O le Tusi i Kerisiano Eperu 3:1-19
3 O le mea lea le ʻauuso paia e, o ē ua tofutofusia i le valaau* mo le lagi,+ ia manatunatu i le aposetolo ma le ositaulaga sili, o lē ua tatou taʻutaʻu atu, o Iesu lea.+
2 Sa faamaoni o ia i Lē na tofiaina o ia,+ e pei foʻi ona faamaoni o Mose i le aiga atoa o le Atua.+
3 Auā e tatau ona sili atu lona* mamalu+ i lo o Mose, ona e sili atu le mamalu o lē na faia le fale i lo o le fale.
4 O le mea moni, e tofu lava le fale ma le tagata na ia faia, a o lē na faia mea uma o le Atua lea.
5 Sa faamaoni Mose o se auauna i le aiga atoa o le Atua, e fai ma molimau i mea o le a faamatalaina mulimuli ane,
6 ae na faamaoni Keriso o se atalii+ e vaaia le aiga o le Atua. O i tatou o le aiga o le Atua,+ pe afai e tatou te taofimau i le saʻolotoga e tautatala atu ai, ma le faamoemoe o loo tatou mitamita ai e oo i le iʻuga.
7 O lea, e pei ona fai mai ai o le agaga paia,+ “O le aso nei, afai e tou te faalogo i lona siʻufofoga,
8 aua neʻi faamaaa o outou loto e pei o le taimi na faatupuina ai e o outou augātamā le toʻasā, e pei foʻi o le aso na latou tofotofoina ai aʻu i le toafa,*+
9 lea na latou tofotofoina ai aʻu e ui ina latou vāai i aʻu galuega mo le 40 tausaga.+
10 O le mea lea na ou ʻinoʻino ai i lea tupulaga ma faapea ane: ‘E masani ona liliuese o latou loto, ma e latou te leʻi iloa foʻi oʻu ala.’
11 O lea, na ou tautō ai i loʻu ita: ‘E latou te lē ulu atu i loʻu mālōlōga.’”+
12 Le ʻauuso e, ia faaeteete ina neʻi iai i se tasi o outou se loto ua leaga e lē faatuatua, ona ua ia tuulafoaʻia le Atua soifua;+
13 ae ia faalaeiau pea le tasi i le isi i aso taʻitasi, manū o mafai ona taʻua “O le aso nei,”+ ina neʻi faamaaa se tasi o outou ona o le malosi taufaasesē o le agasala.
14 Auā e tofutofusia i tatou i le Keriso pe afai e tatou te taofimau i le mautinoa sa muaʻi iai iā i tatou seʻia oo i le iʻuga.+
15 E pei ona taʻua, “O le aso nei, afai e tou te faalogo i lona siʻufofoga, aua neʻi faamaaa o outou loto e pei o le taimi na faatupuina ai e o outou augātamā lona toʻasā.”+
16 Auā o ai i latou na faalogo ae na latou faatupuina lona toʻasā? Pe e lē o i latou uma ea o ē na ō ese mai i Aikupito i le taʻitaʻiga a Mose?+
17 O ai foʻi i latou sa ʻinoʻino i ai le Atua mo tausaga e 40?+ Pe e lē o i latou ea o ē na agasala na taatitia o latou tino oti i le toafa?+
18 O ai foʻi na ia tautō i ai e lē ulu atu i lona mālōlōga? Pe e lē o i latou ea na lē usiusitaʻi?
19 O lea, ua tatou iloa na lē mafai ona latou ulu atu i ai ona o le lē faatuatua.+
