Alu i mataupu o loo iai

Alu i le lisi o mataupu

 MATAUPU AUTŪ | PE E MAFAI ONA TOETUTŪ MAI Ē UA MALILIU?

E Faapefea Ona Ē Mautinoa i le Faamoemoe mo Ē ua Maliliu?

E Faapefea Ona Ē Mautinoa i le Faamoemoe mo Ē ua Maliliu?

Po o se mea lē atamai le mafaufau o le a toetutū mai ē ua maliliu? E leʻi mafaufau faapena le aposetolo o Paulo. Sa faagaeeina o ia e tusi e faapea: “Afai e na o le olaga nei e tatou te faamoemoe ai iā Keriso, e sili la ona pagatia i tatou nai lo o tagata uma. Ae peitaʻi, o lenei ua toe faatūina Keriso mai i ē ua oti, o lē na muamua faatūina mai i ē ua oti.” (1 Korinito 15:19, 20) Sa mautinoa Paulo e faatatau i le toetū, auā sa faamaonia i le toetū o Iesu lava ia. * (Galuega 17:31) O le pogai lenā na faapea mai ai Paulo o Iesu “o lē na muamua,” auā o ia na muamua faatūina aʻe i le ola e faavavau. Pe afai sa muamua Iesu, o lona uiga la e iai foʻi isi e toetutū mai.

Na faapea atu Iopu i le Atua: “Ua e matuā naunau i le galuega a ou aao.”​—Iopu 14:14, 15

O le isi māfuaaga lenei e mafai ai ona e mautinoa i le faamoemoe o le toetū. O Ieova o le Atua faamaoni, ma “e lē mafai ona tala pepelo” o ia. (Tito 1:2) E leʻi tala pepelo lava le Atua, ma o le a lē taitai ona tala pepelo o ia. Po o le a ia folafola mai le faamoemoe o le toetū ma faaalia mai e mafai ona ia toe faatūina tagata, ae uma ane e na te lē faataunuuina lana folafolaga? E matuā lē mafai ona tupu lenā tulaga.

Aiseā ua faia ai e Ieova le faatulagaga mo le toetū i le lumanaʻi? E māfua ona o lona alofa. Na fesili Iopu: “Pe a oti le tagata, pe e toe ola mai ea o ia? E te valaau mai, ona ou tali atu ai lea iā te oe. Auā ua e matuā naunau i le galuega a ou aao.” (Iopu 14:14, 15) Sa mautinoa e Iopu e naunau lona Tamā i le lagi e toe faatū mai o ia. E lē o suia lava le finagalo o Ieova, auā ua taʻua i le Malaki 3:6: “O aʻu o Ieova; ou te lē liliu lava.” O loo faaauau ona matuā naunau Ieova e silasila atu ua toetutū mai ē ua maliliu, ma maua le ola lelei atoatoa ma le fiafia. E pei lava o ia o se matua alofa e moomoo e vaai atu ua toe ola mai sona alo ua maliu. E pau le eseesega, ona o loo iai iā Ieova le mana e faataunuu ai lona finagalo.​—Salamo 135:6.

O le oti o se faafitauli mataʻutia, ae ua saunia e le Atua se auala e foʻia atoatoa ai

 O le a tuu atu e Ieova le mana i lona Alo ina ia aumaia ai le olioli e lē gata mai, i ē ua faavauvau ona o le maliliu o ē e pele iā i latou. O ā ni faalogona o Iesu e faatatau i le toetū? A o leʻi toe faatūina Lasalo, sa silasila atu Iesu ua matuā mafatia tuafāfine ma uō a Lasalo, “ona tagi ai lea” o ia. (Ioane 11:35) I se tasi taimi, na feiloaʻi ai Iesu ma se fafine Naina ua oti lana tane, ae o lea foʻi ua oti atu lana tama e toʻatasi. Sa ʻtigā alofa Iesu i le fafine ma fetalai atu: “Aua e te tagi.”’ E leʻi umi ae toe faatūina e Iesu le tama a le fafine. (Luka 7:13) O lea, sa matuā ootia faalogona o Iesu ona o mafatiaga ma le oti. O le a matuā fiafia Iesu pe a ia liua le faanoanoa i le olioli i le lalolagi aoao.

Pe na iai se taimi na e mafatia ai? Atonu e te manatu o le oti o se faafitauli e lē mafai ona foʻia. Peitaʻi, e mafai ona foʻia e ala i le toetū lea o le a faataunuuina e le Atua e ala mai i lona Alo. Ia manatua e finagalo le Atua e te vaai atu ua foʻia lenā faafitauli. E finagalo o ia e te iai i lenā taimi e toe faafeiloaʻi ē e pele iā te oe. Seʻi faaāta i mafaufau le ola e faavavau faatasi ma i latou i le lumanaʻi, e aunoa ma le toe iai o se oti!

Ua faapea mai Lionel lea na taʻua muamua: “Sa mulimuli ane oʻu aʻoaʻoina e faatatau i le toetū. Sa faigatā ona ou talitonu i ai i le taimi muamua, ma ou te leʻi talitonuina le tagata na ia taʻuina mai lenei manatu iā te aʻu. Peitaʻi, sa ou suʻesuʻe i le Tusi Paia ma faamaonia ai e moni. O loo oʻu faatalitali ma le naunau i le taimi e toetū mai ai le tamā o si oʻu tinā.”

Pe e te fia iloa atili e faatatau i lenei mataupu? E fiafia Molimau a Ieova e faailoa atu mai i lau lava kopi o le Tusi Paia, māfuaaga ua latou talitonu ai i le toetū i le lumanaʻi. *

^ pala. 3 Mo nisi faamaoniga o le toetū o Iesu, tagaʻi i le tusi The Bible​—God’s Word or Man’s? itulau e 78-86, lomia e Molimau a Ieova.

^ pala. 9 Faamolemole tagaʻi i le mataupu e 7 o le tusi O ā Aʻoaʻoga Moni a le Tusi Paia? lomia e Molimau a Ieova.