O le Tusi Lona Lua i le Faapotopotoga i Korinito 8:1-24
8 O lenei le ʻauuso e, e matou te faailoa atu iā te outou e uiga i le agalelei faifua o le Atua lea na foaʻiina mai i faapotopotoga i Maketonia.+
2 A o mafatia i latou ona o se tofotofoga tigā, sa latou foaʻi ma le olioli tele e ui i lo latou matuā matitiva, ma ua faaalia ai le tele o lo latou limafoaʻi.
3 Auā na latou faia e tusa ai ma mea na latou mafaia,+ e moni ou te taʻutino atu, na faia e sili atu nai lo o mea na latou mafaia,+
4 o lo latou lava lotomalilie, na matuā ʻaiʻoi mai ai iā i matou mo le faaeaga e foaʻi atu ai ma le agalelei, ina ia faia se sao i le faiva o le foaʻi atu i le ʻaupaia.+
5 Na latou faia e lē na o mea na matou faamoemoe i ai, ae ona o le finagalo o le Atua, na muaʻi tuuina atu ai i latou lava i le Alii ma i matou foʻi.
6 O le mea lea ua matou faalaeiau ai iā Tito+ e faapea, o ia na muamua ona amataina lenei foaʻi mai iā te outou, o lea e tatau ai ona ia faamāeʻaina lenei foaʻi ua outou faia ma le agalelei.
7 Ae e pei ona matuā tele mea uma iā te outou i le faatuatua, ma le upu, ma le poto, ma le lotonaunau, faapea lo matou alofa iā te outou, ia faapea foʻi ona matuā tele a outou foaʻi e faia ma le agalelei.+
8 E lē faapea ua ou faatonuina outou, ae ua ou tautala atu ina ia outou iloa ai le lotonaunau o isi, ma ina ia tofotofoina ai foʻi le moni o lo outou alofa.
9 Auā ua outou iloa le agalelei faifua o lo tatou Alii o Iesu Keriso, e ui na mauʻoa o ia, ae na faamativaina o ia ona o outou,+ ina ia outou mauʻoa ai ona o lona mativa.
10 O lea, ou te faailoa atu ai loʻu manatu:+ E aogā lea iā te outou, auā ua mavae le tausaga talu ona outou amataina lenei gaoioiga, ae na faaalia ai foʻi lo outou faanaunauga ina ia fai.
11 O le mea lea ia outou faauma ai le mea na outou amataina, e pei ona outou lotomalilie e fai, ia faapena foʻi ona faauma e tusa ai ma mea ua iā te outou.
12 Auā afai e lotomalie se tasi e foaʻi atu, e talileleia lea e tusa ma mea ua iā te ia,+ ae e lē tusa ma mea e lē o iā te ia.
13 Auā ou te lē o manaʻo e faafaigofie mo isi, ae faafaigatā mo outou;
14 ae ina ia avea lo outou tamaoaiga* i le taimi nei e fesoasoani i lo latou lē tagolima, ma e fesoasoani foʻi lo latou tamaoaiga i lo outou lē tagolima i se aso, ina ia tutusa ai avega a tagata uma.
15 E pei ona tusia: “Ina ia lē tele naʻuā mea a lē e tele ana mea, ma ina ia lē matuā itiiti foʻi mea a lē e itiiti ana mea.”+
16 O lea e faafetai ai i le Atua, ona o le tuuina o lea lava naunau mo outou i le loto o Tito,+
17 auā sa talia e ia faalaeiauga, ae o lona naunau tele, ua alu atu ai o ia iā te outou i lona lava lotomalie.
18 Ae ua matou aauina atu faatasi ma ia le uso ua aave tala o lona taʻuleleia i faapotopotoga uma, ona o lana galuega ua faia mo le tala lelei.
19 E lē na o lenā, ae ua tofia foʻi o ia e faapotopotoga e malaga faatasi ma i matou, a o matou tufatufaina atu lenei meaalofa ua faia ma le agalelei mo le viiga o le Alii, ma faamaonia ai lo matou nofosauni e fesoasoani.
20 Ua matou faia lenei mea ina neʻi faitio mai se tagata iā i matou, e tusa ai ma lo matou tufatufaina atu o lenei meaalofa ua faia ma le matamau.+
21 Auā ua matou ‘vaavaaia mea uma lava ma le faamaoni, e lē gata i le silafaga a Ieova,* ae i le vaaiga foʻi a tagata.’+
22 O lea ua matou aauina atu ai faatasi ma i latou lo matou uso, o lē e masani ona matou tofotofoina ma vaaia lona lotonaunau i le tele o mea, a o lenei ua faateleina lona lotonaunau ona o lona matuā faatuatuaina o outou.
23 Ae afai e fesili se tasi e faatatau iā Tito, o ia o laʻu aumea ma o sē e ma te galulue faatasi mo lo outou lelei; pe afai foʻi e fesili nisi e faatatau i o tatou uso, o i latou o aposetolo* i faapotopotoga, ma o le mamalu o Keriso.
24 O lea, ia faailoa atu iā i latou le faamaoniga o lo outou alofa,+ ma faailoa atu i faapotopotoga māfuaaga ua matou mitamita ai iā te outou.
Faamatalaga Pito i Lalo
^ Po o le “ia foaʻi atu mai i a outou mea faasili.”
^ Po o “avefeʻau; o ē na aauina atu.”
