I vaitaimi o le Tusi Paia, na faaaogā e le Atua faamasino e laveaʻi ona tagata mai i faiga lē tonu. (Faamasino 2:18) O loo faamatala i le Tusi Paia le Aso Faamasino i le lumanaʻi o se taimi fiafia, pe a gaoioi Ieova le Faamasino o le lalolagi aoao, ina ia laveaʻi tagata mai i faiga lē tonu.​—Faitau le Salamo 96:12, 13; Isaia 26:9.

Ua filifilia e le Atua Iesu e faia le faamasinoga o ē ola ma ē oti. (Galuega 10:42; 17:31) E toʻatele tagata ua maliliu e lē o iloa le Atua. A o faagasolo le Aso Faamasino, o le a toe faatutū e Iesu i latou ina ia iloa le Atua moni ma alolofa iā te ia.​—Faitau le Galuega 24:15.

O le a toetutū mai ē ua maliliu a o faagasolo le afe tausaga. (Faaaliga 20:4, 12) E tatau ona latou aʻoaʻo ala o le Atua ma usiusitaʻi iā te ia. E ese mai i manatu taatele, ua taʻua i le Tusi Paia o le a faamasinoina tagata i a latou mea e fai pe a mavae le toetū.​—Faitau le Roma 6:7.

O loo faamatala foʻi i le Tusi Paia se aso faamasino o le a tupu faafuaseʻi, a o leʻi amata le afe tausaga. E taʻua foʻi lenā aso o le iʻuga, e pei ona talanoaina i mataupu autū o lenei mekasini. I lenā aso, o le a tafiesea ai e le Atua ē e amioleaga ma ē e lē matataʻu iā te ia. (2 Peteru 3:7) O lea, e tatau ona faamautinoa o loo tatou alolofa i le Atua.​—Faitau le 2 Peteru 3:9, 13.