Skip to content

Skip to table of contents

 SUIA E LE TUSI PAIA OLAGA

O Fesili e Tolu na Suia ai Loʻu Olaga

O Fesili e Tolu na Suia ai Loʻu Olaga
  • TAUSAGA FANAU: 1949

  • ATUNUU: IUNAITE SETETE

  • TALAAGA: SAʻILI SE FUAFUAGA MONI O LE OLAGA

OLAGA SA IAI:

Sa ou ola aʻe i Ancram, o se tamaʻi taulaga i le itu i mātū o Niu Ioka i Amerika. O le toʻatele o tagata i inā sa fai a latou pā povi. O lea, sa tele atu povi nai lo o tagata.

E tasi le lotu sa iai i le taulaga, ma na auai ai lo matou aiga. I taeao o Aso Sa, e faaiila e le tamā o loʻu tamā oʻu seevae, ona ou alu lea i le aʻoga Aso Sa ma laʻu tamaʻi Tusi Paia paʻepaʻe mai i le tinā o loʻu tamā. Na aʻoaʻoina aʻu ma nai oʻu tei ia galulue mamafa, faaaloalo, fesoasoani i isi, ma ia talisapaia faamanuiaga ua matou maua.

Ina ua ou matua, na ou tuua lo matou aiga ma avea aʻu ma faiaʻoga. Sa tele aʻu fesili e faatatau i le Atua ma le olaga. O nisi o aʻu tamaiti aʻoga e talenia, a o isi e leai ae e galulue mamafa. O isi e malolosi, a o isi e lē atoatoa le malosi o le tino. Na ou manatu e lē tonu ia tulaga. O nisi taimi e faapea mai mātua o tamaiti e vaivai i le vasega, “O le finagalo lea o le Atua mo si aʻu tama.” Na ou taumānatu pe aiseā ua faataga ai e le Atua nisi pepe e fananau mai e lē atoatoa le malosi, auā e leai ni mea sesē na faia e pepe.

Na ou taumānatu foʻi po o le ā se mea aogā e tatau ona fai i loʻu olaga. Ua televave loʻu olaga. Na ou ola aʻe i se aiga e lelei, na lelei aʻu aʻoga, ma ou te fiafia i laʻu galuega. Ae e foliga mai e leai se uiga o loʻu olaga. Na o le pau le mea ua ou manaʻo ai, o le faaipoipo, maua se fale manaia ma se fanau, faigaluega seʻia oo ina litaea, ona ou nofo lea i se fale e tausi ai tagata matutua. Na ou taumānatu pe e na o le pau lea o le olaga.

SUIA E LE TUSI PAIA LOʻU OLAGA:

I se tasi tau māfanafana, na matou malaga ai i Europa ma nisi o faiaʻoga. Sa matou ō i Westminster Abbey, Notre-Dame de Paris, le Vatikana, faapea le tele o tamaʻi lotu. O so o se mea lava na ou alu ai, na fai ai aʻu fesili. Ina ua ou toe foʻi i Sloatsburg i Niu Ioka, sa ou auai i le tele o lotu. Ae e leai se lotu na mafai ona aumaia iā te aʻu ni tali faamalieloto.

 I se tasi aso, na sau ai se teineitiiti aʻoga e 12 tausaga ma fesili mai iā te aʻu i ni fesili se tolu. Muamua, na fesili mai pe ou te iloa o ia o se Molimau a Ieova. Sa ou tali atu ioe. Lua, na fesili mai pe ou te fia iloa atili e faatatau i Molimau a Ieova. Na ou toe faapea atu ioe. Tolu, na fesili mai po o fea ou te nofo ai. Na ou taʻu i ai loʻu tuatusi, ma na ma iloa ane e felataʻi o matou fale. Sa lilo i oʻu manatu o le a suia atoa loʻu olaga i nei fesili e tolu.

E leʻi umi ae tiʻetiʻe mai lenei teineitiiti i loʻu fale i lana uilavilivae, ma amata la ma suʻesuʻega faale-Tusi Paia. Na ou fai i ai fesili ia na ou faia i le tele o faifeʻau. I le lē pei o faifeʻau, sa ia faailoa mai tali manino ma faamalieloto mai i laʻu Tusi Paia, o tali ou te leʻi iloaina muamua!

Ua ou maua le olioli ma le lotomalie i mea ua ou aʻoaʻoina mai i le Tusi Paia. Na pāʻia loʻu loto ina ua ou faitau i le 1 Ioane 5:19 e faapea: “O le lalolagi atoa o loo nofo toʻilalo i le pule a lē o loo leaga.” Sa ou fiafia ina ua ou iloa e lē o le Atua le pogai o mafatiaga, ae o Satani, ma o le a toe faaleleia e le Atua le tulaga o mea. (Faaaliga 21:3, 4) Ua ou iloa e moni le Tusi Paia pe afai e manino le auala e faamatala ai. E ui lava e na o le 12 tausaga o lē na faia laʻu suʻesuʻega, ae sa ou manatu e lē taulia le matua, a o le upu moni.

E ui i lea, ae na ou fia iloa pe e savavali Molimau e tusa ai ma mea e latou te talaʻia. O se faataʻitaʻiga, na faamamafa e lenei teineitiiti, e tatau i Kerisiano moni ona faaalia uiga e pei o le faapalepale ma le agalelei. (Kalatia 5:22, 23) Na ou manaʻo e tofotofo o ia pe e na te faaalia nei uiga. I se tasi aso, na ou faatuatuai ai i laʻu suʻesuʻega. Sa ou taumānatu: ʻPo o le a faatalitali mai pea o ia? Afai o lea, po o le a ita i loʻu tuai atu?’ A o afe atu laʻu taavale, o loo nofonofo mai o ia i le fasitepu o loʻu fale. Sa tamoʻe mai ma faapea mai: “O lea ua ou toe tau alu i le fale e fai i loʻu tinā, e vili falemaʻi ma leoleo po ua iai se mea ua tupu iā oe, ona e lē taitai ona e tuai mo lau suʻesuʻega. Sa ou popole iā te oe!”

I se isi taimi, na fai ai saʻu fesili ma loʻu manatu e lē mafai e lenei teineitiiti e 12 tausaga ona tali. Na ou fia iloa po o le a ia fatuina se tali. Ina ua ou fesili atu i ai, na pulatoʻa mai o ia ma faapea mai: “E faigatā lau fesili. Seʻi tusi i lalo ona ou alu lea e fesili i oʻu mātua.” I le ma suʻesuʻega na sosoo ai, na sau ma aumai Le Olomatamata o loo iai le tali o laʻu fesili. O le māfuaaga lea na ou tosina ai i Molimau, ona e maua uma tali o aʻu fesili i a latou lomiga faale-Tusi Paia. Sa faaauau ona faia e lenei teineitiiti laʻu suʻesuʻega, ma ina ua mavae le tausaga, na ou papatiso loa o se Molimau a Ieova. *

AOGĀ IĀ TE AʻU:

Ina ua maua tali faamalieloto i aʻu fesili, sa ou manaʻo e faasoa atu i isi. (Mataio 12:35) I le amataga, sa tetee loʻu aiga i oʻu talitonuga fou. Ae a o faagasolo taimi, na toe suia o latou uiga. A o lata ina maliu si oʻu tinā, na fai lana suʻesuʻega faale-Tusi Paia. E ui na maliu o ia e leʻi papatiso, ae ou te mautinoa sa filifili e auauna iā Ieova.

I le 1978, sa ou faaipoipo ai i se Molimau e igoa iā Elias Kazan. I le 1981, na valaaulia ai i maʻua e avea ma sui o le aiga Peteli i le Iunaite Setete. * E faanoanoa ona e na o le fā tausaga talu ona ma auauna i inā, ae maliu Elias. E ui na maliu laʻu tane, ae sa ou tumau i laʻu auaunaga i le Peteli, ma na avea o se mea ou te taulaʻi i ai ma faamāfanafanaina ai aʻu.

I le 2006, na ou faaipoipo ai iā Richard Eldred, o se sui o le aiga Peteli. O loo faaauau ona ma auauna ma le fiafia ma Richard i le Peteli. O le iloa o le upu moni e uiga i le Atua, ua ou lagona ai e lē gata ua maua tali o aʻu fesili, ae ua matuā aogā foʻi loʻu olaga. O nei mea uma na amata mai i fesili e tolu a se teineitiiti.

^ pala. 16 Ua taʻua e faapea na fesoasoani lenei teineitiiti ma nai ona tei i o latou faiaʻoga e toʻalima ia suʻesuʻe le Tusi Paia ma auauna iā Ieova.

^ pala. 18 O le upu “Peteli,” o lona uiga o le “Fale o le Atua,” o le taʻu lea e faaaogā e Molimau a Ieova e faaigoa ai a latou ofisa o le lālā i le lalolagi aoao. (Kenese 28:17, 19, faaopoopoga i lalo) E eseese galuega a sui o le aiga Peteli, ia e lagolagoina ai le galuega tau aʻoaʻoga a Molimau a Ieova.