Alu i mataupu o loo iai

Alu i le lisi o mataupu

Pe e Tatau Ona Tatou Tatalo iā Iesu?

Pe e Tatau Ona Tatou Tatalo iā Iesu?

NA FESILIGIA e se tagata suʻesuʻe ni talavou e silia ma le 800 mai i lotu eseese, pe e tali mai Iesu i tatalo. E silia i le 60 pasene na matuā talitonu e tali mai Iesu. Peitaʻi, na kolosi e se tasi talavou le igoa o Iesu, ae tusi ai le “Atua.”

O le ā sou manatu? Pe e tatau ona tatou tatalo atu iā Iesu po o le Atua? * Seʻi o tatou iloilo le auala na aʻoaʻo ai e Iesu ona soo e tatalo ai.

O AI NA AʻOAʻO E IESU I TATOU E TATALO I AI?

Na aʻoaʻo ma faasino mai e Iesu lē e tatau ona tatou tatalo i ai.

Sa faataatia e Iesu se faaaʻoaʻoga mo i tatou e mulimuli i ai, e ala i le tatalo atu i lona Tamā i le lagi

LANA AʻOAʻOGA: Na talosaga atu se tasi o soo iā Iesu: “Le Alii e, ia e aʻoaʻo mai iā i matou i le tatalo.” Na tali mai Iesu: “Pe a outou tatalo, ia faapea atu, ʻLo matou Tamā e.’” (Luka 11:1, 2) I lana Lauga i le Mauga, na timaʻi atu ai Iesu i lana ʻaufaalogologo: ʻIa tatalo atu i lo outou Tamā.’ Na ia toe faamautinoa atu iā i latou e faapea: ʻUa silafia e lo outou Tamā o i le lagi mea o loo outou manaʻomia, ae tou te leʻi talosaga atu.’ (Mataio 6:6, 8) I le pō mulimuli a o leʻi maliu Iesu, na fetalai atu i ona soo: “Afai e tou te talosaga atu i le Tamā i se mea, e na te foaʻi mai iā te outou i loʻu igoa.” (Ioane 16:23) Na aʻoaʻo e Iesu i tatou ia tatalo atu i lona Tamā ma lo tatou Tamā, o Ieova le Atua.​—Ioane 20:17.

LANA FAAAʻOAʻOGA: Ina ia ōgatusa ma le auala na ia aʻoaʻo isi e tatalo ai, na tatalo Iesu: “Ou te vivii atu iā te oe i luma o tagata, loʻu Tamā e, le Alii o le lagi ma le lalolagi.” (Luka 10:21) I se tasi taimi, na “tepa aʻe Iesu i le lagi, ma faapea atu: ʻLoʻu Tamā e, ou te faafetai atu iā te oe ona ua e faafofoga mai iā te aʻu.’” (Ioane 11:41) A o lata ina maliu, na tatalo o ia: “Loʻu Tamā e, ou te tuuina atu loʻu agaga i ou aao.” (Luka 23:46) Ua faataatia e Iesu se faaaʻoaʻoga lelei e tatou te mulimuli i ai, e ala i le tatalo atu i lona Tamā o i le lagi, o le “Alii o le lagi ma le lalolagi.” (Mataio 11:25; 26:41, 42; 1 Ioane 2:6) Po o le auala lenā sa tatalo ai soo o Iesu?

O AI SA TATALO I AI ULUAʻI KERISIANO?

Ina ua mavae ni nai vaiaso talu ona toe afio Iesu i le lagi, na taufaifai ma taufaamataʻu tagata tetee i ona soo. (Galuega 4:18) E mautinoa lava na tatalo ona soo mo se fesoasoani. Ae o ai na latou tatalo i ai? ʻNa latou tatalo atu i le Atua ma le lotogatasi,’ ina ia faaauau ona fesoasoani mai iā i latou “e ala i le suafa o [lana] auauna paia o Iesu.” (Galuega 4:24, 30) O lea la, na mulimuli soo i taʻiala a Iesu i le tatalo. Na latou tatalo i le Atua, ae e lē o Iesu.

I tausaga mulimuli ane, na faamatala ai e le aposetolo o Paulo le auala na latou tatalo ai ma ana aumea. Na tusi atu o ia i Kerisiano e faapea: “Matou te faafetai e lē aunoa i le Atua le Tamā o lo tatou Alii o Iesu Keriso, pe a matou tatalo mo outou.” (Kolose 1:3) Na tusi foʻi Paulo i ona uso talitonu e faapea sa ia “avatu le faafetai i lo tatou Atua o le Tamā, i le suafa o lo tatou Alii o Iesu Keriso mo mea uma lava.” (Efeso 5:20) I nei faamatalaga,  ua tatou iloa ai sa faalaeiau e Paulo isi ia tatalo i le ʻAtua le Tamā mo mea uma lava,’ ae ia auala atu i le suafa o Iesu.​—Kolose 3:17.

I le pei o uluaʻi Kerisiano, e mafai ona faaalia lo tatou alofa mo Iesu e ala i le utagia o ana fautuaga i le auala e tatalo ai. (Ioane 14:15) Pe a tatalo atu tau lava o lo tatou Tamā i le lagi, o le a atili ai ona tatou mautinoa e faafofoga mai o ia, ma o le a pei o tatou faalogona o le faisalamo, o lē na faapea mai i le Salamo 116:1, 2: ʻOu te alofa iā Ieova, auā e faafofoga mai i loʻu leo. Ou te valaau atu iā te ia i aso uma o loʻu ola.’ *

^ pala. 3 Ua taʻua i le Tusi Paia e lē tutusa le Atua ma Iesu. Mo nisi faamatalaga, tagaʻi i le mataupu e 4 o le tusi O ā Aʻoaʻoga Moni a le Tusi Paia? lomia e Molimau a Ieova.

^ pala. 11 Ina ia talia e le Atua a tatou tatalo, e tatau ona tatou taumafai malosi e ola e ōgatusa ma mea ua ia faafinagaloina. Mo nisi faamatalaga, tagaʻi i le mataupu e 17 o le tusi O ā Aʻoaʻoga Moni a le Tusi Paia?