Alu i mataupu o loo iai

Alu i le lisi o mataupu

 UA FESILI MAI LE ʻAUFAITAU . . .

Pe e faa-Kerisiano le aso faamanatu o le Eseta?

Pe e faa-Kerisiano le aso faamanatu o le Eseta?

Ua taʻua i le Encyclopædia Britannica, o le Eseta o le “sauniga autū a lotu Kerisiano e faamanatu ai le Toetū o Iesu Keriso.” Peitaʻi, po o se aso faamanatu faa-Kerisiano?

Ina ia faamaonia le moni o se mea, e tāua ona uaʻi atu i faamatalaga o lenā mea. I se tulaga talitutusa, ina ia tatou iloa pe e faa-Kerisiano le Eseta, e tāua ona iloilo faamatalaga e fesootaʻi atu i le Eseta.

Muamua, na faatonu e Iesu ona soo ia faamanatu lona maliu, ae e lē o lona toetū. Na taʻua e le aposetolo o Paulo lenei sauniga o le “talisuaga afiafi a le Alii.”​—1 Korinito 11:20; Luka 22:19, 20.

Ua taʻua foʻi i le Britannica, o le tele o tū o le Eseta “e lē fesootaʻi atu” i le toetū o Iesu, “ae na amata mai i tū ma aganuu a tagata.” O se faaaʻoaʻoga, e tusa ai o faailoga masani o le Eseta, o le fuāmoa ma le lapiti, ua taʻua i le tusi The Encyclopedia of Religion: “O le fuāmoa ua faaāta mai ai le ola fou ua sao mai i le oti po o le atigi o le fuāmoa.” Ua taʻua atili: “E lauiloa le lapiti o se meaola e fanafanau, ma o lea ua faaāta mai ai le oo mai o le tau e totogo ai mea.”

Ua faamatalaina e Philippe Walter, o se polofesa o tusitusiga mai anamua, auala na avea ai nei tū ma vaega o le faamanatuina o le Eseta. Na tusi o ia, “a o faasolosolo ona talia lotu faapaupau e avea ma lotu Kerisiano,” sa faigofie ona faafesootaʻi sauniga faapaupau na faamanatu ai ʻle mavae atu o le tau mālūlū lea e faatusa ai le oti, ae oo mai le tau e totogo ai mea lea e faatusa ai le ola,’ agaʻi i le toetū o Iesu. Ua taʻua atili e Walter o se laasaga autū lea e faaaofia ai aso faamanatu e faapea mai e faa-Kerisiano, i aso faamanatu faapaupau, ma ua faigofie ai ona liliu tagata faapaupau.

O le talia o lotu faapaupau e avea ma lotu Kerisiano, e leʻi tupu a o soifua le ʻauaposetolo, auā sa latou gaoioi o se “taofiofiga” faasaga i faiga faapaupau. (2 Tesalonia 2:7) Sa lapataʻi mai le aposetolo o Paulo pe a “alu ese” o ia, e iai tane o le a ʻlatou faauiga sesē mea, ina ia fetoso ese ai soo e mulimuli iā i latou.’ (Galuega 20:29, 30) I le iʻuga o le uluaʻi senituri, na tusi le aposetolo o Ioane e iai nisi o tane ua latou faasesēina Kerisiano. (1 Ioane 2:18, 26) Ua faasolosolo ona talia aganuu faapaupau.

“Ia aua neʻi amo faalēgatasi ma ē e lē talitonu.”​—2 Korinito 6:14

E ono manatu nisi e lē sesē le talia o nisi o tū o le Eseta, auā e aogā e malamalama ai “tagata faapaupau” i le tāua o le toetū o Iesu. Peitaʻi, e lē ioe Paulo i lenā manatu. E ui lava sa vaai i le tele o aganuu faapaupau a o faimalaga solo i le Emepaea o Roma, ae e na te leʻi taliaina na aganuu ina ia fesoasoani ai i tagata e malamalama iā Iesu. Sa ia lapataʻia Kerisiano: “Ia aua neʻi amo faalēgatasi ma ē e lē talitonu. Auā e faapefea ona fesootaʻi le amiotonu ma le amioleaga? E faapefea ona mafuta le malamalama ma le pōuliuli? ʻO le mea lea, ia ō ese ai mai iā i latou, ma ia outou vavaeese,’ ua fetalai mai ai Ieova, ʻma aua tou te toe papaʻi atu i se mea e lē mamā.’”​—2 Korinito 6:14, 17.

O le ā ua tatou iloa mai i le iloiloina o nei faamatalaga? Ua manino mai ai, o le Eseta, e lē o se aso faamanatu faa-Kerisiano.