuresa le tupu o Peresia i le vaavaaiga a Metereta le teutupe, o lē na faitauina atu nei mea mo Sesepasara*+ le taʻitaʻi o Iuta.  O le aofaʻi nei o ia mea: e 30 ipu auro e pei o ni ato, e 1,000 ipu siliva e pei o ni ato, e 29 isi ipu, 10  e 30 tamaʻi ipu auro faaofuofu, e 410 tamaʻi ipu siliva faaofuofu, ma isi ipu e 1,000. 11  O ipu auro uma ma ipu siliva, e 5,400. Na ave aʻe e Sesepasara nei mea uma ina ua aveina aʻe mai i Papelonia agaʻi i Ierusalema, le nuu na ave faapagota.+

Faamatalaga Pito i Lalo

Pe atonu “o lē o loo i Ierusalema.”
Epe., “o latou agaga.”
Atonu e igoa foʻi iā Serupapelu i le Esr 2:2; 3:8.