O le Tusi Lona Lua o Tupu 3:1-27
3 Na fai Ioramo+ le atalii o Aapo ma tupu o Isaraelu i Samaria, i le tausaga lona 18 o le nofoaiga a Iosefatu le tupu o Iuta, ua pule foʻi o ia mo tausaga e 12.
2 Ua faaauau ona ia faia mea leaga i le silafaga a Ieova, ae e le‘i pei o le leaga o lona tamā ma lona tinā, auā na ia aveesea le poutū paia a Paala lea na faia e lona tamā.+
3 Peita‘i, na ia faia pea agasala na faia e Ierepoamo le atalii o Nepata, lea na faapogaia ai Isaraelu e agasala.+ E leʻi liliuese mai ai foʻi o ia.
4 O Mesa foʻi le tupu o Moapi, o ia o sē e tausia mamoe, ma na masani ona ia totogi atu i le tupu o Isaraelu tamaʻi mamoe e 100,000, ma mamoe poʻa e leʻi seleina e 100,000.
5 Ina ua oti Aapo,+ ona fouvale lea o le tupu o Moapi i le tupu o Isaraelu.+
6 Ona alu atu lea o le tupu o Ioramo i lenā aso mai i Samaria, e faapotopoto faatasi Isaraelu uma.
7 Ua ia auina atu foʻi se feʻau iā Iosefatu le tupu o Iuta e faapea: “Ua fouvale le tupu o Moapi iā te aʻu. Pe e ta te ō e tau ma Moapi?” Ua ia faapea mai: “Ta te ō lava.+ O aʻu nei e tutusa ma oe; o loʻu nuu e tutusa ma lou nuu; o aʻu solofanua e tutusa ma au solofanua.”+
8 Ona ia fai atu lea: “O fea le ala e tatou te ō aʻe ai?” Ua fai mai o ia: “O le ala e ui i le toafa* o Etoma.”
9 Ona ō lea o le tupu o Isaraelu, o le tupu o Iuta, ma le tupu o Etoma.+ Ua latou faataamilo i lo latou ala mo aso e fitu, ma ua leai se vai mo le ʻautau, ma manu na mulimuli atu iā i latou.
10 Ua faapea atu le tupu o Isaraelu: “Oi talofa! Ua faapotopoto e Ieova nei tupu e toʻatolu ina ia tuuina atu i latou i lima o Moapi!”
11 Ua fai mai Iosefatu: “Pe e lē o i inei ea se perofeta a Ieova, e tatou te fesili atu ai iā Ieova e ala iā te ia?”+ Ona tali atu lea o le tasi o auauna a le tupu o Isaraelu: “O loo i inei Elisaia+ le atalii o Safata, o lē sa masani ona liligiina le vai i lima o Elia.”*+
12 Ua fai mai Iosefatu: “O loo iā te ia le afioga a Ieova.” Ona ō ifo lea iā te ia o le tupu o Isaraelu, o Iosefatu, ma le tupu o Etoma.
13 Ua fai mai Elisaia i le tupu o Isaraelu: “Aiseā ua e sau ai iā te a‘u?*+ Inā alu ia i perofeta a lou tamā ma perofeta a lou tinā.”+ Ae ua fai atu le tupu o Isaraelu iā te ia: “E leai, auā o Ieova na valaauina nei tupu e toʻatolu ina ia tuuina atu i latou i lima o Moapi.”
14 Ona fai mai lea o Elisaia: “Ou te tautō iā Ieova o ʻau le Atua soifua o lē o loo oʻu auauna i ai,* ana leai loʻu manatu iā Iosefatu+ le tupu o Iuta, semanū ou te lē vaai atu pe manatu atu foʻi iā te oe.+
15 O lenei, ia outou aumaia iā te aʻu se tagata tā kitara.”*+ Ina ua tā e le tagata le kitara,* ona oo mai lea o le aao o Ieova i luga o Elisaia.+
16 Ona ia fai atu lea: “O le mea lenei ua fetalai mai ai Ieova, ‘Ia outou eli ni ʻautu ia soo ai lenei vanu,*
17 auā o le mea lenei ua fetalai mai ai Ieova: “Tou te lē vaaia se matagi, tou te lē vaaia foʻi le timu; ae o le a tumu lenei vanu* i vai,+ ma o le a outou feinu ai, faatasi ma a outou lafumanu ma a outou manu ave avega.”’
18 E faigofie lenei mea i le silafaga a Ieova,+ auā o le a ia tuuina mai foʻi Moapi i o outou lima.+
19 Ia outou taia i lalo aai malupuipuia uma+ ma aai silisili uma, ia outou tāina i lalo laau lelei uma, ia outou tanu foʻi vaipuna uma, ma ia outou faaleaga foʻi i maa i fanua lelei uma.”+
20 Ua oo i le taeao i le taimi e fai ai taulaga i meaʻai,*+ ona faafuaseʻi lea ona tafe mai le vai mai i le itu o loo iai Etoma, ma ua tumu ai le laueleele i le vai.
21 Ua faalogo tagata Moapi uma ua ō aʻe tupu e tau ma i latou, ona latou faapotopoto faatasi lea o tane uma e mafai ona tau,* ma ua latou tutū i le tuaoi.
22 Ina ua latou feala i le taeao, ua susulu ifo le lā i luga o le vai, ma i le vaai a tagata Moapi o loo i le isi itu, ua mūmū le vai e pei o le toto.
23 Ona latou faapea ane lea: “O le toto lenā! E mautinoa ua fasia e le tasi tupu le isi i le pelu. O lenei, Moapi e, inā tatou ō ia ma ave le vete!”*+
24 Ina ua latou oo atu i le togālauapi a Isaraelu, ona tutulaʻi lea o Isaraelu ma fasiotia tagata Moapi, o ē ua sosola ese mai iā i latou.+ Ua ō mai tagata Isaraelu i Moapi, ma ua latou fasiotia tagata Moapi a o latou ō mai.
25 Ua latou faaumatia aai, ua taʻitasi ma lafo lana maa i fanua lelei uma ma faatumu ai; ua latou tanu vaipuna uma,+ ua latou tā foʻi i lalo laau lelei uma.+ Ona totoe ai lea na o le pā maa o Kiri-aresa,+ ma ua siʻomia e tagata e sasauina maatā ma faaumatia ai.
26 Ina ua iloa e le tupu o Moapi ua faatoʻilaloina o ia i le taua, ona ia ave lea o tagata e fai pelu e toʻa 700, ina ia osofaʻia le tupu o Etoma;+ ae ua latou lē mafaia.
27 Ona ia ave lea o lona atalii ulumatua o lē o le a pule e sui iā te ia, ma ofo atu o ia o se taulaga mū+ i luga o le pā. Ona matuā feita ai lea o tagata iā Isaraelu, ma ua latou ō ese mai iā te ia ma toe foʻi atu i o latou nuu.
Faamatalaga Pito i Lalo
^ Tagaʻi i le Uiga o Upu.
^ Po o “lē sa avea ma auauna a Elia.”
^ Po o le “O le ā ea se mea ou te faia iā te oe?”
^ Epe., “o loo oʻu tū ai i ona luma.”
^ O se meafaifaaili anamua e ese mai i le kitara i aso nei. O le upu Peretania, o le harp.
^ Po o le “tagata fai musika.”
^ Po o le “ālia.”
^ Po o le “ālia.”
^ Po o “taulaga i fatu.” Tagaʻi i le faamatalaga pito i lalo o le Levitiko 2:1.
^ Po o “o ē uma ua fusia fusipaʻu i sulugātiti.”
^ Tagaʻi i le Uiga o Upu.
