O le Tusi Lona Lua o Samuelu 1:1-27

  • Faalogo Tavita ua oti Saulo (1-16)

  • Pese faanoanoa a Tavita iā Saulo ma Ionatana (17-27)

1  Ina ua mavae le oti o Saulo, ma ua toe foʻi atu Tavita mai i le faatoʻilaloina* o Amaleka, ona nofo ai pea lea o Tavita i Sekeleka+ i aso e lua.  Ua oo i le aso lona tolu, ona sau lea o se tagata mai i le ʻautau a Saulo, ua saeia ona ofu, ua iai foʻi efuefu i lona ulu. Ina ua oo atu o ia iā Tavita, ona faapaʻū faō lea i le eleele ma ifo iā te ia.  Ona fesili atu lea o Tavita iā te ia: “O fea e te sau ai?” Ua tali mai o ia: “Na ou sola mai i le ʻautau a Isaraelu.”  Ua fai atu Tavita iā te ia: “O le ā le iʻuga ua oo i ai? Seʻi taʻu mai iā te aʻu faamolemole.” Ona faapea mai lea o ia: “Ua sosola tagata mai i le taua, ma e toʻatele ua paʻuʻū ma feoti ai; ua feoti foʻi Saulo ma Ionatana lona atalii.”+  Ua fai atu Tavita i le tauleʻaleʻa na taʻuina mai iā te ia le tala: “E faapefea ona e iloa ua feoti Saulo ma Ionatana lona atalii?”  Ona tali mai lea o le tauleʻaleʻa iā te ia: “Na ou alu ane i luga o le mauga o Kilepoa,+ ae o loo iai i inā Saulo o loo totoo i lana tao, ma na maua mai o ia e kariota ma tagata tiʻetiʻe solofanua.+  Ina ua ia fāliu i tua ma iloa mai aʻu, ona ia valaau mai lea iā te aʻu, ona ou fai atu lea, ‘O aʻu lenei!’  Ua fai mai o ia iā te aʻu, ‘O ai ea oe?’ Ona ou fai atu lea, ‘O aʻu o le Amaleka.’+  Na ia fai mai, ‘Faamolemole, inā sau ia ma fasioti iā te aʻu, auā ua ou matuā tigāina lava, ae ua ou ola pea.’ 10  Na ou alu atu loa ma fasioti iā te ia,+ ona na ou iloa e lē toe ola o ia auā ua matuā manu‘a lava. Ona ou ave lea o le palealii sa i lona ao, ma le taulima sa i lona aao, ma ou aumaia i inei i loʻu alii.” 11  Ona tago lea o Tavita i ona ofu ma saeia, ma na faia foʻi faapea e tagata uma sa iā te ia. 12  Ua latou taufaitagitu‘i, ua fetagisi, ma anapopogi+ seʻia oo i le afiafi ona o Saulo, o Ionatana lona atalii, o le nuu o Ieova, atoa foʻi ma le aiga o Isaraelu,+ auā ua feoti i latou i le pelu. 13  Ua fai atu Tavita i le tauleʻaleʻa na taʻuina mai iā te ia le tala: “O fea e te sau ai?” Ua fai mai o ia: “O aʻu o le atalii o le tagata ese, o le Amaleka.” 14  Ona fai atu lea o Tavita iā te ia: “E faapefea ona e lē fefe e faaoo lou lima e fasioti lē ua faauuina a Ieova?”+ 15  Ua valaau atu Tavita i le tasi o ona tauleleʻa ma faapea atu: “Inā alu atu ia ma fasioti iā te ia.” Ona ia fasi lea o ia ma oti ai.+ 16  Ua fai atu Tavita iā te ia: “Ua i luga o lou lava ulu lou toto, auā o lou lava gutu na taʻutino mai e faapea, ‘O aʻu lava na ou fasiotia lē ua faauuina a Ieova.’”+ 17  Ua lagi e Tavita lenei pese faanoanoa* ona o Saulo ma Ionatana lona atalii,+ 18  ma ua faapea atu e tatau ona aʻo e tagata o Iuta lenei pese faanoanoa ua taʻua “O le ʻAufana,” lea ua tusia i le tusi a Iasera:+ 19  “Isaraelu e, ua fasia ou tagata mamalu i ou nofoaga maualuluga.+ Auē! ua maliliu toa! 20  Aua neʻi o outou taʻu atu i Kata;+Aua foʻi neʻi talaʻia atu i auala o Asekelona,Ina neʻi olioli ai afafine o Filisitia,Ina neʻi fiafia ai afafine o tagata e lē peritomeina. 21  Mauga o Kilepoa e,+Aua neʻi iai se sau po o se timu i o outou luga,Aua foʻi neʻi maua i fanua ni fua e avatu i le Atua,+Auā ua faaleagaina i inā le talita a ē e malolosi,Ua lē toe faauuina fo‘i i le suāuu le talita a Saulo. 22  E leʻi foʻi le ʻaufana a Ionatana,+Mai i toto o ē na fasia, mai i ga‘o o tagata totoa,E leʻi foʻi fua mai lava le pelu a Saulo.+ 23  Sa alofagia ma faapelepeleina Saulo ma Ionatana+ a o la soifua mai,E lē o tuueseeseina foʻi i laʻua e le maliu.+ E sili atu lo la saoasaoa nai lo o aeto,+E sili atu foʻi lo la malolosi nai lo o leona.+ 24  Afafine o Isaraelu e, ia outou fetagisi ona o Saulo,O lē na faaofuina outou i ofu mūmū sesega ua teuteuina,O lē na teuteua o outou ofu i auro. 25  Auē! ua maliliu toa i le taua! Ua fasia Ionatana i ou nofoaga maualuluga!+ 26  Ua ou mafatia ona o oe loʻu uso Ionatana,Sa matuā pele oe iā te aʻu.+ Maʻeu lou alofa iā te aʻu e sili atu i le alofa o fafine.+ 27  Auē! ua maliliu toa,Ua maʻimau ai auupega o le taua!”

Faamatalaga Pito i Lalo

Po o le “fasiga.”
Po o le “pese o auega.”