O le Tusi Lona Lua o Nofoaiga a Tupu 35:1-27
35 Na faia e Iosia se Paseka+ iā Ieova i Ierusalema, ma ua latou fasia ai manu mo le Paseka+ i le aso lona 14 o le uluaʻi masina.+
2 Na ia tofia ositaulaga i o latou tiute, ma faalaeiau i latou ina ia faia la latou auaunaga i le fale o Ieova.+
3 Ona ia fai atu lea i le ʻau sa Levī, o aʻoaʻo ia o Isaraelu uma,+ o i latou e paia iā Ieova: “Ia tuu le Atolaau paia i le fale na fausia e Solomona le atalii o Tavita le tupu o Isaraelu;+ e tou te lē toe amoina i o outou tauʻau.+ O lenei, inā auauna ia iā Ieova lo outou Atua ma lona nuu o Isaraelu.
4 Ia outou sauniuni foʻi i aiga o o outou tamā e tusa ai ma o outou vaega, e pei ona faatonuina i tusitusiga a Tavita+ le tupu o Isaraelu, ma tusitusiga a Solomona+ lona atalii.
5 Ia outou tutū i le mea paia e tusa ai ma o outou vaega, i se auala e mafai ai ona tofu le aiga ma se vaega o se aiga o le ʻau sa Levī e auauna iā i latou.
6 Ia outou fasi manu o le Paseka,+ ma ia faamamāina foʻi outou, ma faia sauniuniga mo o outou uso ina ia faia e tusa ma le afioga a Ieova na ala mai iā Mose.”
7 Ona avatu lea e Iosia i le nuu, o lafu o tamaʻi mamoe poʻa ma tamaʻi ʻoti poʻa, mo taulaga o le Paseka mo i latou sa iai, o le aofaʻiga e 30,000 ma povi e 3,000. O mea uma nei na aumai mai i mea a le tupu.+
8 Na faia foʻi e ona perenise o meaalofa o foaʻi tauofo mo le nuu, o ositaulaga ma le ʻau sa Levī. O Hilikia,+ o Sakaria, ma Ikielu, o taʻitaʻi ia o le fale o le Atua moni, ua latou avatu i le ʻauositaulaga manu e 2,600 mo taulaga o le Paseka, ma povi e 300.
9 O Konania ma ona uso o Semaia ma Netanielu, faatasi ai ma Hasapea, o Ieielu, ma Ieosapa, o alii sili ia o le ʻau sa Levī, ua latou foaʻi atu i le ʻau sa Levī manu e 5,000 mo taulaga o le Paseka, ma povi e 500.
10 Ua uma sauniuniga ma ua tutū pea le ʻauositaulaga i o latou tulaga, faapea foʻi ma le ʻau sa Levī i o latou vaega,+ e tusa ai ma le poloaʻiga a le tupu.
11 Ua latou fasia manu o le Paseka,+ ma ua sausauina e ositaulaga i luga o le fata faitaulaga le toto na aumai e le ʻau sa Levī,+ a o saeina paʻu o manu e le ʻau sa Levī.+
12 Ua latou saunia foʻi taulaga mū ina ia tufatufaina atu i tagata o ē ua vaevaeina i vaega o aiga o tamā, ina ia ofo atu le taulaga iā Ieova e tusa ai ma le mea ua tusia i le tusi a Mose; ua latou faia foʻi faapea i povi.
13 Ua latou tunu le taulaga o le Paseka i luga o le afi e tusa ai o le tū masani;+ ua latou tunu foʻi mea ua faapaiaina i ulo, o ulo faaofuofu, ma falai, ona latou aumaia faavave lea i le nuu.
14 Ona latou sauniunia lea o mea mo i latou ma ositaulaga, auā na ofoina atu e ositaulaga, o le fanauga lea a Arona, o taulaga mū ma mea gaʻoa seʻia oo i le pō. O lea ua sauniunia ai e le ʻau sa Levī mea mo i latou ma ositaulaga, o le fanauga lea a Arona.
15 O tagata pepese o le fanauga a Asafo,+ sa i o latou tulaga e tusa ai ma le poloaʻiga a Tavita,+ o Asafo,+ o Hemana, ma Iutana+ o lē e vaaia faaaliga a le tupu; sa iai foʻi leoleo faitotoʻa i faitotoʻa eseese.+ Sa lē manaʻomia ona latou tuua la latou auaunaga, auā ua faia e o latou uso o le ʻau sa Levī sauniuniga mo i latou.
16 I lenā aso, na latou saunia ai mea uma na faafinagaloina e Ieova mai iā i latou e fai ai le Paseka,+ ma ofo atu taulaga mū i luga o le fata faitaulaga a Ieova, e tusa ai ma le poloaʻiga a le tupu o Iosia.+
17 O le fanauga a Isaraelu sa iai, ua latou faia le Paseka i lenā taimi, atoa foʻi ma le Tausamiga o Falaoa e Lē Faafefeteina mo aso e fitu.+
18 E leʻi faia lava se Paseka faapenei i Isaraelu talu mai aso o le perofeta o Samuelu; e leʻi faia foʻi e nisi lava tupu o Isaraelu se Paseka faapenei, e pei ona faia e Iosia,+ o ositaulaga, o le ʻau sa Levī, o Iuta uma ma Isaraelu na iai, ma tagata na nonofo i Ierusalema.
19 Na faia lenei Paseka i le tausaga lona 18 o le nofoaiga a Iosia.
20 Ina ua uma ona saunia e Iosia le malumalu,* ona alu aʻe ai lea o Neko+ le tupu o Aikupito e tau i Karekimisa i tafatafa o le vaitafe o Eufirate. Ona alu atu lea o Iosia e tau ma ia.+
21 Ae ua ia aauina mai avefeʻau iā Iosia, ua faapea mai: “Le tupu e o Iuta, aiseā ua e faasagatau mai ai iā te aʻu? Ou te lē o alu atu i le asō e tau ma oe, ae ou te siitaua atu i o tatou fili, o le Atua foʻi na ia fetalai mai ina ia ou faamata‘u iā i latou. Ia e ʻaloese ina ia e saogalemu ai, auā o loo faatasi le Atua ma aʻu, ina neʻi faaumatia oe e ia.”
22 Ae ua lē liliuese Iosia mai iā te ia, ae ua faafoliga atu o se tagata ese+ ma alu atu e tau ma Neko, ua lē faalogo foʻi i upu a Neko lea e mai i le fofoga o le Atua. Ua alu atu o ia e tau i le fanua laugatasi o Mekito.+
23 Ua fana e tagata fanafana aū le tupu o Iosia, ona fai atu lea o le tupu i ana auauna: “Inā aveese ia aʻu mai i inei, auā ua ou manu‘a leaga lava.”
24 Ona aveese lea o ia e ana auauna mai i le kariota, ma faatiʻetiʻe i lana kariota tau lona lua ma aumai o ia i Ierusalema. Ona maliu lea o ia, ma ua tanu i le tuugamau o ona augātamā;+ ua faavauvau foʻi Iuta ma Ierusalema uma ona o Iosia.
25 Ua usu e Ieremia+ se pese faanoanoa* ona o Iosia, ma ua pepese pea tama ma teine pepese+ uma e faatatau iā Iosia, i a latou pese faanoanoa seʻia oo mai i le aso nei; ua faia fo‘i se faaiʻuga ina ia usuina nei pese i Isaraelu, ma ua tusia i le tusi o pese faanoanoa.
26 A o le olaga uma o Iosia ma ana gaoioiga alofa faamaoni, e tusa ai ma mea ua tusia i le Tulafono a Ieova,
27 ma mea na ia faia, e mai i le amataga se‘ia oo i le faai‘uga, ua tusia ia i le Tusi o Tupu o Isaraelu ma Iuta.+
