Alu i mataupu o loo iai

Alu i le lisi o mataupu

Peshitta i le Gagana Syriac​—Se Auala e Malamalama ai i le Talafaasolopito o Uluaʻi Faaliliuga o le Tusi Paia

Peshitta i le Gagana Syriac​—Se Auala e Malamalama ai i le Talafaasolopito o Uluaʻi Faaliliuga o le Tusi Paia

I le 1892, na malaga atu ai le masaga o Agnes Smith Lewis ma Margaret Dunlop Gibson, mo le iva aso i kamela e ui atu i le toafa ina ia ō atu ai i le monaseri o St. Catherine, po o le fale o felela i le auvae mauga o Sinai. Aiseā na faimalaga ai lenei ʻauuso e taʻi 40 ma ona tupu o la tausaga, i se ala e lamatia ai le ola i se vaipanoa i le itu i sasaʻe o Asia? O le tali o lenā fesili e ono faamalosia ai lou maufaatuatuaina o le saʻo aʻiaʻi o le Tusi Paia.

O Agnes Smith Lewis ma le monaseri o St. Catherine

A O LEʻI afio Iesu i le lagi, na ia faatonu ona soo e molimau atu e faatatau iā te ia “i Ierusalema, i Iutaia uma ma Samaria, ma tuluʻiga uma o le lalolagi.” (Galuega 1:8) Na molimau atu ona soo ma le maelega ma le lototele. Peitaʻi, o la latou talaʻiga i Ierusalema na mapuna aʻe ai ni teteega ma iʻu ina fasiotia ai Setefano. O le toʻatele o soo o Iesu na sulufaʻi atu i Anetioka i Suria o se tasi o aai telē o le Emepaea o Roma, lea e pe tusa ma le 350 maila (550 kilomita) i le itu i mātū o Ierusalema.​—Galuega 11:19.

Na faaauau ona talaʻi atu e le ʻauaposetolo “le tala lelei” e faatatau iā Iesu i Anetioka, ma na toʻatele tagata e lē o ni Iutaia na avea ma ē e talitonu. (Galuega 11:20, 21) E ui o le gagana Eleni na tautatala ai tagata o le aai i Anetioka, peitaʻi o isi aai uma na siʻomia ai Anetioka na tautatala i le gagana Syriac.

FAALILIUINA LE TALA LELEI I LE GAGANA SYRIAC

Na manaʻomia ona faaliliuina le tala lelei i le gagana Syriac, ina ua faatupulaʻia Kerisiano e tautatala ai i le senituri lona lua. O lea, e foliga mai o le gagana Syriac na muamua faaliliuina ai isi o vaega o Tusitusiga Paia Eleni, ae e lē o le gagana Latina.

 Pe tusa o le 170 T.A., na tuufaatasia ma lomia ai e se tusitala Suria o Tatian (na soifua i le pe tusa o le 120-173 T.A.) tusi Evagelia e fā i le gagana Eleni po o le gagana Syriac. Na taʻua lea tuufaatasiga o le Diatessaron o se upu Eleni o lona uiga, “e ala atu i [Evagelia] e fā.” Mulimuli ane, na faia e Ephraem (na soifua i le pe tusa o le 310-373 T.A.) o se tagata Suria se faamatalaga e faatatau i le Diatessaron, e faamaonia ai sa faaaogāina e Kerisiano Suria le Diatessaron.

E tāua le Diatessaron iā i tatou i aso nei. Aiseā? I le senituri 19, na finau mai ai nisi faitofā e faapea na tusia tusi o Evagelia i le taufaaiʻuiʻuga o le senituri lona lua, i le va o le 130 -170 T.A., ma e ono lē saʻo faamatalaga o le soifuaga o Iesu o loo iai. Peitaʻi, o manusikulipi anamua o le Diatessaron na maua mai i lenā taimi, ua faamaonia ai ua leva ona faaaogā e tagata i le ogatotonu o le senituri lona lua ia tusi o Evagelia o Mataio, Mareko, Luka ma Ioane. O lea, e foliga mai na tusia ia tusi i se taimi muamua atu. E lē gata i lea, ina ua tuufaatasia e Tatian le Diatessaron, e na te leʻi faaaogāina tusi evagelia faa-apokerifa ae e na o tusi e fā o le Evagelia, ma ua faaalia ai e lē maufaatuatuaina tusi evagelia faa-apokerifa.

O uluaʻi tusi e lima o le Tusi Paia i le Peshitta i le gagana Syriac, i le 464 T.A., ma o se manusikulipi e lona lua lona leva i tusitusiga o le Tusi Paia

I le amataga o le senituri lona lima, na tele ina faaaogā ai i le itu i mātū o Mesopotamia se faaliliuga o le Tusi Paia i le gagana Syriac. Atonu na faaliliuina lea Tusi Paia i le senituri lona lua po o le tolu T.A., ma o loo iai tusi uma o le Tusi Paia seʻi vaganā ai le 2 Peteru, tusi e 2 ma le 3 Ioane, Iuta ma le Faaaliga. O lea faaliliuga e taʻua o le Peshitta, o lona uiga o le “Faigofie” pe “Malamalamagofie.” O le Peshitta o se tasi lea o faaliliuga tuai ma e mafai ona faamaonia ai uluaʻi tusitusiga o le Tusi Paia.

O se mea e mataʻina ai, ona o se tasi o manusikulipi o le Peshitta na tusia ai se aso mai i le 459/460 T.A., ma o se manusikulipi e sili ona tuai o le Tusi Paia o loo faamauina le aso na tusia ai. I le pe tusa o le 508 T.A., na toe teuteuina ai le faaliliuga o le Peshitta ma faaaofia ai loa tusi e lima ia na lē iai muamua, ma na taʻua lea faaliliuga o le Philoxenian Version.

MAUA NISI MANUSIKULIPI I LE GAGANA SYRIAC

E oo ane i le senituri 19, e toeitiiti o kopi uma o Tusitusiga Paia Eleni e mai i le senituri lona 5 pe mulimuli ane. O le pogai lea na tāua ai i faitofā o le Tusi Paia uluaʻi faaliliuga e pei o le Vulgate i le gagana Latina, ma le Peshitta i le gagana Syriac. Na manatu nisi o le Peshitta o se toe teuteuga lea o se isi faaliliuga tuai, peitaʻi e leʻi iai se isi faaliliuga tuai na maua i lenā taimi. Talu ai na amata faaliliu le Peshitta i le senituri lona lua, ua avea ai la lea faaliliuga o se auala e malamalama ai i uluaʻi tusitusiga o le Tusi Paia. E mautinoa foʻi le tāua o lea Tusi Paia i faitofā. Ae pe sa iai moni lava se isi faaliliuga tuai o le Tusi Paia i le gagana Syriac?

O le manusikulipi o le Sinaitic Syriac. I le pito o lenei manusikulipi, o loo tau olaola mai ai tusitusiga mai i tusi o Evagelia

Ioe, auā na maua nisi manusikulipi tāua se lua i le gagana Syriac. O le manusikulipi muamua e mai i le senituri lona lima, ma na iai i se faaputuga o manusikulipi i le faa-Syriac lea na maua e le falemataʻaga o le British Museum mai i le monaseri i Nitrian Desert i Aikupito i le 1842. Ua taʻua lea manusikulipi o le Curetonian Syriac ona na maua ma faasalalauina e William Cureton, o lē sa fesoasoani e vaaia manusikulipi a le falemataʻaga. O loo i lea manusikulipi tusi e fā o Evagelia i lona faasologa o Mataio, Mareko, Ioane ma Luka.

O le manusikulipi lona lua o le Sinaitic Syriac, ma o loo iai pea e oo mai i le taimi lenei. Na maua e le masaga o loo taʻua i le amataga o lenei mataupu. E ui e leʻi iai se faailoga o Agnes mai i se iunivesite, ae na ia aʻoaʻoina ni gagana se valu lea e aofia ai ma le gagana Syriac. O le 1892, na maua  ai e Agnes se manusikulipi tāua i le monaseri o St. Catherine i Aikupito.

I totonu o se pusatū, na ia maua ai se manusikulipi i le gagana Syriac. E tusa ai ma lana faamatalaga, o lenei manusikulipi “e ese le matagā auā ua matuā palapalā ma pipii ona itulau ona e leʻi toe susuʻeina” mo ni senituri. Ua tapē ese uluaʻi tusitusiga na iai, ae toe tusi ai ni tusitusiga faa-Syriac e faatatau i sagata. Peitaʻi, na mātauina e Agnes o loo tau olaola mai pea nisi o upu e pei o le “Mataio,” “Mareko” ma “Luka” i le pito i luga o itulau. O lea manusikulipi e toeitiiti iai uma tusi o Evagelia i le gagana Syriac. Ua manatu nisi faitofā, o lenei manusikulipi na tusia i le faaiʻuga o le senituri lona fā.

O le Sinaitic Syriac o se tasi lea o manusikulipi e sili ona tāua e pei foʻi o manusikulipi Eleni o le Codex Sinaiticus ma le Codex Vaticanus. E foliga mai o manusikulipi o le Curetonian ma le Sinaitic o kopi aupito i leva ia, e mai i tusi o Evagelia i le gagana Syriac lea e mai i le faaiʻuga o le senituri lona lua po o le amataga o le senituri lona tolu.

“O LE AFIOGA A LO TATOU ATUA E TUMAU LEA E FAAVAVAU”

Pe e aogā nei manusikulipi i tagata aʻoga o le Tusi Paia i aso nei? Ioe. O se faataʻitaʻiga, i nisi Tusi Paia, o loo iai se faaiʻuga umi o le Evagelia a Mareko, po o nisi fuaiupu faaopoopo pe a uma le Mareko 16:8. E maua lea faaiʻuga umi i le Greek Codex Alexandrinus mai i le senituri lona lima, o le Vulgate i le gagana Latina, ma isi manusikulipi. Peitaʻi, e lē iai lenā faaiʻuga umi i manusikulipi Eleni maufaatuatuaina mai i le senituri lona fa, e pei o le Codex Sinaiticus ma le Codex Vaticanus. E lē maua foʻi i le Sinaitic Syriac, ma ua faamaonia atili mai ai o lenei faaiʻuga umi o se mea na mulimuli ane faaopoopo i le Evagelia a Mareko.

O se isi faataʻitaʻiga, i le senituri 19, e toetoe o faaliliuga uma o le Tusi Paia o loo iai se manatu faaopoopo i le 1 Ioane 5:7, ma ua lagolagoina ai le aʻoaʻoga sesē o le Tolutasi. Peitaʻi, e lē o iai lenā manatu faaopoopo i manusikulipi Eleni tuai ma le Peshitta. O na faamaoniga ua iloa ai, o manatu faaopoopo o loo i le 1 Ioane 5:7 ua suia ai le aʻoaʻoga moni a le Tusi Paia.

Ua faaalia ai le moni o le folafolaga a Ieova le Atua e na te faasaoina lana Afioga le Tusi Paia. Ua ia faamautinoa mai: “Ua mago le mutia muʻamuʻa, ua mamae le fuga o le laau; ae o le afioga a lo tatou Atua e tumau lea e faavavau.” (Isaia 40:8; 1 Peteru 1:25) E ui i le faatauvaa o lenei faaliliuga o le Peshitta, ae ua faia sona sao tāua i le faaliliuina ma le saʻo o le feʻau o loo i le Tusi Paia mo tagata.