Alu i mataupu o loo iai

Alu i le lisi o mataupu

 MATAUPU AUTŪ | E MAFAI ONA E MĀFANA ATU I LE ATUA

Po o E Māfana Atu i le Atua?

Po o E Māfana Atu i le Atua?

“E te lagona le malupuipuia ma le fiafia pe a iai se faiā māfana ma vavalalata ma le Atua. E te lagona e peiseaʻī o loo faaauau ona uaʻi mai o ia mo lou lelei.”​—CHRISTOPHER, O SE ALII TALAVOU I GHANA.

“E silafia e le Atua ou mafatiaga, ma e alofa ma manatu mamafa mai.”​—HANNAH, O SE TAMAʻITAʻI E 13 TAUSAGA MAI I ALASKA, IUNAITE SETETE.

“O le iloaina o loo iai sa oulua faiā māfana ma le Atua, o se faalogona e matuā tautele ma maua ai le toʻafilemu.”​—GINA, O SE TINĀ I JAMAICA E PE Ā MA LE 45 ONA TAUSAGA.

E lē na o Christopher, Hannah, ma Gina e iai faalogona faapena. E toʻatele tagata e talitonu o loo silasila mai le Atua iā i latou o ni ana uō. Ae faapefea oe? Po o e māfana atu i le Atua? Pe e te manaʻo e mafuta vavalalata atu iā te ia? Atonu e te tomānatu: ʻPe e mafai e tagata ona iai se faiā māfana ma le Atua Silisili Ese? Afai e mafai, e faapefea?’

E MAFAI ONA E MAFUTA VAVALALATA ATU I LE ATUA

Ua taʻua i le Tusi Paia, e mafai ona e maua se faiā māfana vavalalata ma le Atua. O loo faamatala i le Tusi Paia na taʻua e le Atua le augātamā Eperu o Aperaamo o “laʻu uō.” (Isaia 41:8) Seʻi mātau foʻi le valaaulia māfana o loo i le Iakopo 4:8: “Ia outou mafuta vavalalata atu i le Atua, ona mafuta vavalalata mai lea o ia iā te outou.” O lea, e manino mai e mafai ona e maua se faiā vavalalata po o se faauōga ma le Atua. Peitaʻi, e faapefea ona e “mafuta vavalalata” atu i le Atua ma maua se faiā māfana ma ia, ae e lē vaaia o ia?

Ina ia tali lenā fesili, seʻi iloilo le auala e atiaʻe ai se faauōga a ni tagata se toʻalua. E masani ona amata i le iloa e le tasi o le igoa o le isi. Pe a fai ma masani le fetalanoaaʻi, fefaaaliaʻi o la manatu ma faalogona, o le a iʻu ina māfana la laʻua faigāuō. E naunau foʻi le isi e faia mea lelei mo le tasi ma atili faamalosia ai pea le faauōga. E faapena le auala e atiaʻe ai se faiā vavalalata ma le Atua. Seʻi o tatou tilofaʻia le auala e faia ai faapea.