O le Tusi Lona Lua o Samuelu 13:1-39

  • Faaleaga Tamara e Amanono (1-22)

  • Fasiotia Amanono e Apisaloma (23-33)

  • Sola Apisaloma i Kasuri (34-39)

13  Sa iai se tuafafine lalelei o Apisaloma le atalii o Tavita, e igoa iā Tamara,+ ma ua alofa iā te ia o Amanono+ le atalii o Tavita.  Na matuā mafatia Amanono ma ua maʻi ai o ia ona o Tamara lona tuafafine, auā o le taupou o ia ma e foliga mai e faigatā ona faia e Amanono se mea iā te ia.  Sa iai se uō a Amanono e igoa iā Ionatapa,+ ma o le atalii o Sima+ le uso o Tavita; o Ionatapa foʻi o se tagata e atamai tele.  Ua fai mai Ionatapa iā te ia: “Le atalii e o le tupu, aiseā e te faanoanoa ai i taeao uma? Ia ta‘u mai iā te aʻu.” Ona fai atu lea o Amanono iā te ia: “Ua ou alofa iā Tamara le tuafafine+ o loʻu uso o Apisaloma.”  Ona fai mai lea o Ionatapa iā te ia: “Ia e taoto i lou moega ma faatagā maʻi. Pe a sau lou tamā e asiasi mai iā te oe, ona e fai atu lea, ‘Faamolemole, seʻi sau Tamara loʻu tuafafine e vaai a‘u. Ia saunia e ia se mea‘ai mo le tagata ma‘i i o‘u luma ma laulau mai iā te a‘u, ona ou ‘ai ai lea.’”  Ua taoto Amanono, ua faatagā maʻi, ma ua alu atu le tupu e vaai o ia. Ona fai mai lea o ia i le tupu: “Faamolemole, seʻi sau lava Tamara loʻu tuafafine e tao ni keke se lua i oʻu luma, ma ia laulau mai iā te aʻu.”  Ona alu atu lea o le feʻau a Tavita iā Tamara i lona fale, ua faapea atu: “Faamolemole, seʻi e alu ane i le fale o Amanono lou tuagane, ma fai se meaʻai mo ia.”  Ua alu Tamara i le fale o Amanono lona tuagane, lea o loo taoto ai o ia. Ona tago lea o Tamara i le paluga o falaoamata, ua lomi ma faia ai keke i ona luma, ona ia falai lea o keke.  Ona ia tago lea i le falai ma laulau atu keke i ona luma, ae ua musu Amanono e ʻai, ma ua ia faapea atu: “Ia ō i fafo tagata uma mai iā te aʻu.” Ona ō ai lea i fafo o tagata uma mai iā te ia. 10  Ua fai ane Amanono iā Tamara: “Ia aumai le meaʻai i le potumoe, ma laulau mai iā te aʻu.” Ona tago lea o Tamara i keke na ia faia, ua avatu i lona tuagane o Amanono i totonu o le potumoe. 11  Ina ua alu atu Tamara e avatu le mea‘ai iā te ia, ona tago lea o Amanono ma taofi iā te ia, ua faapea atu: “Loʻu tuafafine e, sau ta momoe.” 12  Ae ua faapea mai o ia iā te ia: “E leai, loʻu tuagane e! Aua e te faaleaga iā te aʻu; auā e lē faia lenei mea i Isaraelu.+ Aua neʻi e faia lenei mea matagā.+ 13  E faapefea ona ou faateʻaina loʻu luma? O le a pei foʻi oe o se tasi o tagata e fai mea matagā i Isaraelu. O lenei, seʻi e tautala atu faamolemole i le tupu; auā e na te lē taofia lava aʻu mai iā te oe.” 14  Ae e leʻi faalogo o ia i lana upu, ae ua ia faamalosi iā te ia ma faaleaga iā te ia, ua momoe foʻi ma ia. 15  Ona matuā ʻinoʻino lea o Amanono iā te ia, ua sili atu foʻi lona ʻinoʻino iā te ia nai lo o lona alofa iā te ia, ua fai atu Amanono iā te ia: “Tū i luga, ma alu ese!” 16  Ae ua fai mai o ia iā te ia: “E leai, loʻu tuagane e; auā ua sili atu le leaga o lou tulia o aʻu nai lo o le mea leaga ua e faia iā te aʻu!” Peitaʻi, e leʻi faalogo o ia iā te ia. 17  Ua valaau atu Amanono i lana auauna talavou, ua faapea atu: “Faamolemole, seʻi aveese atu lenei tagata mai iā te aʻu, ma loka mai le faitotoʻa.” 18  (Sa ofu Tamara i se ofu talaloa faapitoa,* auā o ofu na sa masani ona oofu ai afafine taupou o le tupu.) Ona taʻitaʻi lea e le auauna a Amanono o Tamara i fafo, ua loka foʻi le faitotoʻa. 19  Ona asu aʻe lea e Tamara o le lefulefu i luga o lona ulu,+ ua ia saeia foʻi le ofu talaloa faapitoa sa ofu ai o ia; ua tuu foʻi ona lima i luga o lona ulu, ua alu ese atu ma tagiauē a o savali. 20  Ua fai mai Apisaloma+ lona tuagane iā te ia: “Po o Amanono ea lou tuagane lea na lua faatasi? O lenei, loʻu tuafafine e, aua e te taʻuina atu i se tasi lenei mea. O ia o lou tuagane.+ Ia e faagalo le mea ua tupu.”* Ona nofo ai lea o Tamara i le fale o Apisaloma lona tuagane, ae ua lē aufaatasi o ia ma isi tagata. 21  Ua faalogo foʻi le tupu o Tavita i nei mea uma, ona matuā ita ai lea o ia.+ Ae e na te leʻi faatigā i faalogona o lona atalii o Amanono, auā na alofa iā te ia ona o ia o lana ulumatua. 22  E leʻi tautala atu foʻi Apisaloma iā Amanono i se upu lelei po o se upu leaga; auā na ita lava+ Apisaloma iā Amanono ina ua ia faaleaga iā Tamara lona tuafafine.+ 23  Ua mavae tausaga e lua, ma sa iai tagata o Apisaloma o ē e sele i fulufulu o ana mamoe i Paala-asora, lea e lata ane i Efaraima,+ ma ua valaaulia e Apisaloma atalii uma o le tupu.+ 24  Ua alu atu Apisaloma i le tupu, ma faapea atu: “O loo seleina e lau auauna fulufulu o ana mamoe! Seʻi maliu atu le tupu ma ana auauna faatasi ma aʻu.” 25  Ona fai mai lea o le tupu iā Apisaloma: “E leai loʻu atalii e! Pe afai e matou te ō atu uma, o le a fai i matou ma avega mamafa iā te oe.” E ui i lona faatauanau atu i le tupu, ae e leʻi alu atu o ia, ae ua ia faamanuia atu iā Apisaloma. 26  Ona fai mai lea o Apisaloma: “Afai e te lē maliu atu, seʻi matou ō la ma loʻu uso o Amanono faamolemole.”+ Ona fai atu lea o le tupu iā te ia: “Aiseā e lua te ō ai ma ia?” 27  Ae ua tauanau e Apisaloma o ia, ona ia tuuina atu lea o Amanono ma atalii uma o le tupu e ō ma ia. 28  Ona poloaʻia lea e Apisaloma o ana auauna e faapea: “Ia vaavaai, pe a fiafia le loto o Amanono ona o le uaina, ona ou fai atu lea iā te outou, ‘Ia fasi Amanono!’ ona outou fasiotia lea o ia. Aua tou te fefefe. Pe e lē o aʻu ea lea ua faatonuina outou? Ia outou faamalolosi ma lototetele.” 29  Ua faia e auauna a Apisaloma iā Amanono e pei ona poloaʻi atu ai Apisaloma; ona tulaʻi lea o atalii uma o le tupu, ua taʻitasi ma tiʻetiʻe i lana asini,* ma latou sosola. 30  A o i le ala i latou, ua oo mai le tala iā Tavita e faapea: “Ua fasiotia e Apisaloma atalii uma o le tupu, e leai se tasi o i latou ua totoe.” 31  Ona tulaʻi lea o le tupu ma saeia ona ofu, ua taoto foʻi i le eleele, a o tutū ana auauna uma i ona tafatafa, ua saeia foʻi o latou ofu. 32  Ae ua fai atu Ionatapa+ le atalii o Sima,+ le uso o Tavita: “Aua neʻi manatu loʻu alii ua latou fasiotia uma tauleleʻa, o atalii o le tupu, ae e na o Amanono ua oti,+ auā na faatonuina e Apisaloma lea mea, o se mea na fuafuaina+ talu mai le aso na faaleaga ai e Amanono lona tuafafine+ o Tamara.+ 33  O lenei, aua neʻi uaʻi atu loʻu alii le tupu i le tala e faapea, ‘Ua feoti uma atalii o le tupu’; ae e na o Amanono ua oti.” 34  O le taimi lenā, ua sola ese ai Apisaloma.+ Mulimuli ane, ua tepa aʻe le tagata vāai ma iloa atu ai le toʻatele o tagata, o loo ō mai i le ala o loo i ona tua i le itu o le mauga. 35  Ona fai atu lea o Ionatapa+ i le tupu: “Faauta! Ua toe foʻi mai alo o le tupu, e pei lava ona fai atu ai lau auauna.” 36  Ua uma atu ana upu, ae ō mai loa atalii o le tupu o loo fetagisi leotetele; e oo lava i le tupu ma ana auauna uma, ua matuā fetagisi lava. 37  A o Apisaloma, ua sola o ia ma ua alu atu iā Talemai+ le atalii o Ameuta le tupu o Kasuri. Ua faavauvau foʻi Tavita mo le tele o aso ona o lona atalii. 38  Ua sola Apisaloma ma ua alu atu i lona ala i Kasuri;+ ua nofo foʻi i inā mo tausaga e tolu. 39  Mulimuli ane, ua naunau lava le tupu o Tavita e alu atu iā Apisaloma; auā ua ia talia ua oti lona atalii o Amanono.

Faamatalaga Pito i Lalo

Po o “ua teuteuina.”
Po o le “Aua neʻi uaʻi lou loto i le mea ua tupu.”
O le upu Eperu e faasino atu i le tama a le asini poʻa ma le solofanua fafine.