Alu i mataupu o loo iai

Alu i le lisi o mataupu

 MATAUPU AUTŪ | LAVEAʻIINA E IESU I TATOU

Le Maliu ma le Toetū o Iesu​—O Aogā mo Oe

Le Maliu ma le Toetū o Iesu​—O Aogā mo Oe

“Ia e talitonu i le Alii o Iesu Keriso, ona faaolaina ai lea o oe.”​—Galuega 16:31.

O nei upu faagalogatā sa fai atu e le aposetolo o Paulo ma Sila i se leoleo o le falepuipui, i le aai o Filipi i Maketonia. O le ā le uiga o nei upu? Ina ia malamalama i le sootaga o le talitonu iā Iesu ma le faaolaina po o le laveaʻiina mai i le oti, e tatau ona tatou iloa muamua le pogai ua tatou feoti ai. Seʻi o tatou iloilo le aʻoaʻoga a le Tusi Paia.

E leʻi foafoaina le tagata ma se fuafuaga ia oti

“Ona ave lea e Ieova le Atua o le tagata ma tuu o ia i le faatoʻaga o Etena e galueaʻiina ma tausia. Ua tuuina atu foʻi e Ieova le Atua lenei poloaʻiga i le tagata: ʻE mafai ona e ʻai i laau uma o le faatoʻaga ma e maʻona ai. A o le laau e iloa ai le lelei ma le leaga, aua neʻi e ʻai ai, auā o le aso e te ʻai ai, e te oti ai lava.’”​—Kenese 2:15-17.

Sa tuuina e le Atua le uluaʻi tagata i le faatoʻaga i Etena, o se parataiso i le lalolagi sa tumu i meaola ma laau matagofie. Sa iai laau na fua tele mai, ma sa saʻoloto Atamu e ʻai ai. Peitaʻi, e tasi le laau patino na faailoa manino atu e le Atua iā Atamu e aua neʻi ʻai ai. Sa lapataʻia o ia afai e ʻai ai, o le a oti.

Pe sa malamalama Atamu i lenā faatonuga? Sa malamalama Atamu e faatatau i le oti, auā sa vaai i le mamate o meaola. Pe afai sa foafoaina Atamu ma se fuafuaga e mulimuli ane oti, e leai la se uiga o le lapataʻiga a le Atua. Peitaʻi, sa iloa e Atamu pe afai e usitaʻi i le Atua ma lē ʻaina le fua o le laau, e lē oti o ia, ae o le a ola e faavavau.

E manatu nisi o le laau e faaāta mai ai feusuaʻiga. Peitaʻi e lē moni lenā manatu, auā sa finagalo Ieova iā Atamu ma Eva “ia fanafanau ma ia matuā faatoʻateleina,” ma “ia tumu ai le lalolagi ma galueaʻiina.” (Kenese 1:28) O se laau moni lava sa faasā ona ʻaina, ma na taʻua e Ieova “o le laau e iloa ai le lelei ma le leaga,” auā sa faaāta mai ai lana aiā e filifilia ai le mea e lelei pe leaga mo tagata. O le lē ʻaina o le fua o lenā laau, e faaalia ai e Atamu lona usitaʻi ma lona lotofaafetai, i Lē na faia o ia ma matuā faamanuiaina o ia.

 Na oti Atamu ona o le lē usitaʻi i le Atua

Na fetalai le Atua iā Atamu: ʻOna ua e ʻai i le fua o le laau lea na ou poloaʻi atu ai iā te oe. E te ʻai au meaʻai ma le afu o ou mata seʻia e toe foʻi atu i le eleele, auā na faia mai ai oe. Auā o le efuefu oe, e te toe foʻi atu lava i le efuefu.’​—Kenese 3:17, 19.

Sa ʻaina e Atamu le fua o le laau na faasā. Sa matuiā lenā gaoioiga o le lē usitaʻi. Sa faaalia ai lona fouvale ma le matuā lē amanaʻia o mea lelei uma na faia e Ieova mo ia. O le ʻaina o le fua o le laau, na teena ai e Atamu Ieova, ae filifili i se olaga fia tutoʻatasi lea ua iʻu ai i mala mataʻutia.

E pei ona valoia e Ieova, sa mulimuli ane oti Atamu. Sa faia e Ieova Atamu “mai i le efuefu o le eleele,” ma taʻu atu i ai o le a “toe foʻi atu i le eleele.” Ina ua oti Atamu, e leʻi toe ola mai i se isi tino pe i se isi nofoaga. E leʻi toe ola o ia e pei lava o le efuefu lea na faia mai ai o ia.​—Kenese 2:7; Failauga 9:5, 10.

Ua tatou feoti ona e tatou te tupuga mai iā Atamu

ʻUa oo mai le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.’​—Roma 5:12.

E iai iʻuga e sili ona leaga o le lē usitaʻi po o le agasala a Atamu. Ua ia lē maua ai le faamanuiaga o le ola e faavavau, ma ua ia melea ai le ola lelei atoatoa ae tuufaasolo mai i ana fanau uma le ola lē lelei atoatoa.

O i tatou uma lava e tupuga mai iā Atamu, ma o ia ua māfua ai ona tuufaasolo mai iā i tatou le tino augavale ua aafia i le agasala ma le oti. Sa manino ona faamatala e Paulo lo tatou tulaga pagatia ina ua tusi e faapea: “O aʻu o le tagata faaletino, ua faatauina atu i le agasala. Auē o aʻu le tagata malaia! O ai na te laveaʻiina aʻu mai i le tino e iʻu ai i le oti?” Na toe tali lava e Paulo lana fesili: “Ia faafetaia le Atua ona o lo tatou Alii o Iesu Keriso!”​—Roma 7:14, 24, 25.

 Na foaʻi mai e Iesu lona ola ina ia tatou maua le ola e faavavau

“Na auina mai e le Tamā lona Alo e fai ma Faaola o le lalolagi.”—1 Ioane 4:14.

Sa faatulaga e le Atua se auala ina ia aveesea ai aafiaga o le agasala, ma tuusaʻoloto ai i tatou mai i le faasalaga o le oti e faavavau. Sa ia auina mai lona Alo ina ia fanau mai o se tagata lelei atoatoa e pei o Atamu. Ae e lē pei Iesu o Atamu, auā ʻe leʻi faia e Iesu se agasala.’ (1 Peteru 2:22) Talu ai sa lelei atoatoa Iesu, o lea e leʻi aafia ai o ia i le faasalaga o le oti ma ua mafai ona ola e faavavau o se tagata lelei atoatoa.

E ui i lea, e leʻi taofia e Ieova le fasiotia o Iesu e ona fili. I le tolu aso mulimuli ane, na toe faatūina ai e Ieova Iesu o se agaga ina ia toe foʻi atu i le lagi. O i inā na ofo atu ai e Iesu le tāua o lona ola lelei atoatoa i le Atua, ina ia toe totogi ai le ola na melea e Atamu mo ia ma lana fanau. Sa talia e Ieova lenā taulaga, ma ua mafai ai e i latou e faatuatua iā Iesu ona maua le ola e faavavau.​—Roma 3:23, 24; 1 Ioane 2:2.

Ua toe faafoʻisia mai e Iesu le ola na melea e Atamu. Sa maliu puapuagatia Iesu ina ia mafai ona tatou ola e faavavau. Ua taʻua i le Eperu 2:9: ʻNa tigā Iesu i le oti, ma ona o le agalelei faifua o le Atua, na oo ai le oti iā te ia ona o tagata uma.’

E tele mea ua tatou aʻoaʻoina e faatatau iā Ieova mai i lenei sauniuniga. Ona o le maualuluga o ana tapulaa o le faamasinotonu, ua lē mafai ai e tagata lē lelei atoatoa ona togiolaina i latou lava. Peitaʻi o lona alofa ma le alofa mutimutivale, na uunaʻia ai o ia e gaoioi e tusa ma ana tapulaa e ui sa matuā faigatā mo ia, e ala i le ofoina mai o lona lava Alo ina ia fai ma togiola.​—Roma 5:6-8.

Sa toe faatūina Iesu mai i le oti, ma o le a toe faatutūina mai foʻi isi

“Ua toe faatūina Keriso mai i ē ua oti, o lē na muamua faatūina mai i ē ua oti. Auā ua oo mai le oti ona o le tagata, ua toe faatutūina foʻi o ē ua oti ona o le tagata. Auā e pei ona oti uma lava iā Atamu, e faapena foʻi ona toe faaolaina uma lava e ala i le Keriso.”​—1 Korinito 15:20-22.

E mautinoa sa soifua ma na maliu Iesu, ae o ā faamaoniga e iloa ai na toetū o ia mai le oti? O se tasi o faamaoniga sili, sa toetū Iesu ma faaali atu i le toʻatele o tagata i taimi ma nofoaga eseese. I se tasi taimi, sa ia faaali atu i tagata e silia i le 500. Sa taʻua e Paulo lenei manatu i lana tusi i Kerisiano i Korinito, ma o nisi o na molimau sa soifua pea, ma mafai ona faamatalaina mea na latou vāai ma faalogo i ai.​—1 Korinito 15:3-8.

O le mea moni, ina ua tusi Paulo e faapea o Keriso o “lē na muamua faatūina mai” i ē ua oti, sa ia faaalia ai e iai foʻi isi o le a toetutū mulimuli ane. O Iesu lava ia na fetalai e iai le taimi o le a “ō mai ai” i fafo “i latou uma o loo i tuugamau.”​—Ioane 5:28, 29.

 Ina ia maua le ola e faavavau, e tatau ona tatou faatuatua iā Iesu

“O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”​—Ioane 3:16.

O loo taʻua i itulau amata o le Tusi Paia le taimi na oo mai ai le oti ma leiloa ai le Parataiso. Ae o loo taʻua i itulau faaiʻu le taimi o le a faaumatia ai le oti, ma toe faafoʻisia mai e le Atua le Parataiso i le lalolagi. I lenā taimi, o le a ola e faavavau ma fiafia tagata. Ua faapea mai le Faaaliga 21:4: “E lē toe iai se oti.” Ina ia faamaonia e moni lenei folafolaga, ua faapea mai le fuaiupu e 5: “O upu nei e faamaoni ma moni.” O le a faataunuu atoatoa e Ieova ana folafolaga.

Pe e te talitonu “o upu nei e faamaoni ma moni”? Ia aʻoaʻo atili e faatatau iā Iesu ma faatuatua iā te ia. O le faia faapea, o le a e maua ai le finagalo malie o Ieova, ma le tele o ana faamanuiaga i le taimi nei. E lē gata i lea, o le a e maua le faamoemoe o le ola e faavavau i le lalolagi Parataiso, lea o le a “lē toe iai se oti, po o se faanoanoa, po o se tagiauē, e lē toe iai foʻi se tigā.”