O le Tusi Lona Lua o Nofoaiga a Tupu 18:1-34
18 Sa tele le ʻoa ma le mamalu o Iosefatu,+ peitaʻi, ua ia atiaʻe se faiā ma Aapo,+ e ala i le faataga o se tasi o lona aiga e faaipoipo i se tasi o le aiga o Aapo.
2 I tausaga mulimuli ane ai, na ia alu ifo ai iā Aapo i Samaria,+ ona faia lea e Aapo mo ia ma le nuu sa faatasi ma ia, o taulaga i mamoe ma povi e tele. Na faaoso* foʻi o ia e Aapo e la te siitaua iā Ramota-kiliata.+
3 Ona fai mai lea o Aapo le tupu o Isaraelu iā Iosefatu le tupu o Iuta: “Pe e ta te ō i le taua i Ramota-kiliata?” Ua fai atu Iosefatu iā te ia: “O aʻu nei e tutusa ma oe, ma o loʻu nuu e tutusa ma lou nuu, e matou te lagolagoina foʻi oe i le taua.”
4 Ae ua toe fai mai Iosefatu i le tupu o Isaraelu: “Faamolemole, seʻi fesili muamua atu lava i se fetalaiga mai iā Ieova.”+
5 Ona faapotopoto faatasi lea e le tupu o Isaraelu o le ʻauperofeta, e toʻa 400 tagata, ma fai atu iā i latou: “Po ou te alu atu ea e tau ma Ramota-kiliata, po ou te nofo?” Ae ua latou fai mai: “Inā maliu aʻe ia, auā e foaʻi mai lava e le Atua moni le aai i le lima o le tupu.”
6 Ae ua fai mai Iosefatu: “Pe e lē o iai ea i inei se perofeta a Ieova?+ Seʻi o tatou fesili atu i le Atua e ala iā te ia.”+
7 Ona fai atu lea o le tupu o Isaraelu iā Iosefatu: “O loo iai lava se tasi tagata+ e mafai ona ta fesili atu ai iā Ieova, ae ou te matuā ita lava iā te ia, auā e na te lē valoia ni mea lelei e faatatau iā te aʻu, ae e na o mea leaga.+ O ia o Mekaio le atalii o Imila.” Ae ua fai mai Iosefatu: “Aua neʻi fetalai mai le tupu i se mea faapena.”
8 Ona valaau atu lea o le tupu o Isaraelu i se tagata aloaʻia, ua faapea atu: “Ia aumai faavave Mekaio le atalii o Imila.”+
9 Ua taʻitasi le tupu o Isaraelu ma Iosefatu le tupu o Iuta ma nonofo i o la nofoālii, o loo oofu foʻi i o la ofu tautupu; ua la nonofo i le mea e soli ai saito i le faitotoʻa o Samaria, ma ua vavalo perofeta uma i o la luma.
10 Ona faia lea e Setekaia le atalii o Kenaana mo ia o seu uʻamea, ma faapea atu: “O le mea lenei na fetalai mai ai Ieova, ‘O mea nei e te tatui ai tagata Suria seʻia e faaumatia i latou.’”
11 Ua faapena foʻi valoaga ua faia e isi perofeta uma, ua faapea atu: “Ia e alu aʻe i Ramota-kiliata ma o le a e manumalo;+ e foaʻiina mai lava e Ieova le aai i le lima o le tupu.”
12 Ua fai atu iā Mekaio le avefeʻau na alu atu e aami o ia: “Faauta! E matuā logolelei lava i le tupu upu a perofeta. Faamolemole, seʻi faapea foʻi au upu e pei o a latou upu,+ ma ia e tautala atu i se upu lelei.”+
13 Ae ua fai mai Mekaio: “Ou te tautō iā Ieova le Atua soifua, o le mea e fetalai mai ai loʻu Atua iā te aʻu, o le mea foʻi lea ou te tautala atu ai.”+
14 Ua sau o ia i le tupu, ona fai atu lea o le tupu iā te ia: “Mekaio e, po ou te alu atu ea e tau ma Ramota-kiliata, po ou te nofo?” Ona ia tali mai lea iā te ia: “Inā alu aʻe ia ma o le a e manumalo; e tuuina mai lava i latou i ou lima.”
15 Ona fai atu lea o le tupu iā te ia: “Po ua faafia ona ou faatautō oe e aua neʻi e toe tautala mai iā te aʻu i se tasi mea, ae na o le upu moni lava i le suafa o Ieova?”
16 Ona fai mai lea o ia: “Ua ou vaaia tagata Isaraelu uma o taapeape i mauga, e pei o ni mamoe ua leai se leoleo mamoe.+ Ua fetalai mai Ieova: ‘O i latou nei ua leai so latou matai. Ia tuu atu i latou e taʻitasi ma toe foʻi atu ma le filemu i lona fale.’”
17 Ona fai atu lea o le tupu o Isaraelu iā Iosefatu: “Po ou te leʻi fai atu ea iā te oe, ‘E na te lē valoia ni mea lelei e faatatau iā te aʻu, ae e na o mea leaga’?”+
18 Ona faapea mai lea o Mekaio: “O le mea lea, inā faalogologo mai ia i le afioga a Ieova: Na ou iloa atu Ieova o loo afio i lona nofoālii,+ a o laulaututū ʻautau uma o le lagi+ i lona itu taumatau ma lona itu tauagavale.+
19 Ua fetalai atu foʻi Ieova, ‘O ai e na te faavaleaina Aapo le tupu o Isaraelu, ina ia alu aʻe ai ma oti i Ramota-kiliata?’ Ona fai mai lea o le tasi e faapea, ae ua fai mai le isi e faapea.
20 Ona alu ane lea o se tasi agaga*+ ma tū i luma o Ieova ma faapea mai, ‘O le a ou faavaleaina o ia.’ Ua fesili atu Ieova iā te ia, ‘E faapefea?’
21 Ona ia tali mai lea, ‘O le a ou alu ma avea aʻu ma agaga taufaasesē i gutu o ana perofeta uma.’ Ona ia fetalai atu lea, ‘O le a e faavaleaina o ia, ma o le a e taulau manuia. Inā alu ia ma fai lenā mea.’
22 O lenei, ua tuuina e Ieova se agaga taufaasesē i gutu o au perofeta;+ ae ua fetalai Ieova o le a oo puapuaga iā te oe.”
23 Ona faalatalata mai lea o Setekaia+ le atalii o Kenaana, ma ua ia pō le alafau+ o Mekaio,+ ua faapea mai: “Pe e te manatu ua alu ese le agaga o Ieova mai iā te a‘u* ae tautala atu iā te oe?”+
24 Ona fai atu lea o Mekaio: “Faauta! O le a e iloa lava lenā mea i le aso e te ulu atu ai i le potu pito i totonu e te lafi ai.”
25 Ua faapea ane le tupu o Isaraelu: “Inā ave ia Mekaio ma avatu iā Amone le alii sili o le aai, ma Ioasa le atalii o le tupu.
26 E te faapea atu, ‘O loo faapea mai le tupu: “Ia outou tuuina lenei tagata i le falepuipui,+ ma ia faaitiitia ana meaʻai ma vai seʻia ou toe fo‘i mai ma le filemu.”’”
27 Ona fai mai lea o Mekaio: “Afai e te toe foʻi mai ma le filemu, e leʻi fetalai mai la Ieova iā te aʻu.”+ Ua ia toe faapea mai: “Le nuu e, ia manatua a‘u upu na.”
28 Ona ō aʻe lea o le tupu o Isaraelu ma Iosefatu le tupu o Iuta i Ramota-kiliata.+
29 Ua fai atu le tupu o Isaraelu iā Iosefatu: “Ou te ofu ese ma ou alu atu i le taua, a o oe, ia fai ou ofu tautupu.” Ona faia lea o ofu ese o le tupu o Isaraelu, ma ua ō atu i le taua.
30 Ae ua poloaʻi atu le tupu o Suria i alii o ē e pule i ana kariota, e faapea: “Aua neʻi outou tau ma ē e faatauvaa po o ē e sili, ae e na o le tupu lava o Isaraelu.”
31 Ina ua iloa atu Iosefatu e alii e pule i kariota, ona latou faapea ifo lea iā i latou: “O le tupu lea o Isaraelu.” Ona latou faasaga ane lea e tau ma ia; ma ua alaga atu foʻi Iosefatu mo se fesoasoani,+ ona fesoasoani mai lea o Ieova iā te ia, ma ua tataʻi ese e le Atua i latou mai iā te ia.
32 Ina ua iloa e alii e pule i kariota e lē o le tupu lea o Isaraelu, ona latou toe foʻi loa lea, ua lē toe mulimuli atu iā te ia.
33 Sa lolo‘u e le tasi tagata ma lona lē iloa le ʻaufana, ae ua lavea ai le tupu o Isaraelu i le sooga o lona ofutau, ona ia fai atu lea i lē o loo aveina lana kariota: “Inā liliu ia ma aveese aʻu mai i le taua,* auā ua ou manu‘a leaga lava.”+
34 Ua faateteleina pea le taua i lenā aso, ma ua faatū e nisi le tupu o Isaraelu i totonu o le kariota e feagai ma tagata Suria seʻia oo i le afiafi; ona oti ai lea o ia ina ua goto le lā.+
Faamatalaga Pito i Lalo
^ Po o le “tauanau.”
^ Po o “se agelu.”
^ Epe., “O fea na ui ane ai le agaga o Ieova i oʻu luma.”
^ Epe., “togālauapi.”
