O le Tusi Lona Lua o Tupu 18:1-37
18 O le tausaga lona tolu o le nofoaiga a Hosea+ le atalii o Ele le tupu o Isaraelu, na fai ai ma tupu Esekia+ le atalii o Aasa+ le tupu o Iuta.
2 E 25 ona tausaga ina ua avea o ia ma tupu, ma e 29 tausaga na ia pule ai mai i Ierusalema. O le igoa o lona tinā o Avi* le afafine o Sakaria.+
3 Na ia faia pea mea ua tonu i le silafaga a Ieova,+ e pei lava ona sa faia e Tavita lona augātamā.+
4 O ia na aveesea mea maualuluga,+ nutililiia poutū paia, ma tuu i lalo le pou paia.*+ Na ia tu‘ininiia foʻi le gata ʻapamemea na faia e Mose;+ auā e oo mai lava i na aso o loo faamū pea i ai taulaga e le fanauga a Isaraelu, ma na faaigoa foʻi o le tupua gata ʻapamemea.*
5 Ua ia faatuatua iā Ieova+ le Atua o Isaraelu; ma ina ua mavae atu o ia, e leai foʻi se tasi e pei o ia i tupu uma o Iuta, e oo lava i ē na muamua atu iā te ia.
6 Ua pipii pea o ia iā Ieova.+ E leʻi liliuese o ia mai i le mulimuli atu iā te ia, ae na faaauau ona ia tausia poloaʻiga a Ieova na poloaʻi mai ai iā Mose.
7 Na faatasi Ieova iā te ia. Sa faautauta o ia i mea uma na alu i ai; na fouvale o ia i le tupu o Asuria, ma e leʻi auauna iā te ia.+
8 Na ia faatoʻilaloina foʻi Filisitia+ e oo atu lava i Kasa ma ona laueleele uma, e mai i le ʻolo o tagata vāai e oo atu i le aai malupuipuia.*
9 O le tausaga lona fā o le nofoaiga a le tupu o Esekia, o le tausaga lona fitu lea o le nofoaiga a Hosea+ le atalii o Ele le tupu o Isaraelu, na siitaua ai Salemanesa le tupu o Asuria iā Samaria, ma siʻomia ai.+
10 Na latou faoa le aai+ i le faaiʻuga o le tolu tausaga; o le tausaga lona ono lea o le nofoaiga a Esekia, a o le tausaga lona iva o le nofoaiga a Hosea le tupu o Isaraelu, na faoa ai Samaria.
11 Ona ave faapagota lea e le tupu o Asuria o tagata Isaraelu+ i Asuria, ma faanonofo i latou i Hala, i Havoli i le vaitafe o Kosane, ma aai o tagata Metai.+
12 Na tupu lenei mea ona latou te leʻi faalogo i le siʻufofoga o Ieova lo latou Atua, ae ua latou soli pea lana feagaiga, ma poloaʻiga uma lava na poloaʻi mai ai Mose le auauna a Ieova.+ E latou te leʻi faalogo, ma e leʻi usiusitaʻi foʻi.
13 O le tausaga lona 14 o le nofoaiga a le tupu o Esekia, na alu aʻe ai Sanerivi le tupu o Asuria,+ ua siitaua atu i aai malupuipuia uma o Iuta ma faoa na aai.+
14 Ona auina atu lea o se feʻau e Esekia le tupu o Iuta i le tupu o Asuria i Lakisa, ua faapea atu: “Ua ou sesē. Ia e liliuese mai iā te aʻu, ma ou te avatu foʻi iā te oe mea uma e te finagalo i ai.” Ona faatonuina lea e le tupu o Asuria o Esekia le tupu o Iuta, ina ia aumai taleni* siliva e 300 ma taleni auro e 30.
15 Ona avatu lea e Esekia o siliva uma na maua i le fale o Ieova ma le fale o le tupu.+
16 Ua aveesea* e Esekia faitotoʻa o le malumalu+ o Ieova ma pou o faitotoʻa na ufitia e Esekia le tupu o Iuta i auro,+ ma avatu i le tupu o Asuria.
17 Ua aauina mai foʻi e le tupu o Asuria o le Taretana,* o le Ravesarisa,* o le Ravesaki,* ma se ʻautau toʻatele mai i Lakisa+ i le tupu o Esekia i Ierusalema.+ Ua latou ō aʻe i Ierusalema, ma tutū i autafa o le alāvai o le vaieli pito i luga, lea o loo i le ala tele o le fanua o le tagata tā ofu.+
18 Ua latou valaau mai i le tupu ina ia alu atu i fafo, ae ua ō atu Eliakimo+ le atalii o Hilikia o lē na vaavaaia le aiga o le tupu,* o Sevena+ le failautusi, ma Ioaa le atalii o Asafo o lē e faia faamaumauga.
19 Ona fai mai lea o le Ravesaki iā i latou: “Faamolemole, ia fai atu iā Esekia, ‘O le mea lenei ua fai mai ai le tupu sili, le tupu o Asuria: “Aiseā ua e matuā mautinoa ai?+
20 Ua e fai mai, ‘Ua iā te aʻu le poto ma le malosi mo le taua,’ ae ua na o ni upu lava. O ai ea ua e faatuatua i ai, ua e tofotofo ai e te fouvale mai iā te aʻu?+
21 Faauta! ua e faatuatua i le lagolagosua a lenei ū ua nutililii o Aikupito,+ lea afai e totoo i ai se tagata, e tuia lava lona lima ma ati ai. E faapena lava Farao le tupu o Aikupito i ē uma e faatuatua iā te ia.
22 Ae afai e tou te faapea mai iā te aʻu, ‘E matou te faatuatua iā Ieova lo matou Atua,’+ pe e lē o ia ea e ona mea maualuluga ma fata faitaulaga na aveesea e Esekia,+ ae ua ia faapea atu iā Iuta ma Ierusalema, ‘Ia outou ifo i lenei fata faitaulaga i Ierusalema’?”’+
23 O lenei, ia fai se petipetiga ma loʻu alii le tupu o Asuria: O le a ou avatu iā te oe solofanua e 2,000, pe afai e mafai ona e tuu i ai ni tagata tiʻetiʻe.+
24 E tusa pe e tuu lou faatuatuaga iā Aikupito e maua ai kariota ma tagata ti‘eti‘e solofanua, ae pe e mafai ea ona e tulia, e oo lava i se kovana e to‘atasi, o sē e sili ona faatauvaa o auauna a lo‘u alii?
25 O lenei, pe na ou sau e aunoa ma le pule mai iā Ieova e tau ma lenei nuu ma faaumatia ai? O Ieova lava ia na fetalai mai iā te aʻu, ‘Ia e alu aʻe e tau ma lenei atunuu, ma faaumatia ai.’”
26 Ona fai atu lea o Eliakimo le atalii o Hilikia, o Sevena,+ ma Ioaa i le Ravesaki:+ “Faamolemole, ia e fai mai i au auauna i le gagana Arama,*+ auā e matou te malamalama i ai; ae aua e te fai mai iā i matou i le gagana a tagata Iutaia, a o faalogo le nuu o loo i luga o le pā.”+
27 Ae ua tali mai le Ravesaki iā i latou: “Pe e na o lou alii ea ma oe, na auina mai ai aʻu e loʻu alii e taʻu atu i ai nei upu? Pe e lē o tagata ea fo‘i o loo nonofo i luga o le pā, o ē o le a aai i o latou otaotavale ma feinu i o latou lava feʻaulata, faatasi ma outou?”
28 Ua tū pea le Ravesaki ma valaau mai ma le leotele i le gagana a tagata Iutaia, e faapea: “Ia outou faalogologo mai i le upu a le tupu sili, o le tupu o Asuria.+
29 O le mea lenei ua fai mai ai le tupu, ‘Aua neʻi ʻolegia outou e Esekia, auā e lē mafai ona ia laveaʻi outou mai i loʻu lima.+
30 Aua fo‘i neʻi faatupuina e Esekia lo outou faatuatuaina o Ieova, e ala i le faapea ane: “E laveaʻia lava i tatou e Ieova, e lē tuuina atu foʻi lenei aai i lima o le tupu o Asuria.”+
31 Aua neʻi faalogo iā Esekia, auā o le mea lenei ua fai mai ai le tupu o Asuria: “Ia faia se leleiga ma a‘u ma ia outou siilima,* ona taʻitasi lea o le tagata ma ʻai mai i lona lava vine ma lona lava mati, ma inu mai i lona lava vaieli,
32 seʻia ou alu atu ma ave outou i le laueleele e pei o lo outou lava laueleele,+ o le laueleele o saito ma uaina fou, o le laueleele o falaoa ma togāvine, o le laueleele o laau o le olive ma le meli. Ona outou ola ai pea lea ae e lē feoti. Aua le faalogo iā Esekia, auā ua ia faasesēina outou e ala i le faapea mai, ‘E laveaʻiina i tatou e Ieova.’
33 Pe na laveaʻia ea e atua o nuu o latou lava nuu mai i lima o le tupu o Asuria?
34 O fea o iai atua o Amato+ ma Arepa? O fea o iai atua o Sefavaima,+ o Ena, ma Iva? Pe na latou laveaʻiina Samaria mai i loʻu lima?+
35 O ai fo‘i i atua uma o nuu, na mafai ona lavea‘iina o latou nuu mai i lo‘u lima, e mafai ai e Ieova ona lavea‘iina Ierusalema mai i lo‘u lima?”’”+
36 Ae ua fifilemu pea le nuu, ua lē tali atu iā te ia i se upu, auā ua poloaʻi mai le tupu: “Aua tou te tali atu iā te ia.”+
37 Ae ua ō mai iā Esekia o Eliakimo le atalii o Hilikia o lē na vaavaaia le aiga o le tupu,* ma Sevena le failautusi, ma Ioaa le atalii o Asafo o lē e faia faamaumauga, ma o latou ofu ua saeia, ua faamatala mai iā te ia upu a le Ravesaki.
Faamatalaga Pito i Lalo
^ O le faapuupuu mo Avia.
^ Tagaʻi i le Uiga o Upu.
^ Po o le “na faaigoa iā Neusatana.”
^ E faasino atu i nofoaga uma, e tusa pe e toʻaitiiti pe e toʻatele ē e nonofo ai.
^ Epe., “tipiesea.”
^ Po o “le pule o le ʻautautū uaina.”
^ Po o “le tagata aloaʻia sili o le maota o le tupu.”
^ Po o “le taʻitaʻiʻau.”
^ Po o “le maota o le tupu.”
^ Po o le “gagana Suria.”
^ Epe., “Ia faia se faamanuiaga ma aʻu ma ia ō mai iā te aʻu.”
^ Po o “le maota o le tupu.”
