O le Tusi Muamua o Samuelu 28:1-25
-
Alu atu Saulo i sē e saʻili i agaga i Enetoro (1-25)
28 Ua faapotopoto faatasi e Filisitia a latou ʻautau e siitaua iā Isaraelu+ i na aso. Ona fai mai lea o Akisa iā Tavita: “Ua e iloa lava e ta te ō i le taua, o oe atoa ma ou tagata.”+
2 Ua fai atu Tavita iā Akisa: “Ua e iloa lelei le mea o le a fai e lau auauna.” Ona fai mai lea o Akisa iā Tavita: “O le mea lea ua ou filifilia ai oe e puipuia aʻu i aso uma.”*+
3 Ua maliu Samuelu, ma ua taufaitagitu‘i Isaraelu uma ona o ia, ua latou tanu foʻi iā te ia i Rama i lona aai.+ Ae ua aveese e Saulo mai i le nuu, o ē e saʻili i agaga ma ē e vavalo.+
4 Ua faapotopoto faatasi Filisitia, ma ua ō atu ma tolauapi i Sunema.+ Ona faapotopotoina lea e Saulo o Isaraelu uma ma tolauapi i Kilepoa.+
5 Ina ua iloa atu e Saulo le ʻautau a Filisitia, ona fefe ai lea o ia ma ua matuā gatete lona loto.+
6 E ui lava sa fesili atu Saulo iā Ieova,+ ae e leʻi tali mai lava Ieova iā te ia e ala i se miti, po o le Urima,+ po o perofeta.
7 Mulimuli ane, ua fai mai Saulo i ana auauna: “Ia saʻili mai mo aʻu se fafine e saʻili i agaga,+ ma ou te alu atu e fesili iā te ia.” Ona fai atu lea o ana auauna: “Faauta! O loo iai i Enetoro+ se fafine e saʻili i agaga.”
8 Ua faafoliga atu e Saulo o ia o se tagata ese, ua ofu i ofu ese, ma ua ō faatasi ma tagata e toʻalua; ua latou ō atu i le fafine i le pō. Ona ia fai atu lea: “Faamolemole, inā vavalo ia mo aʻu ma saʻili i agaga,+ ia e ave aʻe foʻi le tagata lea o le a ou fai atu ai iā te oe.”
9 Peitaʻi, ua fai mai le fafine iā te ia: “Ua e iloa lelei lava le mea na faia e Saulo, na ia aveesea mai i le nuu o ē e saʻili i agaga, ma ē e vavalo.+ Aiseā foʻi ua e taumafai ai e maileia aʻu ina ia ou oti ai?”+
10 Ona tautō atu lea o Saulo iā te ia i le suafa o Ieova, ua faapea atu: “Ou te tautō iā Ieova le Atua soifua, e lē oo lava se faasalaga iā te oe ona o lenei mea!”
11 Ua fesili mai le fafine: “O ai ou te ave aʻe mo oe?” Ona ia tali atu lea: “Ia ave aʻe mo aʻu Samuelu.”
12 Ina ua vaai le fafine iā “Samuelu,”*+ ona ia alaga leotele lea ma faapea ane iā Saulo: “Aiseā ua e faaseeina ai aʻu, a o oe lava o Saulo?”
13 Ae ua fai atu le tupu iā te ia: “Aua e te fefe, o le ā le mea o loo e vaaia?” Ua fai mai le fafine iā Saulo: “O loo ou vaaia sē e pei o se atua o alu aʻe mai i le eleele.”
14 Ua ia fesili atu i le fafine: “E faapeʻī ona foliga?” Ae ua tali mai o ia: “O loo alu aʻe se toeaina o loo fai lona ofu talaloa.”+ Ua iloa e Saulo o “Samuelu” lea, ona punou lea o ia i le eleele ma ifo.
15 Ua fai mai “Samuelu” iā Saulo: “Aiseā ua e faalavelave mai ai iā te aʻu i le ave aʻe o aʻu?” Ona fai atu lea o Saulo: “Ua ou matuā puapuagatia, ua siitaua mai Filisitia iā te aʻu, ma ua afio ese le Atua mai iā te aʻu, ua lē toe tali mai foʻi e ala i perofeta po o ni miti;+ o lea ua ou valaau atu ai iā te oe ina ia e faailoa mai le mea ou te faia.”+
16 Ona fai mai lea o “Samuelu”: “Aiseā ua e fesili mai ai iā te aʻu, ae ua afio ese Ieova mai iā te oe+ ma ua fai o ia ma ou fili?
17 E faia lava e Ieova mo ia e pei ona ia fetalai mai ai iā te aʻu: E saeeseina e Ieova le malo mai i ou lima, ma avatu i lou uso a tagata o Tavita.+
18 Auā ua e lē usitaʻi i le siʻufofoga o Ieova, e te leʻi faaoo foʻi lona toʻasā i tagata Amaleka,+ o le mea lea ua faia ai e Ieova lenei mea iā te oe i le asō.
19 E tuuina atu foʻi e Ieova Isaraelu faapea ma oe i lima o Filisitia,+ ma o taeao e tatou te faatasi ai, o oe+ ma ou atalii.*+ E tuuina atu foʻi e Ieova le ʻautau a Isaraelu i lima o Filisitia.”+
20 Ona faapaʻū ifo loa lea o Saulo ma taatia faasasaʻo i le eleele, ua matuā fefe lava ona o upu a “Samuelu.” Ua leai foʻi se malosi iā te ia, auā ua alu le aso ma le pō atoa e leʻi ʻai o ia.
21 Ina ua sau le fafine iā Saulo ma vaaia o ia ua matuā atuatuvale lava, ona ia fai mai lea iā Saulo: “Na usita‘i lau auauna i le mea na e fai mai ai, ma na ou tuu foʻi loʻu ola+ i se tulaga lamatia ma faia le mea na e fetalai mai ai.
22 O lenei, inā faalogo mai ia i upu a lau auauna; seʻi oʻu laulauina atu mo oe sina mea taumafa e te taumafa ai, ina ia e malosi ai ma e maliu atu i lou ala.”
23 Ae ua musu o ia ma faapea atu: “Ou te lē ʻai.” Peitaʻi, ua faatauanau atu pea iā te ia o ana auauna ma le fafine. Mulimuli ane, ona ia faalogo lea i a latou upu, ua tulaʻi mai i le eleele ma nofo i le moega.
24 Na iai le tamaʻi povi peti a le fafine i totonu o le fale. Ona ia fasi faavave lea,* ua ia ave le falaoamata ma palu, ma tao ai falaoa e lē faafefeteina.
25 Ua ia laulau atu iā Saulo ma ana auauna, ma ua latou aai ai. Mulimuli ane, ua tulaʻi i latou ma ō ese i lenā pō.+
Faamatalaga Pito i Lalo
^ Epe., “e leoleo i loʻu ulu i aso uma.”
^ O loo faaalia i lenei tala manatu o le faataulāitu, o lē na faasesēina e le temoni lea na faafoliga mai o Samuelu.
^ E faasino atu i le oo o le oti iā i latou e pei foʻi o Samuelu.
^ Po o le “fai faavave ai lea o le taulaga.”
