O le Tusi Lona Lua o Samuelu 14:1-33

  • Ioapo ma le fafine Tikoa (1-17)

  • Mateʻia e Tavita le fuafuaga a Ioapo (18-20)

  • Faatagaina Apisaloma e toe foʻi mai (21-33)

14  Ua iloa e Ioapo le tama a Seruia,+ ua naunau le loto o le tupu iā Apisaloma.+  Ona auina atu lea e Ioapo o le feʻau i Tikoa,+ ua ia aami se fafine atamai ma fai atu iā te ia: “Ia e faatagā faavauvau faamolemole ma ia e ofu i ofu faavauvau, aua e te uu iā te oe i le suāuu;+ ia pei foʻi oe o se fafine ua faavauvau mo aso e tele, ona o sē ua oti.  Ia e alu atu i le tupu ma fai atu i ai nei upu.” Ona taʻu atu lea e Ioapo iā te ia o upu e fai atu ai.  Ona alu atu lea o le fafine Tikoa i le tupu, ua faapaʻū faō i le eleele, ua ifo ma faapea atu: “Le tupu e, seʻi e fesoasoani mai!”  Ona fai mai lea o le tupu iā te ia: “O le ā le mea ua tupu?” Ae ua faapea atu le fafine: “Auē, o aʻu o le fafine nofofua, auā ua oti laʻu tane.  Sa iai le fanau tama e toʻalua a lau auauna, ma na femisaaʻi i laʻua i le fanua. E leai se tasi na taofia i laʻua, ma na fasia ai e le tasi le isi ma oti ai.  A o lenei ua ō mai le aiga uma i lau auauna ma faapea mai, ‘Tuu mai lē na fasiotia lona uso ina ia o matou fasiotia o ia, ona o lona uso lea na ia fasiotia,+ e tusa lava pe e tafiesea ai le suli!’ O le a latou tineia ai le mumū o laʻu malala ola o loo totoe,* ma lē tuuina atu ai i laʻu tane se igoa, po o sē ua totoe i le fogāeleele.”  Ona fai mai lea o le tupu i le fafine: “Inā alu ia i lou fale, ma ou te tuuina atu se poloaʻiga e faatatau iā te oe.”  Ua fai atu le fafine Tikoa i le tupu: “Loʻu alii e, le tupu, ia i luga o aʻu ma le aiga o loʻu tamā le sesē na faia e laʻu tama, ae ia mamā le tupu ma lona nofoālii.” 10  Ona fai mai lea o le tupu: “Afai e iai se tasi e toe fai atu iā te oe, ia e aumai o ia iā te aʻu, ona lē toe faatigā lea o ia iā te oe.” 11  Ae ua fai atu le fafine: “Faamolemole, ia manatua e le tupu Ieova lou Atua, ina ia lē faia e lē e tauimasui i le toto+ se mea leaga ma fasiotia ai laʻu tama.” Ona fai mai lea o le tupu: “Ou te tautō iā Ieova le Atua soifua,+ e lē paʻū lava i le eleele se lauulu o lau tama.” 12  Ua fai atu le fafine: “Faamolemole, seʻi fai atu se upu a lau auauna i loʻu alii le tupu.” Ona fai mai lea o ia: “Inā fai mai ia!” 13  Ua faapea atu le fafine: “Aiseā la ua e manatu ai e faia se mea faapea i le nuu o le Atua?+ Auā ua nofosala le tupu lava ia ina ua fetalai mai i nei upu, ae ua lē toe faafoʻi mai e le tupu lona atalii na ia tuliesea.+ 14  E tatou te feoti uma lava, ma e pei i tatou o vai ua sasaa i le eleele, e lē mafai ona toe maua mai. Ae e lē aveesea e le Atua le ola o se tasi, ma e mafaufau o ia i māfuaaga e lē tatau ai ona tuliesea pea mai iā te ia lē ua tuliesea. 15  Ua ou sau e taʻu atu nei upu i loʻu alii le tupu, auā ua faafefe aʻu e le nuu. Ona fai atu lea o lau auauna, ‘Seʻi oʻu talanoa atu lava i le tupu faamolemole. Atonu o le a faia e le tupu e tusa ma le talosaga a lana pologa. 16  E ono faafofoga mai fo‘i le tupu ma laveaʻiina lana pologa, mai i lima o le tagata o loo saʻili e tafiesea aʻu ma laʻu tama e toʻatasi, mai i le mauaina o le tofi ua tuuina mai e le Atua.’+ 17  Ona faapea atu lea o lau auauna, ‘Tau ina ia ou maua le mapusaga ona o fetalaiga a loʻu alii le tupu.’ Auā ua pei loʻu alii le tupu o se agelu a le Atua moni, i le iloaina o le mea lelei mai i le mea leaga. Ia faatasi Ieova lou Atua iā te oe.” 18  Ua tali mai le tupu i le fafine: “Faamolemole, aua neʻi e natia mai iā te aʻu se mea ou te fesili atu ai iā te oe.” Ona fai atu lea o le fafine: “Faamolemole, inā fetalai mai ia loʻu alii e, le tupu.” 19  Ona fesili mai lea o le tupu: “Po o Ioapo na faatonuina oe e faia nei mea uma?”+ Ona tali atu lea o le fafine: “Ou te tautō atu iā te oe* le tupu e, o lea lava* e pei ona e fetalai mai ai; auā o lau auauna o Ioapo na faatonuina aʻu, o ia foʻi na tuuina mai i le gutu o lau auauna nei upu uma. 20  Na faia e lau auauna o Ioapo lenei mea, ina ia suia ai lou manatu i le mataupu, ae ua iai i loʻu alii le atamai e pei o le agelu a le Atua moni, ma ua ia silafia mea uma o loo tutupu i le nuu.” 21  Ona fai atu lea o le tupu iā Ioapo: “Ua lelei, o le a ou faia lenei mea.+ Inā alu ia ma toe aumai le tauleʻaleʻa o Apisaloma.”+ 22  Ona faapaʻū faō lea o Ioapo i le eleele ma ifo, ma viia le tupu. Ua faapea mai Ioapo: “Loʻu alii e, le tupu, o le aso lenei ua iloa ai e lau auauna ua e manatu mai iā te aʻu, auā ua faia e le tupu e tusa ma le talosaga a lana auauna.” 23  Ona tulaʻi lea o Ioapo ma alu atu i Kasuri,+ ua ia aumaia Apisaloma i Ierusalema. 24  Peitaʻi, ua fetalai atu le tupu: “Ia alu ane o ia i lona fale, ae aua neʻi o ma feiloaʻi.” Ona alu lea o Apisaloma i lona fale, e leʻi feiloaʻi ma le tupu. 25  Sa leai se tasi i Isaraelu uma na sili ona viiviia lona aulelei e pei o Apisaloma. E amata mai lava i ona alofivae e oo i lona tumua‘i, e leai lava se pona iā te ia. 26  Pe a ʻoti lona ulu, o le mamafa o lona lauulu e 200 sekeli* pe a fuatia i le fua a le tupu lea e faia i maa.* (E na te ʻotiina lona ulu i faaiʻuga o tausaga taʻitasi; auā e mamafa tele mo ia.) 27  Na fanau mai iā Apisaloma o atalii e toʻatolu+ ma lona afafine e toʻatasi, o Tamara lona igoa. O ia o se tamaʻitaʻi e sili ona lalelei. 28  Na nofo pea Apisaloma i Ierusalema mo tausaga e lua, ae e leʻi feiloaʻi lava ma le tupu.+ 29  Ona feʻau atu lea e Apisaloma o Ioapo ina ia auina atu o ia i le tupu, ae e leʻi sau Ioapo. Ona toe feʻau faalua atu lea iā te ia, ae e leʻi sau lava o ia. 30  Mulimuli ane, ua fai atu o ia i ana auauna: “E sosoo le fanua o Ioapo ma loʻu fanua, ma o loo iai ni ana karite i inā. Inā ō atu ia ma susunu i le afi.” Ona susunu lea e auauna a Apisaloma o le fanua i le afi. 31  Ona tulaʻi lea o Ioapo ma alu ane i le fale o Apisaloma, ua faapea mai iā te ia: “O le ā le mea ua susunu ai e au auauna loʻu fanua?” 32  Ona fai atu lea o Apisaloma iā Ioapo: “Vaai! na ou feʻau atu iā te oe e faapea, ‘Sau ia, ou te auina atu oe i le tupu e faapea atu: “Aiseā ua ou sau ai mai i Kasuri?+ Na sili ai pe ana ou nofo ai pea i inā. O lenei, seʻi oʻu alu atu e feiloaʻi ma le tupu, ma afai foʻi e iai se mea ua ou nofosala ai, ona ia fasiotia lea o aʻu.”’” 33  Ona alu atu lea o Ioapo i le tupu ma taʻu atu iā te ia. Ua ia aami foʻi iā Apisaloma, ona alu atu lea o ia i le tupu ua ifo iā te ia, ma faapaʻū faō i le eleele i luma o le tupu; ona sogi atu lea o le tupu iā Apisaloma.+

Faamatalaga Pito i Lalo

E faasino atu i lona toe faamoemoega mo se fanau.
Po o le “e leai se tasi e mafai ona ʻalo i le itu taumatau po o le itu tauagavale mai i mea.”
Po o le “O loo soifua oe.”
Pe ā ma le 2.3 kilokalama. Tagaʻi i le Faa. E14.
Atonu o se fua e iai i le maota o le tupu, po o se sekeli foʻi a le “tupu” e ese mai i sekeli masani.