Alu i mataupu o loo iai

Alu i le lisi o mataupu

 TALAAGA O LE SOIFUAGA

Mata o Jairo​—O Lana Auala e Auauna ai i le Atua

Mata o Jairo​—O Lana Auala e Auauna ai i le Atua

Seʻi mafaufau ae faapea e lē mafai ona e pulea lou tino atoa seʻi vaganā ai ou mata. O le tulaga faigatā lenā o loo fesagaʻi ma loʻu uso o Jairo. Peitaʻi, o loo ia maua pea se olaga fiafia ma aogā. Seʻi oʻu faamatala muamua atu le tulaga o Jairo ma lona maʻi, ma mulimuli ane o le māfuaaga ua fiafia ai lona olaga.

Sa fanau mai Jairo e maua i le ituaiga maʻi o le faiʻai (cerebral palsy) e taʻu o le spastic quadriplegia. * O le māfuaaga lea e lē mafai ai ona ia pulea gaoioiga a le tele o vaega o lona tino. O le lē lelei o fesootaʻiga a le faiʻai ma maso, e femilosaʻi ai ona lima ma vae i le tele o taimi. O nisi taimi e toe afāina ai lava Jairo pe a felafoaʻi solo ona vae ma lima, pe afāina ai foʻi isi e latalata ane iā te ia. E faanoanoa ona o le tele o taimi e tatau ona saisai ona lima ma vae i le nofoa faataavalevale, ina ia ʻalofia ai le afāina o ia po o se tasi.

TIGĀ A O TUPUTUPU AʻE

E matuā tigāina Jairo a o tuputupu aʻe. I le tolu o ona masina, na fai ma oso lona maʻi ma ia lē iloa ai se mea. E masani ona fusi e loʻu tinā ma faatopetope atu i le falemaʻi, ma le manatu ua oti o ia.

Talu ai o le tele o taimi e faalētonu ai maso o Jairo, ua iʻu ai ina pipiʻo ona ponaivi. I le 16 o ona tausaga, na see ai le ponaivi o lona suilapalapa, ma e telē se taotoga na moomia mo lona ogāvae, suilapalapa, ma le ivi suilapalapa. A o faasolosolo ina manuia Jairo, ou te manatua e tagi i pō uma ona o le tigā.

O le tugā o le maʻi o Jairo, ua faalagolago ai i isi e faia le tele o mea mo ia, e pei o le ʻai, faiga o ona lavalava, ma taimi e sauni ai e moe. E masani lava o oʻu mātua e faia mea uma e manaʻo ai. E ui e manaʻomia e Jairo le fesoasoani i taimi uma, ae e faamanatu pea i ai e oʻu mātua e tāua le faalagolago i le Atua ae e lē na o tagata.

MAUA LE AUALA E FESOOTAʻI AI

E Molimau a Ieova o ma mātua, ma na la faitau atu le Tusi Paia iā Jairo talu mai lava o pepe. Na la iloa e sili atu ona aogā le olaga pe afai e iai se faiā ma le Atua. E vaivai le tino o Jairo ma maʻimaʻia, ae e mafai ona ia maua se faamoemoe pupula mo le lumanaʻi. E ui i lea, sa taumānatu o ma mātua po o malamalama Jairo i le poto mai le Tusi Paia.

I se tasi aso a o laʻitiiti Jairo, na fai atu ai Tamā iā te ia, “Jairo, e mafai ona e talanoa mai iā te aʻu? Afai e te alofa iā te aʻu, ia talanoa mai!” A o taumafai Tamā e faatalanoa o ia, na maligi loimata o Jairo. E ui na taumafai Jairo e faailoa mai ona  faalogona i upu, peitaʻi sa na ona magamagagū o ia. Na lē lelei faalogona o Tamā ona ua tagi Jairo iā te ia. Ae ua faaalia i le maligi o loimata o Jairo, na malamalama i tala na fai atu. A o le faafitauli, e lē mafai ona tautala mai.

E leʻi umi ae mātau e oʻu mātua, e faagaoioi e Jairo ona mata e taumafai ai e faailoa mai ona manatu ma faalogona. E tigā le loto o Jairo ona e faigatā ona malamalama se tasi iā te ia. Ae ina ua malamalama oʻu mātua i gaoioiga a ona mata ma fai le mea e manaʻo ai, e matuā ʻataʻata ma fiafia o ia. O lana auala lenā e faafetai mai ai.

Na fautua mai se fomaʻi faapitoa i le auala e faaleleia ai le tautala, ina ia fesootaʻi, e tatau ona sii uma i luga lima pe a fai se fesili iā Jairo e tali i le ioe po o le leai. O le lima taumatau o le ioe, a o le agavale o le leai. O lea, e na te faailoa mai lana tali e ala i le tilotilo atu i le lima saʻo.

SE MEA MATAʻINA I LE OLAGA O JAIRO

E faatolu i le tausaga ona faia fonotaga ma tauaofiaga a Molimau a Ieova, ia e faalogologo ai le toʻatele i lauga faale-Tusi Paia. E fiafia lava Jairo i le lauga lea e faia mo sui papatiso. I le 16 o ona tausaga, na fesili atu ai Tamā, “Jairo, e te fia papatiso?” Na pulatoʻa atu o ia i le lima taumatau o Tamā, ma faaalia ai lona faanaunauga e fia papatiso. Ona toe fesili atu lea o Tamā, “Ua e faailoa atu i le Atua i le tatalo lou faanaunauga e auauna e faavavau iā te ia?” Sa toe pulatoʻa atu Jairo i le lima taumatau o Tamā. Na iloa mai ai ua uma ona tuuina atu o ia iā Ieova.

I le māeʻa ai o ni talanoaga faale-Tusi Paia, na iloa ai ua malamalama Jairo i le tāua o le papatiso o se Kerisiano. I le 2004, na ia taliina ai le fesili aupito i tāua, “Po ua tuuina atu oe i le Atua e faia lona finagalo?” Na tali atu Jairo e ala i le autilo i luga o ona mata. O le auala lenā na sauni ai o ia e tali atu ioe. O lea, o le 17 o ona tausaga na papatiso ai e avea ma Molimau a Ieova.

TAULAʻI ATU MATA I LE FINAGALO O LE ATUA

I le 2011, na maua ai se auala fou e fesootaʻi ai ma Jairo, o se komepiuta e faatonutonu e mata. E iloa e lenei komepiuta le feminoiaʻi o le vaega uliuli o le mata, ma iloa ai le faailoga o loo tilotilo agaʻi i ai. Pe afai e emo le mata pe pulatoʻa i se faailoga, ua pei lenā o loo oomi se ki o le komepiuta. E iai ni ata faapitoa ua tuuina i le komepiuta, e mafai ona faaaogā e Jairo e fesootaʻi mai ai. Pe a emo lona mata i se ata, ona sau lea o le leo mai le  komepiuta e faaupu mai ai le feʻau o loo manaʻo e taʻu mai.

A o tuputupu pea le malamalama o Jairo i le Tusi Paia, sa faapena foʻi lona faanaunauga e fesoasoani atu faaleagaga i isi. Pe a fai le tapuaʻiga a lo matou aiga i vaiaso taʻitasi, e masani ona ia autilo i lana komepiuta ona toe autilo mai lea iā te aʻu. O le auala lenā e na te faamanatu mai ai, e tatau ona ou tusi i lalo ana tali ia e manaʻo e fai i vaega o fesili ma tali i sauniga a le faapotopotoga.

I le sauniga, e na te faaalu le taimi e autilo ai i lana komepiuta ma filifili le faailoga o loo manaʻo ai, ona faaleo mai lea e le komepiuta ina ia faalogo ai isi. E ʻataʻata o ia i taimi uma e fai ai sona sao ma faalaeiau i sui o le faapotopotoga. Na faapea mai Alex, o se uō talavou a Jairo: “Ou te maofa i taimi uma pe a ou faalogo atu i manatu o Jairo i mataupu mai le Tusi Paia.”

E faaaogā e Jairo lana komepiuta e faatonutonu e mata ma sau ai le leo, ina ia faia ai ana tali i sauniga ma talaʻi atu i isi

E faaaogā foʻi e Jairo ona mata e faailoa atu ai i isi ona talitonuga. O se faaaʻoaʻoga, e ala i le filifili o se ata o loo faaāta mai ai se togālaau e nonofo filemu ai manu ma tagata o atunuu eseese. Pe a ia filifilia lenā ata, ona faapea mai lea o le leo mai i lana komepiuta: “I le Tusi Paia, o loo taʻua ai le faamoemoe o le a avea le lalolagi ma parataiso, e lē toe iai se maʻi ma le oti, Faaaliga 21:4.” Pe a fiafia le tagata, e na te toe filifilia se isi ata ona faapea mai lea o le komepiuta, “Pe e te manaʻo e suʻesuʻe le Tusi Paia faatasi ma aʻu?” E faateʻia ona sa talia e le tamā o lo ma tinā se suʻesuʻega. E mataʻina le vaai atu o loo aʻoaʻo e Jairo ma se isi Molimau le toeaina i le Tusi Paia! O se fiafiaga le papatiso o le tamā o lo ma tinā i le tauaofiaga itumalo i Madrid, iā Aokuso 2014.

Ua mātauina e faiaʻoga o le aʻoga a Jairo lona tuutoina atu i le Atua. Na taʻutino mai Rosario, o se fomaʻi faapitoa o le faaleleia o le tautala na fesoasoani iā Jairo: “Pe a fia avea aʻu ma se vaega o se lotu, o le a avea aʻu ma Molimau a Ieova. Ua ou vaaia le aogā ma le fiafia o le olaga o Jairo ona o lona faatuatua, e ui i faigatā o loo ia fesagaʻia.”

E foliga fiafia Jairo i taimi uma ou te faitau atu i ai le folafolaga a le Tusi Paia e faapea: ʻO le a osooso lē ua pipili e pei o le ʻaila, e alaga fiafia le laulaufaiva o lē ua gūgū.’ (Isaia 35:6) E ui e lotovaivai Jairo i nisi taimi, ae o le tele lava o taimi e fiafia ona o le iai o se faiā lelei ma le Atua ma ana uō Kerisiano. O ona foliga tausaafia ma le faatuatua malosi, o se faamaoniga lea e iloa ai, o le auauna iā Ieova e maua ai se olaga faamalieina e ui i faigatā.

^ pala. 5 O le cerebral palsy (CP) o le taʻu lea o le maʻi o le faiʻai lea e aafia ai gaoioiga o le tino. E mafai ona iʻu ai i maʻi oso, lē ʻai lelei, ma lē lelei le tautala. O le spastic quadriplegia o le ituaiga lea e sili ona ogaoga o le CP, lea e malō ai maso o vae ma lima ma femilosaʻi le ua.