O le Tusi Lona Lua o Tupu 4:1-44
4 Sa iai se fafine i avā a atalii o le ʻauperofeta,+ na tagi mai iā Elisaia e faapea: “Ua oti laʻu tane, o lau auauna; ma ua e silafia lelei lava sa mataʻu pea lau auauna iā Ieova.+ Ae ua sau lē na matou aitalafu ai e ave laʻu fanau e toʻalua e fai ma ana pologa.”
2 Ona faapea atu lea o Elisaia iā te ia: “O le ā se mea ou te faia mo oe? Ia taʻu mai iā te aʻu po o ā mea o iā te oe i le fale?” Ua faapea mai o ia: “E leai lava se mea i le fale o lau auauna, ua na o le fagu suāuu.”+
3 Ona ia fai atu lea: “Inā alu ia i fafo, ma ia e talosaga atu i ou tuaoi uma mo ni fagu e lē o iai ni mea. Ia aumai ni fagu se tele.
4 Ia e alu i totonu faatasi ma lau fanau ma tapuni mai le faitotoʻa. Ia faatumu nei fagu uma i le suāuu, ma tuu ese fagu ua tutumu.”
5 Ona alu ese lea o le fafine mai iā te ia.
Ina ua ō le fafine ma lana fanau i totonu o le fale ma ua tapuni le faitotoʻa, ona aumai lea e lana fanau o fagu iā te ia, ma ua ia liligi pea i ai le suāuu.+
6 Ina ua tutumu fagu, ona ia faapea atu lea i le isi ana tama: “Ia toe aumai se isi fagu iā te aʻu.”+ Ae ua fai mai lana tama iā te ia: “E leai se isi fagu.” Ona uma ai lea o le suāuu.+
7 Ona alu atu lea o ia ma taʻu atu i le tagata o le Atua moni, ona ia fai mai lea: “Inā alu ia ma faatau atu le suāuu, ma totogi ai la outou aitalafu, a o mea e totoe, ia ola ai oe ma lau fanau tama.”
8 I se tasi aso, na alu ai Elisaia i Sunema+ lea na iai se fafine e faaaloalogia, ma ua ia tauanau Elisaia e ʻai.+ O taimi uma e ui ane ai Elisaia, e afe ai foʻi i inā e ʻai ai.
9 Ona fai atu lea o le fafine i lana tane: “Ua ou iloa o le tagata paia o le Atua lea e masani ona ui mai i inei.
10 Faamolemole, seʻi o ta faia se tamaʻi potu i luga o le fale,+ ma tuu ai i totonu se moega, se laulau, se nofoa, ma se tuugāmolī; o taimi uma lava e sau ai o ia iā i taʻua, e mafai ona nofo ai i inā.”+
11 I se tasi aso, ua sau Elisaia i inā ma alu a‘e i le potu pito i luga e taoto ai.
12 Ona fai atu lea o ia iā Kiasi+ lana auauna: “Ia valaau atu i le fafine Sunema.”+ Ona valaau atu lea o Kiasi i le fafine.
13 Ona ia fai atu lea iā Kiasi: “Faamolemole ia e fai atu i le fafine, ‘Ua e tigāina ona o le tausiga o i maʻua.+ O le ā se mea e faia mo oe?+ Pe e iai ea se mea ou te fai atu ai i le tupu+ po o le taʻitaʻiʻau mo oe?’” Ae ua fai mai le fafine: “O loo oʻu nofo ma le saogalemu i loʻu nuu.”
14 Ua fai atu Elisaia: “O le ā la se mea e faia mo ia?” Ona fai mai lea o Kiasi: “E leai sana tama,+ ma ua toeaina foʻi lana tane.”
15 Ona ia fai atu loa lea: “Ia valaau atu iā te ia.” Ona valaau atu lea o Kiasi iā te ia, ma ua sau o ia ma tū mai i le faitotoʻa.
16 Ua ia faapea atu: “O le a e sapasapaia se tama i le taimi faapenei i le tausaga fou.”+ Ae ua fai mai o ia: “E leai loʻu matai e, le tagata o le Atua moni! Aua e te pepelo i lau auauna.”
17 Peitaʻi, ua ma‘itō le fafine ma fanaua se tama tama i le taimi lava lea i le tausaga na sosoo ai, e pei ona fai atu ai Elisaia iā te ia.
18 Ua tuputupu aʻe pea le tamaitiiti, ma i se tasi aso, na alu ai o ia i lona tamā o loo faatasi ma ē e selesaito.
19 Ua fai atu pea o ia i lona tamā: “Ua tigā loʻu ulu, ua tigā loʻu ulu!” Ona ia fai atu lea i le auauna: “Ia ave o ia i lona tinā.”
20 Ua ave o ia e le auauna ma avatu i lona tinā. Ua sii pea o ia i vae o lona tinā seʻia oo i le aoauli, ona oti ai lea o ia.+
21 Ona alu aʻe lea o le fafine ma faataoto o ia i luga o le moega o le tagata o le Atua moni,+ ua tapuni le faitotoʻa ma alu i fafo.
22 Ua ia valaau atu i lana tane e faapea: “Faamolemole, ia auina mai iā te aʻu se tasi o auauna ma se asini, seʻi oʻu alu atu faavave i le tagata o le Atua moni, ona ou toe sau ai lea.”
23 Ae ua fai mai o ia: “Aiseā e te alu ai iā te ia i le asō? E lē o le masina faatoʻā vaaia+ lenei po o le sapati foʻi.” Ae ua fai atu o ia: “E lē afāina.”
24 Ua ia faanofoa le asini ma fai atu i lana auauna: “Ia faavave. Aua ne‘i alu lemū seʻi vaganā ua ou fai atu iā te oe.”
25 Ua alu o ia i le tagata o le Atua moni i le mauga o Karamelu. Ina ua iloa mamao mai o ia e le tagata o le Atua moni, ona ia fai ane lea iā Kiasi lana auauna: “Faauta! O le fafine Sunema lale.
26 Inā tamoʻe ia faamolemole e faafetaui o ia, ma fai atu iā te ia, ‘O ā mai oe? O ā mai lau tane? O ā mai lau tama?’” Ona fai mai lea o le fafine: “O loo lelei mea uma.”
27 Ina ua oo mai le fafine i le mauga i le tagata o le Atua moni, ona ia tago atu lea i ona vae.+ Ua faalatalata ane Kiasi e tūlei ese o ia, ae ua faapea atu le tagata o le Atua moni: “Ia tuu ai pea o ia, auā ua tigā lona loto; ua natia foʻi e Ieova lenei mea mai iā te aʻu, e leʻi taʻuina mai iā te aʻu.”
28 Ona fai mai lea o le fafine: “Pe na ou talosaga atu ea i loʻu alii mo se tama? Po ou te leʻi fai atu ea foʻi, ‘Aua neʻi e pepelo mai iā te aʻu’?”+
29 Ona fai atu loa lea o Elisaia iā Kiasi: “Inā fusi ia lou ofu i lou puimanava,+ ma ave loʻu tootoo i lou lima, ma ia e alu. Afai lua te fetaui ma se tasi, aua neʻi e faafeiloaʻi atu iā te ia; afai foʻi e faafeiloaʻi mai se tasi iā te oe, aua e te tali atu iā te ia. Ia e alu ma tuu loʻu tootoo i foliga o le tama.”
30 Ua fai mai le tinā o le tama: “Ou te tautō iā Ieova le Atua soifua faapea ma oe, ou te lē tuua lava oe.”+ Ona tulaʻi lea o Elisaia, ua ō faatasi ma le fafine.
31 Ua muamua atu Kiasi i o la luma, ua ia tuu le tootoo i foliga o le tama, ae ua leai se leo, ua lē tali ane foʻi.+ Ona ia toe foʻi mai lea e faafetaui Elisaia ma taʻu mai iā te ia, e faapea: “E leʻi ala le tama.”
32 Ina ua taunuu Elisaia i le fale, o loo taoto le tama i lona moega ua oti.+
33 Ua ulu atu o ia ma tapuni le faitotoʻa i o la tua, ona tatalo atu lea iā Ieova.+
34 Ona alu aʻe lea o ia i le moega ma faō i luga o le tama, ua ia tuu lona gutu i le gutu o le tama, o ona mata i ona mata, ma ona lima i ona lima, ua faō pea i ona luga, ona faasolo lea ina māfanafana le tino o le tama.+
35 Ua fesavalia‘i o ia i totonu o le fale, ona alu aʻe lea o ia i le moega ma toe faō i luga o le tama. Ona mafatua faafitu ai lea o le tama, ma ua pupula ona mata.+
36 Ona valaau atu lea o Elisaia iā Kiasi ma faapea atu: “Inā valaau ia i le fafine Sunema.” Ona ia valaauina lea o ia, ma ua sau iā te ia. Ua ia fai atu: “Sii aʻe ia lau tama.”+
37 Ua sau o ia i totonu ma faapaʻū i ona vae ma ifo toʻele iā te ia, ona ia sii aʻe lea o lana tama ma ō.
38 Ina ua toe foʻi Elisaia i Kilikala, sa iai se oge i le nuu.+ Ua nonofo atalii o le ʻauperofeta+ i ona luma, ma ua ia fai atu i lana auauna:+ “Ia faatiʻetiʻe le ulo telē i luga o le ogaumu, ma fai se sitiū mo atalii o le ʻauperofeta.”
39 Ona alu atu lea o le tasi tagata i le vao e tau mai ni laau faimea‘ai, ma ua ia mauaina se vine vao. Ua ia tauina ona fua ma ua tumu ai lona ofu, ona sau lea o ia ma tipitipi i le ulo sitiū, ae e na te le‘i iloa po o ā na mea.
40 Mulimuli ane, ona latou asu atu lea e aai ai tagata. Ina ua latou aai i le sitiū, ona latou alalaga lea ua faapea mai: “Le tagata e, o le Atua moni, o loo iai le mea oona i le ulo.” Ua lē mafai foʻi ona latou aai ai.
41 Ona ia fai atu lea: “Ia outou aumai se falaoamata.” Ina ua uma ona ia lafo le falaoamata i le ulo, ona ia fai atu lea: “Ia asu atu i tagata e aai ai.” Auā ua leai se mea oona i le ulo.+
42 Sa iai se tamāloa e sau mai i Paala-salisa,+ ua ia aumaia i le tagata o le Atua moni ni falaoa karite+ e 20 e faia mai i uluaʻi fua ua pula, ma se taga o saito mata.+ Ona fai atu lea o Elisaia: “Inā avatu ia i le nuu e latou te aai ai.”
43 Ae ua fai mai lana auauna: “E faapefea ona ou tuuina atu nei mea i luma o tagata e toʻa 100?”+ Ae ua ia faapea atu: “Inā avatu ia i le nuu e latou te aai ai, auā o le mea lenei na fetalai mai ai Ieova, ‘E latou te aai ma e iai foʻi mea e totoe.’”+
44 Ona ia tuu atu lea o nei mea i o latou luma, ua latou aai ma ua totoe mea+ e tusa ma le afioga a Ieova.
