Na soifua aʻe Samita * o se fafine e 35 ona tausaga i Dhaka i Bangladesh, o sē e alofa ma loto fesoasoani i tagata. E iloa o ia o se fafine galue mamafa, ma e naunau e aʻoaʻo tagata e faatatau i le Atua. Peitaʻi, sa matuā faateʻia ona tauaiga ma ana uō ina ua maʻi ma oo ai lava ina maliu, a o leʻi atoa se vaiaso.

O Iakopo ma lana avā, o se ulugalii talavou e taʻi 30 o la tausaga e pei foʻi o la talaaga o Samita. Sa asiasi atu i a la uō i le itu i sisifo o Amerika i le vaitau e totogo ai laau, peitaʻi e leʻi toe foʻi ifo lava i lo la aiga i Niu Ioka. Sa aafia i laʻua i se faalavelave tau taavale mataʻutia, ma na matuā faateʻia ai a la uō, tauaiga ma ē latou te faigaluega faatasi.

Ua faatupulaʻia le tutupu o mea leaga ma puapuaga e oo lava foʻi i lo tatou vaipanoa. Ua faapogaia e taua le maliliu o tagata lautele ma fitafita. O soligatulafono ma faiga sauā ua aafia ai foʻi ma ē e lē sala. O faalavelave faafuaseʻi, mala faalenatura ma faamaʻi mataʻutia ua aafia ai tagata uma e tusa lava po o le ā le matutua. Ua faateteleina le faailoga lanu ma faiga lē tonu, ma atonu na e aafia totino ai i se tasi o nei tulaga.

O lea, e masani ona tatou tuufesili e faapea:

• Aiseā ua tutupu ai mea leaga i tagata lelei?

• Pe e tuuaʻia le Atua i nei mea leaga?

• Pe e teʻi lava ua tutupu mala pe māfua mai ona o tagata?

• Pe e māfua mai puapuaga ona o le tulafono o le Karma, lea e faapea mai o le iʻuga lea o ni gaoioiga a se tasi i se isi olaga na ola ai muamua?

• Pe afai e iai se Atua e ona le malosi uma lava, aiseā la ua ia lē puipuia ai tagata lelei mai i le aafia i mea leaga?

• Faamata e iai se taimi o le a lē toe tutupu ai ni puapuaga ma mea leaga i le olaga?

Ina ia taliina nei fesili, e lua ni vala e tatau ona tatou malamalama i ai: Aiseā ua tutupu ai mea leaga, ma o le ā le gaoioiga o le a faia i ai e le Atua?