“O LE Atua o le Agaga,” ma e lē mafai e mata o tagata ona vaaia. (Ioane 4:24) Peitaʻi, ua faailoa mai i le Tusi Paia e iai nisi na peiseaʻī ua latou iloa atu le Atua. (Eperu 11:27) E faapefea ona tupu lenā mea? Pe e mafai ona e vaai moni i “le Atua lē vaaia”?​—Kolose 1:15.

Seʻi mafaufau i se tagata na fanau mai lava o pō lana vaai. Pe avea lona tauaso ma māfuaaga o le a matuā lē iloa ai lava mea uma? E mautinoa e leai. E tele auala e mafai ona maua ai e le tagata tauaso faamatalaga ina ia mafai ai ona iloa se tagata, mea faitino ma ni gaoioiga o loo fai. Ua faapea mai se tasi tamāloa tauaso: “E lē mafai ona ou vaai i oʻu mata, ae peitaʻi ou te vaai i loʻu mafaufau.”

I se tulaga talitutusa, e lē mafai ona tatou vaai i le Atua i mata faaletino, ae e mafai ona faaaogā ʻmata o tatou loto’ e iloa ai o ia. (Efeso 1:18) Seʻi o tatou iloiloina ni auala se tolu e mafai ona faia ai faapea.

O le tagata tauaso, e maʻati lana faalogo ma e vave lona lagonaina o mea e paʻi i ai, lea e na te iloa ai mea e lē o vaaia e ona mata. I se tulaga talitutusa, e mafai ona e faaaogā ou lagona faaletino e iloilo ai mea o loo siʻomia ai oe, ma mafai ai ona e iloa le Atua lē vaaia lea na foafoaina na mea. “Auā o ona uiga lē vaaia, ua vaaia lava ia talu ona foafoaina le lalolagi, ona ua mafai ona vaaia i mea na faia.”​—Roma 1:20.

O se faataʻitaʻiga, seʻi mafaufau i le tulaga tutasi o le foafoaina o lo tatou lalolagi. E leʻi tau ina foafoaina e maua ai le ola, ae ina ia nofo ma olioli ai le tagata. Pe a e lagonaina le agi malu o le matagi, o le māfanafana o o le susulu o le lā, o le tofo susua o se fualaau faisua, pe faalogoina foʻi le tausagi o manufelelei, e mautinoa le faagaeetia ai o i tatou. Pe e lē o faaalia i nei meaalofa le manatu alofa mai o Lē na foafoaina mea iā i tatou?

O le ā e te aʻoaʻoina mai i mea o loo e vaai ai i le vateatea e faatatau i le Atua? Ua faaalia e le lagi le mamalu o le Atua. Ua faamaonia mai faasaienisi, e lē gata o loo faaauau ona tupu le vateatea ae e saosaoa foʻi le auala o loo tupu ai. Pe a e tepa aʻe i lagi i se pō maninoa, seʻi mātau: ʻO ai le puna o le malosi ua māfua ai ona tupu ma vave le memeʻi o le vateatea?’ Ua taʻu mai e le Tusi Paia iā i tatou, o Lē na foafoaina mea e ʻmataʻutia lona malosi.’ (Isaia 40:26) O foafoaga a le Atua ua faailoa mai ai o ia o “Lē e ona le malosi uma lava,” ua na o ia foʻi “e silisili lona mana.”​—Iopu 37:23.

Na faapea mai le tinā o ni tamaiti tauaso se toʻalua: “O le faamatala atu o mea, o se tasi lenā o vala tāua e mafai ona latou malamalama ai. Ia faailoa atu iā i latou mea uma e te vaai ma faalogo i ai, e tusa lava po o fea e tou te ō i ai. Ua avea oe ma o latou mata.” I se tulaga tutusa, o le Alo o le Atua o Iesu “o loo i le fatafata o le Tamā, o ia ua na faamatalaina mai le Tamā” auā ʻe leai lava se tasi ua vaai i le Tamā.’ (Ioane 1:18) O Iesu o le uluaʻi foafoaga a le Atua, o le Alo pele e toʻatasi, ma ua avea ai o ia ma o tatou “mata” i mea i le lagi. O ia e tatou te maua ai faamatalaga moni e faatatau i le Atua e lē vaaia.

Seʻi mātau nisi o faamatalaga a Iesu e faatatau i le Atua, auā e faitau piliona tausaga o faatasi o ia ma le Atua:

• E galue mamafa le Atua. “O loo galue loʻu Tamā e oo mai i le aso nei.”​—Ioane 5:17.

• E silafia e le Atua o tatou manaʻoga. “Ua silafia e le Atua, o lo outou Tamā o i le lagi mea o loo outou  manaʻomia, ae tou te leʻi talosaga atu.”​—Mataio 6:8.

• E lotofoaʻi le Atua ma saunia mea mo i tatou. “O lo outou Tamā o i le lagi, o lē na te faaoso lona lā i ē e amioleaga ma ē e amiolelei, ma faatotō mai le timu i ē e amiotonu ma ē e amiolētonu.”​—Mataio 5:45.

• E tāua i tatou taʻitoʻatasi i le Atua. “Po ua lē faatauina atu ea ni tamaʻi manulele se lua i se tupe itiiti? Ae pe a paʻū se tasi o na tamaʻi manulele i le eleele, e silafia lava e lo outou Tamā. E oo foʻi i o outou lauulu, ua faitaulia uma. O lea la, aua neʻi outou fefefe: E sili atu ona tāua outou nai lo o tamaʻi manulele e tele.”​—Mataio 10:29-31.

E eseese auala e mafaufau ai le tagata tauaso mai i le tagata e lelei lana vaai. E mafaufau le tagata tauaso a taʻu se mea paolo, e lē o se ata lafoia o se mea ae o se nofoaga malū. I le pei o le tagata tauaso, e lē mafai ona ia vaaia le paolo po o le malamalama. E faapena foʻi lo tatou tulaga, e lē mafai ona tatou malamalama i le Atua e aunoa ma se fesoasoani. O lea, ua auina mai ai e Ieova se tasi e na te faaalia atoatoa mai Ona uiga ma le ituaiga o Atua e i ai o ia.

O ia lenā o Iesu. (Filipi 2:7) E lē gata na faamatala atu e Iesu i isi lona Tamā, ae na ia faailoa atu foʻi le ituaiga Atua e iai o ia. Na talosaga atu le soo o Iesu o Filipo: “Le Alii e, ia e faailoa mai iā i matou le Tamā.” I lana tali na taʻua ai e Iesu e faapea: “O lē ua vaai mai iā te aʻu, ua vaai foʻi o ia i le Tamā.” (Ioane 14:8, 9) E faapefea ona e “vaai” i le Tamā e ala i gaoioiga a Iesu?

O uiga o Iesu e aofia ai le māfana, lotomaulalo, ma faigofie ona talanoa atu i ai isi. (Mataio 11:28-30) O ona uiga lelei sa avea ma mea e tosina atu ai tagata iā te ia. Na ootia faalogona o Iesu pe a mafatia se tasi, ma sa olioli foʻi o ia faatasi ma tagata. (Luka 10:17, 21; Ioane 11:32-35) Pe a e faitau pe faalogo foʻi i tala e faatatau iā Iesu o loo i le Tusi Paia, taumafai e faaata i lou mafaufau ma lagona moni mea o loo tutupu. Pe a e manatunatu i le auala na feutagaʻi ai Iesu ma tagata, o le a e matuā manino ai i uiga lelei o le Atua, ma e fiafia ai e faalatalata atu iā te ia.

Ina ia malamalama se tagata tauaso i se mea, na taʻua e se tasi o tusitala e faapea: “E na te faaaogāina lagona eseese (paʻi, sogisogi, faalogo, ma isi lagona faapena) e aoao mai ai faamatalaga taʻitasi, ma tuufaatasia ina ia iloa ai le ata atoa o se mea.” E faapena foʻi lo tatou tulaga, faatoʻā o tatou vaaia le matagofie o Ieova pe a tatou mātauina ana foafoaga, faitau i tala e uiga iā te ia lea na taʻua e Iesu, ma iloilo le auala na faaalia ai e Iesu Ona uiga. O le a moni ai foʻi o Ia iā te oe.

Na iloa e Iopu o lē na soifua i aso anamua lenā mea moni. I le taimi muamua sa tautala Iopu ma le ʻlē malamalama’ e uiga i le Atua. (Iopu 42:3) Peitaʻi, ina ua māeʻa ona ia iloiloina ma le faaeteete galuega ofoofogia o le foafoaga, na toe faapea mai Iopu: “Ua faalogo oʻu taliga e uiga iā te oe, A o lenei ua vaai atu oʻu mata iā te oe.”—Iopu 42:5.

E mafai foʻi ona e faia faapea. “Afai e te saʻili iā te ia, ona e maua lea o ia.”(1 Nofoaiga a Tupu 28:9) E fiafia Molimau a Ieova e fesoasoani atu iā te oe e saʻili ma iloa le Atua lē vaaia.