Alu i mataupu o loo iai

Alu i le lisi o mataupu

Auala e Maua ai le Fiafia a o Faasolo Ina Matua

Auala e Maua ai le Fiafia a o Faasolo Ina Matua

O Ā NI ou faalogona pe a iloa ua faasolo ina e matua? O le toʻatele lava e popole ma oo ina atuatuvale, auā pe a faasolo ina matua, e masani lava ona iai ni aafiaga lē lelei, e pei o le foliga matua, lē atoa le malosi, galogalo mea, ma aafia i ni gasegase faaumiumi.

Peitaʻi, e eseese tulaga o tagata pe a faasolo ina matutua. O nisi e lelei lava lo latou soifua mālōlōina i le tino ma le mafaufau. O isi ua mafai ona togafiti pe pulea ni o latou maʻi faaumiumi ona o le agaʻigaʻi i luma o togafitiga faafomaʻi. O lea, e toʻatele tagata i nisi atunuu ua soifua mo ni tausaga se tele ma ola mālōlōina.

E ui i lea, e tusa pe e feagai pe e lē feagai ma ni faafitauli a o faasolo ina matutua, ae o le toʻatele o tagata e moomoo ia maua le fiafia a o faasolo ina matutua. E faapefea ona maua le fiafia? O se tasi o auala, e faalagolago lea i la tatou vaaiga, le lotomalilie ma le tomai e fetuunaʻi ai i lea suiga fou i le olaga. Seʻi iloilo nisi o mataupu silisili talafeagai ma faigofie mai i le Tusi Paia, ina ia fesoasoani iā i tatou i nei vala.

IA LOTOMAULALO: “E iai le atamai i ē e faamaulalo.” (Faataoto 11:2) I lenei mataupu, o “ē e faamaulalo” pe e lotomaulalo, e mafai ona faasino atu i tagata matutua o ē e amanaʻia le manatu e faapea, e iai mea sa masani ona latou faia ua lē mafai ona latou toe faia. Ua taʻutino mai Charles e 93 tausaga mai i Pasili: “Pe a umi ona e ola, o le a faasolo ina e matua. E lē mafai ona e toe foʻi i le talavou.”

Peitaʻi, o le lotomaulalo e lē faapea ai o le a iā i tatou se manatu lē saʻo e faapea, “Ua ou matua, e leai se isi mea e mafai ona ou toe faia.” O na ituaiga manatu e aveesea ai lou fiafia. Ua taʻua i le Faataoto 24:10: “Po ua e lotovaivai ea i le aso o le puapuaga? O le a itiiti lou malosi.” O lea, o le tagata lotomaulalo, e na te faaalia le atamai ma taumafai e fai le mea sili e na te mafaia.

Ua taʻua e Corrado e 77 tausaga mai i Italia: “Pe a e malaga i se taavale i se aʻega, e ao ona sui le kia ina ia aua neʻi pē le taavale.” O lea, pe a faasolo ina matua se tasi, e manaʻomia ona fai ni fetuunaʻiga. E taumafai Corrado ma lana avā ia paleni pe a fai a la feʻau i le fale. Pe a uma, e la te mālōlō ina ia ʻalofia  ai le uma ane o le aso ua matuā vaivai. Ua faapea mai foʻi Marian e 81 tausaga mai i Pasili: “Ua ou iloa e ao ona ou faifaimālie. Pe afai e manaʻomia, ou te mālōlō teisi pe a uma ni aʻu feʻau. Ou te nofo i lalo pe taoto e faitau se tusi pe faalogologo se musika. Ua ou iloa e ao ona ou amanaʻia ua lē mafai ona ou toe faia mea sa masani ona ou faia.”

Ia paleni

IA PALENI: ʻOu te manaʻo i fafine ina ia teuteu iā i latou i ofu e talafeagai, ia onomea ma ia mafaufau lelei.’ (1 Timoteo 2:9) O le faaupuga “ofu e talafeagai,” e taʻu mai ai e ao ona paleni ma filifili lelei. Ua faapea mai Barbara e 74 tausaga mai i Kanata: “Ou te taumafai ia mamā oʻu foliga. Ou te lē manaʻo e manatu māmā i oʻu foliga vaaia ona e faapea ua ou matua, ma ou lē teuteu faaaulelei ai.” Ua faapea mai Fern e 91 tausaga mai i Pasili: ʻO nisi taimi ou te faatau mai ni oʻu ofu fou ina ia lelei ai oʻu faalogona e faatatau iā te aʻu lava.’ Ae faapefea tane ua loa le soifua? Ua faapea mai Antônio e 73 tausaga mai i Pasili: “Ou te taumafai lava ia lelei oʻu foliga vaaia, ma ia mamā ma manogi lelei oʻu ofu.” E tusa ai foʻi o le tausia o lona tulaga tumamā, ua ia faapea mai: “Ou te taʻele ma sele laʻu ʻava i aso uma.”

Ae e tāua foʻi ona aua neʻi soona popole i ou foliga vaaia ma iʻu ai ina lē faaalia le “mafaufau lelei.” O Bok-im e 69 tausaga mai i Korea i Saute, e iā te ia se vaaiga paleni e faatatau i ofu. Ua ia faapea mai: “Ua ou iloa e lē talafeagai ona ou toe ofu i ofu ia sa ou ofuina a o ou talavou.”

Ia saʻo le vaai

IA SAʻO LE VAAI: “O aso uma o lē ua mafatia e leaga; a o lē ua lelei lona loto, e fai e lē aunoa lana faigaʻai.” (Faataoto 15:15) A o faasolo ina e matua, e ono oo iā te oe ni faalogona lē lelei pe a toe mafaufau i le taimi o lou talavou ma mea e tele sa mafai ona e faia. E lē ʻalofia lenei tulaga. Peitaʻi, ia taumafai e aua neʻi pulea oe i na faalogona lē lelei. O le mafaufau i taimi ua mavae e na ona e lagona ai o le faanoanoa ma faavaivaia ai oe mai i le faia o mea o loo mafai lava ona e faia. Ua faapea mai Joseph e 79 tausaga mai i Kanata: “Ou te taumafai e fai ma le fiafia mea e mafai ona ou faia, ae aua le soona mafaufau i mea ua lē mafai ona ou toe faia.”

E mafai foʻi ona e maua ni manatu aogā ma faalautele atu lou iloa, e ala i le faitau ma le aʻoaʻoina o mea. O lea, ia mataalia i ni avanoa e faitau ma aʻoaʻoina ai ni mea fou. O Ernesto mai i Filipaina e 74 ona tausaga, ma e alu o ia i le faletusi ma faitau ai i tusi eseese. Ua ia faapea mai: “Ou te fiafia lava e faitau tusi ma faaāta e pei o loo oʻu iai moni lava i le mea o loo tupu.” Ua taumafai foʻi Lennart e 75 tausaga mai i Suetena, e aʻoaʻoina se gagana fou.

Ia limafoaʻi

IA LIMAFOAʻI: “Ia outou foaʻi atu pea, ona foaʻi mai lea o tagata iā te outou.” (Luka 6:38) Ia fai ma au  masani le faasoa atu i isi o lou taimi ma au meafaitino, ma o le a e lagona ai le faamalieina ma le fiafia. E taumafai malosi Hosa, e 85 tausaga mai i Pasili, e fesoasoani atu i isi e ui lava e itiiti mea e mafai ona ia faia. Ua ia taʻua: “Ou te vili pe tusi atu ni tusi i aʻu uō o loo mamaʻi po ua lotovaivai. O nisi taimi ou te lafo atu i ai ni meaalofa itiiti. Ou te fiafia foʻi e fai se kuka po o se meaʻai suamalie mo ē o loo mamaʻi.”

Pe a tatou limafoaʻi, o le a uunaʻia ai foʻi isi ia limafoaʻi. Ua faapea mai Jan, e 66 tausaga mai i Suetena: “Pe a e faaalia atu le alofa i isi, e latou te tali mai foʻi i le alofa.” Ioe, o se tagata e limafoaʻi, e na te atiaʻe se siʻomaga e iai le māfana ma le lototalisapaia, lea e maua ai e isi le fiafia.

IA FAALEUŌ: “O lē e na te faaesea o ia lava, e saʻili o ia i lona lava faanaunauga; o le a tetee o ia i le atamai aogā uma.” (Faataoto 18:1) E ui lava e iai taimi atonu e te manaʻo ai e na o oe, ae ia ʻalofia le faaesea o oe lava. Ua taʻua e Innocent e 72 tausaga mai Nigeria: ʻOu te fiafia e auaufaatasi ma aʻu uō e eseese lo latou matutua.’ Ua faapea mai Börje e 85 tausaga mai i Suetena: “Ou te taumafai ia faifaimea faatasi ma talavou. O lo latou malolosi, ou te faalogoina ai i totonu e pei ua ou toe talavou.” Ia e tausolomua e fai ma valaaulia au uō. Ua fai mai Han-sik e 72 tausaga mai i Korea i Saute: “E ma te fiafia lava ma laʻu avā e valaaulia a ma uō o ē matutua ma ē talavou, ina ia matou faatasitasi pe faiʻaiga i le afiafi.”

Ia faaleuō

O tagata e faaleuō e fiafia e talanoa. Peitaʻi, o le faaleuō e lē gata e talanoa atu, ae e ao foʻi ona faalogologo atu. Ia faaalia le naunau moni i isi. Ua faapea mai Helena e 71 tausaga mai i Mozambique: “Ou te faaleuō ma feutagaʻi ma isi i se auala faaaloalo. Ou te faalogo atu i a latou tala e fai mai, ina ia ou iloa o latou manatu ma mea e fiafia i ai.” Ua fai mai José e 73 tausaga mai i Pasili: “E fiafia tagata pe a faatasitasi ma tagata e faalogologo lelei, o ē e faaalia lagona alofa ma le naunau i isi, avatu le faamālō i le taimi talafeagai, ma agamālie.”

Ia “faamāi i le masima” au upu pe a faailoa atu ou manatu. (Kolose 4:6) Ia magafagafa ma ia faalaeiau.

IA LOTOFAAFETAI: “Ia faaalia foʻi lo outou lotofaafetai.” (Kolose 3:15) Pe a e maua se fesoasoani, ia faaalia le lotofaafetai ona o le manatu mai. O le faaalia o le lotofaafetai o le a maua ai ni faiā lelei. Ua faapea mai Marie-Paule e 74 tausaga mai i Kanata: “E leʻi leva talu ai nei ona ma ō ese ma laʻu tane mai i se fale telē, ae nonofo i se tamaʻi fale. E anoanoaʻi a ma uō na fesoasoani mai, ma e lē lava a ma upu e faafetaia ai i latou. Talu mai lenā taimi, sa ma lafo atu i ai ni tusi faafetai ma valaaulia nisi o i latou mo se taumafataga.” E talisapaia tele e Jae-won e 76 tausaga mai i Korea i Saute, i latou e momoliina o ia i le Maota mo Sauniga. Ua ia faapea mai: “Ou te matuā lotofaafetai mo lenei fesoasoani. O lea ou te foaʻi ai sina seleni mo le penisini. O nisi taimi ou te saunia ai ni meaalofa itiiti ma tusi atu ni upu faafetai.”

A o le mea sili, ia lotofaafetai mo le ola. Na faamanatu mai e le tupu poto o Solomona i le Failauga 9:4: “E sili le taʻifau ua ola nai lo o le leona ua mate.” Ioe, e maua le fiafia a o faasolo ina matutua pe afai e iai se vaaiga saʻo ma lotomalie e fetuunaʻi.

Ia lotofaafetai