O le Tusi Lona Lua o Samuelu 2:1-32

  • Avea Tavita ma tupu o Iuta (1-7)

  • Avea Iso-poseta ma tupu o Isaraelu (8-11)

  • Taua i le vā o le aiga o Tavita ma le aiga o Saulo (12-32)

2  Mulimuli ane, ona fesili atu lea o Tavita iā Ieova+ e faapea: “Po ou te alu aʻe ea i se tasi o aai o Iuta?” Ona fetalai mai lea o Ieova iā te ia: “Inā alu aʻe ia.” Ona toe fesili atu lea o Tavita: “O fea ou te alu i ai?” Ona ia fetalai mai lea: “I Heperona.”+  Ua ō aʻe Tavita i inā faatasi ma ana avā e toʻalua, o Ainoama+ le Isereelu, ma Apikaila+ o lē sa avea ma avā a Napalu le Karamelu.  Ua ō aʻe foʻi Tavita faatasi ma tagata sa iā te ia,+ e taʻitasi ma lona aiga; ua latou nonofo i aai i laueleele o Heperona.  Ona ō mai lea o tagata o Iuta ma faauu Tavita i inā e fai ma tupu i le aiga o Iuta.+ Ua latou taʻu atu iā Tavita e faapea: “Na tanuina Saulo e tagata o Iapese-kiliata.”  Ona aauina atu lea e Tavita o avefeʻau i tagata o Iapese-kiliata, ua ia faapea atu iā i latou: “Ia faamanuia Ieova iā te outou, auā ua outou alolofa faamaoni i lo outou alii o Saulo, ina ua outou tanuina o ia.+  O lenei, ia alofa faamaoni pea Ieova iā te outou. Ou te faaalia foʻi le agalelei iā te outou ona ua outou faia lenei mea.+  Ia faamalolosi o outou lima ma ia lototetele, auā ua maliu lo outou alii o Saulo, ae ua faauuina aʻu e le aiga o Iuta e avea ma o latou tupu.”  A o le taʻitaʻiʻau a Saulo, o Apineru+ le atalii o Neru, ua ia aveina Iso-poseta+ le atalii o Saulo ma avatu o ia i Maanaima+  e fai ma tupu i Kiliata,+ i tagata o Asuri, i Isereelu,+ i Efaraima,+ i Peniamina, ma Isaraelu uma lava. 10  E 40 tausaga o Iso-poseta le atalii o Saulo ina ua fai o ia ma tupu i Isaraelu, ma e lua tausaga na pule ai o ia. Ae e na o le aiga o Iuta na lagolagoina Tavita.+ 11  O le umi* na avea ai Tavita ma tupu i Heperona i le aiga o Iuta, e fitu tausaga ma masina e ono.+ 12  Mulimuli ane, ua ō atu Apineru le atalii o Neru ma auauna a Iso-poseta le atalii o Saulo, mai i Maanaima+ e agaʻi atu i Kipeona.+ 13  A o Ioapo+ le tama a Seruia+ ma auauna a Tavita, ua latou ō atu ma ua fetaiaʻi ma i latou i le vai tā‘ele i Kipeona; o isi i le la itu o le vai tā‘ele, a o isi i lenei itu o le vai tā‘ele. 14  Ua fai mai Apineru iā Ioapo: “Inā tutulaʻi ia o tauleleʻa, ia latou tauivi* i o tatou luma.” Ona faapea atu lea o Ioapo: “Inā tutulaʻi ia i latou.” 15  Ona latou tutulaʻi lea ma ō atu e tusa ma le aofaʻi ua filifilia. E toʻa 12 mai i tagata o Peniamina ma Iso-poseta le atalii o Saulo, ma le toʻa 12 mai i auauna a Tavita. 16  Ona taufai uu lea e le tasi o le ulu o le tasi, ma tutu‘i e le tasi le itu o le tasi i le pelu, ona latou paʻuʻū uma ai lea i lalo. Ua latou faaigoa ai lea mea o Helekata-asurima, o loo i Kipeona. 17  Ua matuā vevela lava le taua i lenā aso, ma ua faatoʻilaloina Apineru ma tagata Isaraelu i luma o auauna a Tavita. 18  Sa iai i inā le fanau tama e toʻatolu a Seruia,+ o Ioapo,+ o Apisai,+ ma Asaelu;+ o Asaelu foʻi e saoasaoa, e pei o le manu vaefā o le sevi i le fanua. 19  Ua tuliloa e Asaelu ia Apineru, ma e leʻi pi‘o o ia i le itu taumatau po o le itu tauagavale mai i le tuliloaina o Apineru. 20  Ona tepa lea o Apineru i ona tua, ma faapea mai: “O oe ea lenā Asaelu?” Ua fai atu o ia: “O aʻu lenei.” 21  Ona fai mai lea o Apineru iā te ia: “Inā ʻalo ia i lou itu taumatau po o lou itu tauagavale, ma e puʻe ai se tasi o tauleleʻa ma ave ana auupega mo oe.” Ae e leʻi manaʻo Asaelu e ʻaloese mai i le tuliloaina o ia. 22  Ona toe fai mai lea o Apineru iā Asaelu: “Soia e te tuliloaina aʻu. Aiseā ou te fasiotia ai oe? Ona faapefea lea ona ou toe feiloaʻi i lou uso o Ioapo?” 23  Ae ua musu o ia e ʻaloese; ona tutu‘i lea o lona manava e Apineru i le muli o le tao,+ ua ati foʻi le tao i lona tua; ona paʻū lea o ia ma ua oti ai. O i latou uma e tau mai i le mea na paʻū ma oti ai Asaelu, ua tutū ai i inā ona ua faateʻia. 24  Ona tuliloa lea e Ioapo ma Apisai o Apineru. A o goto ifo le lā, ua la oo atu i le aʻega o Ama lea e faafesaga‘i ma Kia, i le auala e agaʻi atu i le toafa* o Kipeona. 25  Ua faapotopoto foʻi le fanauga a Peniamina e mulimuli iā Apineru, ua avea i latou ma ʻau e tasi, ma ua tutū ai i le tumutumu o le tasi aʻega e sauni e tau. 26  Ona valaau mai lea o Apineru iā Ioapo e faapea: “Po o le a lē faamalieina ea a tatou pelu i le toto? Pe e te lē iloa ea e na o i‘uga leaga e oo i ai? O afea e te fai atu ai i le nuu ina ia toe foʻi e aua le tuliloaina o latou uso?” 27  Ua fai atu Ioapo: “Ou te tautō i le Atua moni o loo soifua, pe ana e lē fai mai, semanū e tuliloa atu pea e tagata o latou uso seʻia oo i le taeao.” 28  Ona ili lea e Ioapo o le pū, ua lē toe ō atu foʻi ona tagata e tuliloa iā Isaraelu, ma ua uma ai le taua. 29  Ua savavali Apineru ma ona tagata, ma ua ui atu i Arapa*+ i le pō atoa. Ua latou sopoʻia Ioritana, ua ui atu i le vanu* ma taunuu ai i Maanaima.+ 30  Ina ua toe foʻi atu Ioapo mai i le tuliloaina o Apineru, ona ia faapotopoto faatasi lea o le nuu uma. E toʻa 19 tagata e leʻi iai mai i auauna a Tavita, atoa ai ma Asaelu. 31  Ae na fasia e auauna a Tavita tagata o Peniamina ma tagata o Apineru, ma e toʻa 360 tagata na feoti ai. 32  Ona latou ave lea o Asaelu+ ma tanu i le fanuatanu o lona tamā o loo i Peteleema.+ Ona savavali lea o Ioapo ma ona tagata i le pō atoa, ma ua taunuu i Heperona+ ina ua malama le taeao.

Faamatalaga Pito i Lalo

Epe., “O le aofaʻi o aso.”
Po o le “faia se tauvaga.”
Tagaʻi i le Uiga o Upu.
Po o “le fanua laugatasi o le toafa.”
Pe atonu “ua ui atu i Pitirona uma.”