O le Tusi Lona Lua o Nofoaiga a Tupu 16:1-14
16 I le tausaga lona 36 o le nofoaiga a Asa, na alu aʻe ai Paasa+ le tupu o Isaraelu e tau ma Iuta, ma ia fausia* Rama,+ ina ia leai se tasi e mafai ona alu i fafo pe sau i totonu iā* Asa le tupu o Iuta.+
2 Ona aumaia lea e Asa o siliva ma auro mai i potu teuoloa o le fale o Ieova+ ma le fale o le tupu, ma aauina atu iā Peniata le tupu o Suria,+ o lē na nofo i Tamaseko, ua faapea atu:
3 “O loo iai se maliega* i lo ta vā, ma le vā o loʻu tamā ma lou tamā. O lenei ua ou avatu iā te oe siliva ma auro. Inā maliu mai ia e tatala la oulua maliega* ma Paasa le tupu o Isaraelu, ina ia alu ese ai o ia mai iā te aʻu.”
4 Ona faalogo lea o Peniata i le tupu o Asa, ua ia aauina atu foʻi taʻitaʻi o ana ʻautau e faasagatau i aai o Isaraelu, ma ua latou faato‘ilalo Iono,+ o Tanu,+ o Apela-maima, ma nofoaga uma e teu ai oloa i aai o Nafatali.+
5 Ina ua faalogo i ai Paasa, ona ia tuua loa lea o le fausiaina* o Rama ma taofi lana galuega.
6 Ae ua ave e le tupu o Asa o Iuta uma, ma ua latou ave maa ma laupapa na fausia+ ai Rama+ e Paasa, ma ua faaaogā e Asa nei mea e fausia* ai Kepa+ ma Mesepa.+
7 O le taimi lea na alu atu ai Hanani+ le tagata e iloa faaaliga iā Asa le tupu o Iuta, ma faapea atu iā te ia: “Talu ai ua e faalagolago i le tupu o Suria ae e lē faalagolago iā Ieova lou Atua, o le mea lea, ua sosola ese ai mai i lou lima le ʻautau a le tupu o Suria.+
8 Pe e lē matuā toʻatele ea le ʻautau a Aitiope ma Lipua, o ē na iai kariota ma tagata tiʻetiʻe solofanua? Ae ona o lou faalagolago iā Ieova, na ia tuuina mai ai i latou i lou lima.+
9 Auā e silasila solo fofoga o Ieova i le lalolagi uma,+ ina ia faaali atu lona malosi iā i latou e atoatoa* o latou loto iā te ia.+ Ua e gaoioi ma le valea i lenei mea, o lea, e amata atu nei ona iai taua iā te oe.”+
10 Ae ua ita Asa i le tagata e iloa faaaliga, ma tuu o ia i le falepuipui, talu ai ua ita Asa iā te ia ona o lenei mea. Ua matuā faasauā foʻi Asa i nisi o le nuu i lenā lava taimi.
11 A o le olaga uma o Asa, e mai i le amataga seʻia oo i le faaiʻuga, ua tusia ia i le Tusi o Tupu o Iuta ma Isaraelu.+
12 O le tausaga lona 39 o le nofoaiga a Asa, na maʻi ai o ia i ona vae ma ua oo ina tigāina; e leʻi saʻili atu o ia iā Ieova i le taimi o lona maʻi, ae ua saʻili atu i ē e faia faamālōlōga.
13 Ona taoto lea o Asa faatasi ma ona augātamā;+ ua oti o ia i le tausaga lona 41 o lana nofoaiga.
14 Ua latou tanu o ia i lona tuugamau matagofie na ia eliina mo ia lava i le Aai a Tavita,+ ma ua latou faataoto o ia i se moega ua lilofia i le suāuu pasama, ma uu manogi eseese ua paluina i se suāuu faapitoa.+ Ua latou faia foʻi se falelauasiga e sili atu ona telē e susunu ai mea manogi mo ia.
Faamatalaga Pito i Lalo
^ Po o le “toe fausia.”
^ Po o le “ona tuua pe ulufale i vaipanoa o.”
^ Po o “se feagaiga.”
^ Po o le “feagaiga.”
^ Po o le “toe fausiaina.”
^ Po o le “toe fausia.”
^ Po o le “e tuutoina atu atoatoa.”
