O le Tusi Muamua o Tupu 2:1-46
2 Ua oo ina latalata i le aso e oti ai Tavita; ona ia poloaʻi atu lea i lona atalii o Solomona, e faapea:
2 “O le a ou oti,* ae ia e faamalosi+ ma ia e faatamatane.+
3 Ia e usiusitaʻi iā Ieova lou Atua e ala i lou savali i ona ala, i le tausia o ana tulafono, o ana poloaʻiga, o iʻuga o ana faamasinoga, ma ana faamanatuga, e pei ona tusia i le Tulafono a Mose;+ ona e taulau manuia lea* i mea uma e te faia ma mea uma e te alu atu i ai.
4 Ona faataunuuina lea e Ieova lana folafolaga na ia fetalai ai e faatatau iā te aʻu, e faapea, ‘Afai e faaeteete lau fanau i le auala e ola ai e ala i le savavali ma le faamaoni i o‘u luma, ma o latou lotoatoa ma le malosi atoa,+ e lē motu lou gafa mai i le nofoālii o Isaraelu.’+
5 “Ua e iloa lelei foʻi le mea na faia e Ioapo le tama a Seruia iā te aʻu, i le mea na ia faia i taʻitaʻiʻau e toʻalua a Isaraelu, o Apineru+ le atalii o Neru ma Amase+ le atalii o Ietero. Na ia fasiotia+ i la‘ua i le taimi e lē o iai se taua, ma tuu ai le toto o le taua i lona fusipaʻu sa i lona puimanava, ma ona seevae sa i ona vae.
6 Ia e faia e tusa ma lou atamai, ma aua neʻi tuuina lona ulusinā e alu ifo ma le filemu i le Tuugamau.*+
7 “Ae ia e alofa faamaoni i atalii o Pasili+ le tagata Kiliata, ia iai foʻi i latou faatasi ma ē e aai i lau laoai; auā na faapena foʻi ona latou fesoasoani mai iā te aʻu,+ a o oʻu sola ese mai iā Apisaloma lou uso.+
8 “O loo nofo latalata mai fo‘i iā te oe Semi le atalii o Kera le Peniamina mai i Pauri. O ia na fetuuina aʻu i se fetuu e tigā ai,+ i le aso na ou alu atu ai i Maanaima;+ ae ina ua alu ifo e faafetaiaʻi aʻu i Ioritana, na ou tautō iā te ia i le suafa o Ieova, e faapea, ‘Ou te lē fasiotia oe i le pelu.’+
9 O lenei, aua neʻi lē faasalaina o ia,+ auā o oe o le tagata atamai ma ua e iloa lelei le mea e tatau ona e faia iā te ia, ia e tuuina ifo lona ulusinā i le Tuugamau* ma le toto.”+
10 Ona taoto lea o Tavita faatasi ma ona augātamā, ua tanu foʻi o ia i le Aai a Tavita.+
11 O le umi* na pule ai Tavita i Isaraelu, e 40 tausaga. Na pule o ia i Heperona+ i tausaga e 7, ma e 33 tausaga na ia pule ai i Ierusalema.+
12 Ua nofo Solomona i le nofoālii o Tavita lona tamā; ma ua oo ina matuā faatumauina lona malo.+
13 Mulimuli ane, ua alu atu Atonia le tama a Akita iā Patesepa, le tinā o Solomona. Ona fai mai lea o Patesepa: “Po ua e sau ea ma le filemu?” Ua tali atu o ia: “Ua ou sau ma le filemu.”
14 Ua ia fai atu foʻi: “O loo iai se mea ou te fia talanoa atu ai iā te oe.” Ona fai mai lea o Patesepa: “Inā taʻu mai ia.”
15 Ona ia toe faapea atu lea: “Ua e iloa lelei lava na semanū e fai le malo mo aʻu, ma na faatalitalia uma e Isaraelu o le a avea a‘u ma tupu;+ ae ua avea le malo mo loʻu uso, auā ua finagalo Ieova e fai mo ia.+
16 O lenei, e tasi lava le mea ou te talosaga atu ai iā te oe. Aua neʻi e liliuese mai iā te aʻu.” Ona faapea mai lea o Patesepa: “Inā fai mai ia.”
17 Ua ia fai atu: “Faamolemole, ia fai atu iā Solomona le tupu ina ia tuuina mai iā te aʻu, o Apiseka+ le Sunema e fai ma aʻu avā. Ou te iloa e lē liliuese o ia mai iā te oe.”
18 Ona fai mai lea o Patesepa: “Ua lelei! O le a ou talanoa i le tupu mo oe.”
19 Ua alu atu Patesepa i le tupu o Solomona e talanoa iā te ia mo Atonia. Ua tulaʻi le tupu e faafetaiaʻi iā te ia, ma ifo mai iā te ia. Ona nofo lea o ia i lona nofoālii, ua fai ane foʻi e aumai se nofoa mo le tinā o le tupu, ina ia nofo ai i lona itu taumatau.
20 Ona fai atu lea o ia: “E tasi lava si mea lea ou te talosaga atu ai iā te oe. Aua neʻi e liliuese mai iā te aʻu.” Ona fai mai lea o le tupu iā te ia: “Inā fai mai ia loʻu tinā e; auā ou te lē liliuese mai iā te oe.”
21 Ua ia faapea atu: “Ia avatu Apiseka le Sunema, e fai ma avā a Atonia lou uso.”
22 Ona tali mai lea o le tupu o Solomona i lona tinā: “Aiseā ua e talosaga mai ai mo Apiseka le Sunema e ave mo Atonia? Na sili ai foʻi ona e talosaga mai e ave le malo mo ia+ auā o ia o loʻu uso matua,+ ma o loo lagolagoina o ia e Aviata le ositaulaga, ma Ioapo+ le tama a Seruia.”+
23 Ona tautō ai lea o le tupu o Solomona iā Ieova, ua faapea mai: “Ia matuā faasala a‘u e le Atua,* pe afai e lē oti Atonia ona ua talosaga mai i lenei mea.
24 O lenei, o loo soifua Ieova o lē na ia matuā faatumauina aʻu+ ma faanofoina aʻu i le nofoālii o Tavita loʻu tamā, ma o lē na faia se aiga mo aʻu+ e pei lava ona ia folafolaina mai, o le asō e fasiotia ai lava Atonia.”+
25 Ona auina atu lea e le tupu o Solomona o Penaia+ le atalii o Ioiata; ua ia fasi iā Atonia, ma ua oti ai.
26 Ua fai atu le tupu iā Aviata+ le ositaulaga: “Inā alu ia i Anatota+ i ou fanua! Auā ua tatau ona e oti; ae ou te lē faaoo le oti iā te oe i le asō, auā na e ave le Atolaau a le Alii Pule Silisili Ese o Ieova i luma o Tavita loʻu tamā,+ ma sa e tigā foʻi i le taimi atoa na tigā ai loʻu tamā.”+
27 Ona tuliesea lea e Solomona o Aviata mai i le avea ma ositaulaga a Ieova, ina ia taunuu ai le afioga a Ieova faasaga i le aiga o Eli+ i Sailo.+
28 Ina ua oo atu le tala iā Ioapo, auā na lagolagoina e Ioapo ia Atonia,+ ae e na te leʻi lagolagoina Apisaloma,+ ona sola lea o Ioapo i le faleʻie o Ieova,+ ma ua taofimau i nifo o le fata faitaulaga.
29 Ua taʻu atu le tala i le tupu o Solomona: “Ua sola Ioapo i le faleʻie o Ieova, ma o loo iai o ia i tafatafa o le fata faitaulaga.” Ona auina atu lea e Solomona o Penaia le atalii o Ioiata, ua faapea atu: “Inā alu ia ma fasi iā te ia!”
30 Ona alu atu ai lea o Penaia i le faleʻie o Ieova, ma faapea atu iā Ioapo: “O le mea lenei ua fetalai mai ai le tupu, ‘Ia e sau i fafo!’” Ae ua fai mai o ia: “E leai! Ou te oti lava i inei.” Ona alu lea o Penaia ma taʻu atu nei upu i le tupu, ua faapea atu: “O le tala lenei a Ioapo, ma na faapea ona tali mai o ia iā te aʻu.”
31 Ona fai mai lea o le tupu iā te ia: “Ia e faia e pei ona fai mai ai o ia; ia fasi iā te ia ma tanu o ia, ona aveesea ai lea mai iā te aʻu ma le aiga o loʻu tamā, o le toto na faamaligi fua e Ioapo.+
32 E taui atu lava e Ieova lona toto i lona ulu, auā na ia fasia tagata e toʻalua e sili atu le amiotonu ma lelei nai lo o ia, na ia fasiotia i laʻua i le pelu ae e leʻi iloa e loʻu tamā o Tavita, o Apineru+ le atalii o Neru le taʻitaʻiʻau o Isaraelu,+ ma Amase+ le atalii o Ietero le taʻitaʻiʻau o Iuta.+
33 Ia taui atu o la toto i le ulu o Ioapo ma lana fanau e faavavau;+ ae ia iai le filemu mai iā Ieova e faavavau iā Tavita ma lana fanau, ma lona aiga, atoa ma lona nofoālii.”
34 Ona alu aʻe lea o Penaia le atalii o Ioiata, ua fasi iā Ioapo ma oti ai, ma ua tanu o ia i lona fale i le toafa.*
35 Ona tofia lea e le tupu o Penaia+ le atalii o Ioiata, e taʻitaʻia le ʻautau e sui ai Ioapo; ae ua tofia e le tupu o Satoka+ le ositaulaga, e sui ai Aviata.
36 Ona aami lea o Semi+ e le tupu, ma faapea atu iā te ia: “Ia e faia se fale mo oe i Ierusalema ma e nofo ai i inā, ma aua neʻi e alu ese mai i inā ma e alu atu i se isi mea.
37 O le aso e te alu ese ai ma e sopoʻia le vanu o Ketarono,+ ia e iloa lelei e te oti ai lava. E i luga o lou ulu lou lava toto.”
38 Ua tali mai Semi i le tupu: “Ua lelei au upu. O le a faia e lau auauna e pei ona fetalai mai ai loʻu alii le tupu.” Na nofo pea Semi i Ierusalema mo aso e tele.
39 Ae ina ua mavae tausaga e tolu, ona sosola atu lea o pologa e toʻalua a Semi iā Akisa+ le atalii o Maaka, le tupu o Kata. Ina ua taʻu mai iā Semi e faapea: “Faauta! O loo iai au pologa i Kata,”
40 ona tulaʻi faavave lea o Semi, ua faanofoa lana asini ma ua alu atu i Kata iā Akisa e saʻili ana pologa. Ina ua toe fo‘i mai Semi ma ana pologa mai i Kata,
41 ona taʻu mai lea iā Solomona e faapea: “Na alu ese Semi mai i Ierusalema e agaʻi atu i Kata, ma ua toe foʻi mai.”
42 Ona aami lea o Semi e le tupu o Solomona, ua faapea atu iā te ia: “Po ou te leʻi fai atu ea iā te oe ia e tautō mai i le suafa o Ieova, ma ou lapataʻia oe, ‘O le aso e te alu ese ai ma e alu atu i se isi mea, ia e iloa lelei e te oti ai lava’? Pe e te leʻi fai mai foʻi iā te aʻu, ‘Ua lelei lau upu ma o le a ou usita‘i i ai’?+
43 Aiseā la e te leʻi tausia ai lau tautoga na faia iā Ieova, ma le poloaʻiga na ou fai atu ai iā te oe?”
44 Ua fai atu le tupu iā Semi: “Ua e iloa i lou loto mea leaga uma na e faia i loʻu tamā o Tavita;+ e toe taui atu foʻi e Ieova i lou lava ulu o mea leaga na e faia.+
45 Ae e manuia le tupu o Solomona,+ e matuā faatumauina foʻi le nofoālii o Tavita i luma o Ieova e faavavau.”
46 Ona poloaʻi atu lea o le tupu iā Penaia le atalii o Ioiata, ua alu atu o ia i fafo ma fasi iā Semi, ma ua oti ai o ia.+
Ua matuā faatumauina le malo i lima o Solomona.+
Faamatalaga Pito i Lalo
^ Epe., “O le a ou alu i le ala o le lalolagi uma.”
^ Po o “ona e gaoioi ai lea ma le faautauta.”
^ Po o “Seoli.” Tagaʻi i le Uiga o Upu.
^ Po o “Seoli.” Tagaʻi i le Uiga o Upu.
^ Epe., “O aso.”
^ Epe., “Ia faia e le Atua iā te aʻu ma ia faaopoopo i ai.”
^ Tagaʻi i le Uiga o Upu.
