O le Tusi Muamua o Samuelu 20:1-42
-
Faamaoni o Ionatana iā Tavita (1-42)
20 Ona sola ese ai lea o Tavita mai i Naiota i Rama. Ae ua sau o ia ma fai atu iā Ionatana: “O le ā se mea ua ou faia?+ O le ā soʻu sesē, ma o le ā foʻi sa‘u agasala i lou tamā, ua saʻili ai o ia e fasiotia aʻu?”
2 Ua fai mai Ionatana iā te ia: “Ia mamao lenei mea!+ E te lē oti. Faauta! E lē faia e loʻu tamā se mea telē po o se mea itiiti ae e lē taʻu maia iā te a‘u. Aiseā foʻi e nanā ai e loʻu tamā lenei mea mai iā te aʻu? E lē tupu lenei mea.”
3 Ae ua toe faapea atu Tavita: “Ua iloa lelei e lou tamā e te fiafia iā te aʻu,+ ma ua faapea ifo iā te ia lava, ‘Aua le faailoaina atu iā Ionatana lenei mea ina neʻi tigā ai lona loto.’ Ae ou te tautō iā Ieova le Atua soifua faapea ma oe, e lē o toe mamao ona ou oti lea!”+
4 Ona fai mai lea o Ionatana iā Tavita: “O so o se mea lava e te fai mai ai, ou te faia lava mo oe.”
5 Ae ua fai atu Tavita iā Ionatana: “O taeao le masina faatoʻā vaaia,+ e mautinoa e faatalitalia aʻu e aai ma le tupu; ia e auina ese atu aʻu ou te lafi i le fanua seʻia oo i le afiafi o le aso lona tolu.
6 Afai e misia e lou tamā aʻu, ona e fai atu lea, ‘Na faanoi mai Tavita iā te aʻu seʻi alu atu vave i Peteleema+ lona aai, auā o loo fai ai se taulaga i tausaga taʻitasi mo le aiga uma.’+
7 Afai e faapea mai o ia, ‘Ua lelei!’ o lona uiga la e leai se mea e popole ai lau auauna. Ae afai e ita o ia, ona e iloa lea ua maumaua‘i o ia e faia se mea leaga iā te a‘u.
8 Ia e alofa faamaoni foʻi i lau auauna,+ auā na e osia ma lau auauna se feagaiga i luma o Ieova.+ Ae afai ua iai se mea ua ou sesē ai,+ ia e fasiotia aʻu, aiseā foʻi e te avatu ai aʻu i lou tamā?”
9 Ona fai mai lea o Ionatana: “Ia mamao lenā mea mai iā te oe! Ae afai ou te iloa e iai se mea leaga ua maumauaʻi loʻu tamā e faia iā te oe, po ou te lē taʻuina atu ea iā te oe?”+
10 Ua fai atu Tavita iā Ionatana: “O ai na te taʻuina mai iā te aʻu pe a tali mai ma le ita lou tamā iā te oe?”
11 Ua fai mai Ionatana iā Tavita: “Sau ia ta ō atu i le fanua.” Ona la ō ai lea i le fanua.
12 Ua fai mai Ionatana iā Tavita: “Ia fai Ieova le Atua o Isaraelu ma molimau, o taeao ou te tofotofo ai i loʻu tamā i le taimi faapenei, po o le aso lona tolu. Afai e fiafia o ia iā te oe,* po ou te lē auina atu ea se tasi iā te oe ma taʻu atu iā te oe?
13 Ia matuā faasalaina aʻu e Ieova,* pe afai ua manatu loʻu tamā e fai se mea leaga iā te oe, ae ou te lē faailoaina atu ma auina ese atu oe ma le filemu. Tau ina ia faatasi Ieova ma oe,+ e pei ona sa ia faatasi ma loʻu tamā.+
14 Pe e te lē faaalia mai ea iā te aʻu le alofa faamaoni o Ieova a o oʻu ola pea, ma e tusa foʻi pe a ou oti?+
15 Aua foʻi neʻi tuua lou alofa faamaoni i loʻu aiga+ i aso uma lava, e tusa pe e tafiesea e Ieova fili uma o Tavita mai i le laueleele.”
16 Ona osia lea e Ionatana se feagaiga ma le aiga o Tavita e faapea: “O le a faasalaina e Ieova fili o Tavita.”
17 Ona toe faatautō lea e Ionatana o Tavita ona o lona alofa iā te ia; auā ua ia alofa iā te ia e pei o ia lava.+
18 Ua fai mai Ionatana iā te ia: “O taeao le masina faatoʻā vaaia,+ ma o le a misia lava oe auā o le a lē nofoia lou nofoa.
19 O le a sili atu ona misia oe i le aso lona tolu; ae ia e sau i inei i le mea na e lafi ai i le isi aso,* ma ia e nofo e latalata i le maa lenei.
20 A o aʻu, ou te fanaina atu ni aū se tolu i le isi itu o le maa, e peiseaʻī o loo oʻu fanaina se mea.
21 Pe a ou auina atu le auauna, ou te faapea atu, ‘Alu e saʻili aū.’ Afai ou te fai atu i le auauna, ‘Vaai! O loo i ou tala mai aū, ia e tago i ai,’ ona e sau lea auā ou te tautō iā Ieova le Atua soifua, ua e maua le filemu ma e leai se mea e tupu.
22 Ae afai ou te fai atu i le tauleʻaleʻa, ‘Vaai! O loo iai aū i tala atu o oe,’ ona e alu lea auā ua auina ese atu oe e Ieova.
23 Tau ina ia avea Ieova ma molimau i aso uma lava i le tautoga ua ta faia.”+
24 Ua lafi Tavita i le fanua. Ua oo i le masina faatoʻā vaaia, ona nofo lea o le tupu e fai lana taumafataga.+
25 Ua nofo le tupu i lona nofoa masani i tafatafa o le puipui, ma o loo faafesagaʻi ma Ionatana, a o Apineru+ o loo nofo i tafatafa o Saulo; ae ua lē nofoia le nofoa o Tavita.
26 E leʻi fai mai e Saulo se upu i lenā aso, auā ua ia faapea ifo: ‘Ai ua tupu se mea ua lē mamā ai o ia.+ Atonu lava e lē o mamā o ia.’
27 Ua aulia le isi aso o le masina faatoʻā vaaia, o le aso lona lua lea, ae ua lē nofoia lava le nofoa o Tavita. Ona fai mai lea o Saulo i lona atalii o Ionatana: “Aiseā ua lē sau ai le atalii o Iese+ ananafi ma le asō i le taumafataga?”
28 Ua tali atu Ionatana iā Saulo: “Na matuā ʻaiʻoi mai Tavita iā te aʻu mo se faatagaga seʻi alu ai i Peteleema.+
29 Ua ia fai mai, ‘Faamolemole, seʻi tuu mai aʻu ou te alu auā o loo fai le taulaga a lo matou aiga i le aai, ma o loo poloaʻi mai foʻi loʻu uso ou te alu atu. O lenei, afai e lelei iā te oe, faamolemole ia tuu mai aʻu seʻi oʻu alu e vaai oʻu uso.’ O le mea lea, ua lē sau ai o ia i le laoai a le tupu.”
30 Ona matuā ita ai lea o Saulo iā Ionatana ma faapea atu iā te ia: “O oe na le tama a le fafine fouvale, po o lou manatu ea, ou te lē iloa o lou filifili e ʻau ma le atalii o Iese e faalumaina ai oe, ma faalumaina ai lou tinā?*
31 Auā o le umi lava e ola ai le atalii o Iese i le fogāeleele, o le lē faatumauina foʻi lenā o oe ma lou malo.+ O lenei, ia auina atu se tasi e aumai o ia iā te aʻu, auā e tatau ona oti o ia.”*+
32 Peitaʻi, ua tali atu Ionatana iā Saulo lona tamā e faapea: “Aiseā e fasiotia ai o ia?+ O le ā lana mea ua fai?”
33 Ona velo ai lea e Saulo o le tao ina ia lavea ai o ia;+ ua iloa foʻi e Ionatana ua maumauaʻi lona tamā ina ia fasiotia Tavita.+
34 Ona alu ese ai lea o Ionatana mai i le laulau, ua matuā ita lava, e leʻi ʻai foʻi e ia se meaʻai i le aso lona lua ina ua mavae le masina faatoʻā vaaia, talu ai ua tigā o ia ona o Tavita,+ ma ua faalumaina o ia e lona lava tamā.
35 Ua oo i le taeao, ona alu lea o Ionatana i le fanua i le mea na tuutala ai ma Tavita, sa faatasi foʻi ma ia se auauna talavou.+
36 Ua ia fai atu i lana auauna: “Faamolemole, ia momo‘e e saʻili aū ou te fanaina atu.” Ua tamoʻe le auauna, ona fana atu lea e Ionatana o aū i ona tala atu.
37 Ina ua oo atu le auauna i le mea na fana i ai e Ionatana le aū, ona valaau atu lea o Ionatana i le auauna e faapea: “Pe e lē o iai ea aū i tala atu o oe?”
38 Ua valaau atu Ionatana i le auauna: “Faatopetope! Ia vave lau gaoioi! Aua e te faatuai!” Ona ao lea e le auauna a Ionatana o aū ma toe sau i lona matai.
39 E leʻi iloa e le auauna le mea o loo tupu; e na o Ionatana ma Tavita ua la iloa le mea o loo tupu.
40 Ona tuu atu lea e Ionatana o ana auupega i le auauna, ma faapea atu: “Inā alu ia, ma ave mea na i le aai.”
41 Ina ua alu le auauna, ona tulaʻi lea o Tavita mai i se nofoaga e latalata ane i le itu i saute. Ona ia faapaʻū faō lea i le eleele ma ifo faatolu; ua la feasogi ma fetagisi, ua sili atu foʻi ona tagi Tavita.
42 Ona fai mai lea o Ionatana iā Tavita: “Alu ia ma le filemu auā ua uma ona ta tautō+ i le suafa o Ieova e faapea, ‘Tau ina ia avea Ieova ma molimau i lo ta vā, atoa foʻi ma laʻu fanau ma lau fanau i aso uma lava.’”+
Ona tulaʻi lea o Tavita ma alu i lona ala, ae ua alu atu Ionatana i le aai.
Faamatalaga Pito i Lalo
^ Epe., “Tavita.”
^ Epe., “Ia faia e Ieova iā Ionatana ma ia faaopoopo i ai.”
^ Epe., “i le aso e fai ai galuega.”
^ Epe., “ma faalumaina ai foʻi le lē lavalavā o lou tinā?”
^ Epe., “auā o ia o le atalii o le oti.”
