PE AFAI o oe o se mātua, e te malamalama la i faalogona o loo taʻua i luga. Pe a e fesagaʻia tulaga faapena, pe e te taumānatu po o le ā se auala e avatu ai se aʻoaʻiga, ae pe e tatau foʻi ona aʻoaʻi o ia? Pe e leaga le aʻoaʻi o lau fanau?

I le Tusi Paia o le upu “aʻoaʻi” e lē uiga atu i le na o le faasala, peitaʻi e uiga atu foʻi i le faatonu, aʻoaʻo, ma le avatu o faasaʻoga. E lē o faasino atu i le faileagaina po o le sauā.​—Faataoto 13:18.

O le aʻoaʻiga faamātua e mafai ona faatusaina i le faia o se togālaau. E sua e le faitogālaau le palapala, faasūsū, tuu iai le faalelei eleele, puipuia mai i manu faalafuā ma vele ese le vao. A o tuputupu aʻe le laau, e manaʻomia e le faitogālaau ona teuina le laau ina ia tupu lelei ai. E na te saʻilia foʻi metotia eseese e fesoasoani i le tausia lelei o laau. I se tulaga tutusa, e faaaogā e mātua ni auala eseese e tausia aʻe ai a latou fanau. Ae e tatau foʻi ona avatu ni aʻoaʻiga, lea e pei o le sala ese o ni lālā leaga, atonu o le faasaʻoina o ni faanaunauga leaga a o tuputupu aʻe, ma fesoasoani iā i latou ina ia avea ma fanau lelei. Peitaʻi, e tatau ona faaeteete i le auala e teuina ai se laau neʻi ola faalautagitagi. E faapena foʻi le auala e avatu ai e mātua se aʻoaʻiga, ia faia i se auala alofa.

Ua faataatia e Ieova le Atua se faaaʻoaʻoga lelei mo mātua. O aʻoaʻiga e na te avatu i ona tagata tapuaʻi usiusitaʻi, e aogā ma manaʻomia, auā e iʻu ai ina latou “naunau i mea ua aʻoaʻoina” pe aʻoaʻiina ai. (Faataoto 12:1) E latou te ʻtaofimau i upu ua aʻoaʻoina,’ ma ia “aua neʻi faamaamuluina.” (Faataoto 4:13) E mafai ona e fesoasoani i lau fanau e talia le aʻoaʻiga e ala i le faaaʻoaʻo  o auala nei e fai ai aʻoaʻiga a Ieova. O le auala (1) alofa (2) fuafua lelei (3) maumauaʻi.

O le alofa o le faavae ma le uunaʻiga lea o aʻoaʻiga a Ieova. Ua faapea mai le Tusi Paia: “E aʻoaʻia e Ieova o lē e alofa i ai, e pei foʻi ona faia e le tamā i lona atalii o lē ua ia alofa i ai.”(Faataoto 3:12) E lē gata i lenā, o Ieova o lē “e alofa mutimutivale ma alofa fua, e telegese lona toʻasā.” (Esoto 34:6) O lea, e lē taitai ai ona inainā pe faasauā Ieova. E na te lē faaaogā ni upu faatigā pe faitio naʻuā, po o le faia foʻi o ni upu faalumaluma ia ʻe pei o le tutuʻi i le pelu.’​—Faataoto 12:18.

E lē mafai e mātua ona faaaʻoaʻo atoatoa iā Ieova i le faaalia o le pulea o i latou lava. E iai taimi e lē lava ai le onosaʻi, afai e tupu lenā mea, ia manatua lelei o faasalaga e faia ona o le ita e masani ona soona fai, mamafa naʻuā, ma e lē iʻu lelei. O lea, o faasalaga e uunaʻia ona o le ita, e lē o se aʻoaʻiga ae o le lē pulea lelei o ou faalogona.

I le isi itu, pe a avatu se aʻoaʻiga e faavae i le alofa ma le pulea lelei, e te maua iʻuga lelei. Seʻi mātau le auala na aʻoaʻi ai e George ma Nicole o loo taʻua i le amataga a la fanau.

Na faapea mai George: “Ina ua taunuu mai Jordan i le fale, na tumu i maʻua i le lē fiafia, ae na ma onosaʻi lava a o faamatala mai le māfuaaga o lona tuai mai. Talu ai ua leva le afiafi, na ma filifili ai seʻi talanoa lelei i le taeao e sosoo ai. Na matou tatalo faatasi a o leʻi momoe. Ina ua malama le isi aso, ua saunia lelei o ma mafaufau e talanoa ai le mataupu, ina ia pāʻia le loto o le ma tama. Na lotomalie e usitaʻia le ma faatonuga, ma talia āuga o lona lē usitaʻi. Na ma aʻoaʻoina mai ai, o le vave faia o se faaiʻuga a o ita, e lē iʻu lelei. Ae o le faalogologo muamua, e masani lava ona taulau manuia.”

Na faapea mai Nicole: “Na tau lē mau laʻu ʻafa ina ua ou vaaia le oi o laʻu tama teine lea na tā e lona tuagane. Nai lo o le vave ona faia o se faaiʻuga, na ou tulia ai laʻu tama tama e alu i lona potu seʻia teʻa loʻu ita. Ina ua saga tonu loʻu mafaufau, ona ou faamatala atu lea ma le maumauaʻi iā te ia le leaga o lana gaoioiga na fai i lona tuafafine, ma e lē talafeagai ona faaalia le uiga faasauā. Na aogā le auala na aʻoaʻi ai o ia. Na ia toe faatoese i lona tuafafine ma opo iā te ia.”

Ioe, o aʻoaʻiga talafeagai e ao ona uunaʻia e le alofa, e tusa lava pe e aofia ai ma se faasalaga.

O aʻoaʻiga a Ieova e fai “faatatau” pe e fuafua lelei. (Ieremia 30:11; 46:28) E iloilo e Ieova itu uma e aofia ai mea e faigatā ona iloa atu. E faapefea la ona faaaʻoaʻo i ai mātua? Na faamatala mai e Stephen lea na taʻua i le amataga e faapea: “E ui i lo ma lē fiafia ma lē malamalama i le māfuaaga na faafiti oti ai Natalie e faatatau i le mama, ae na ma iloiloina lona tulaga ma lona matua o iai.”

Na taumafai Robert le tane a Nicole e iloilo itu uma. Pe a lē usitaʻi se tasi o lana fanau, e fesili ifo iā te ia lava:ʻPo ua faatoʻā tupu lea uiga leaga po ua fai soo? Pe māfua ona o lona lē lavā, po ua faamaʻimaʻi foʻi? O le ā tonu le pogai o lona faia o lea gaoioiga?’

O mātua e faautauta e ao ona manatua o tamaiti e lē o ni tagata matutua. Na taʻua lenā tulaga e le aposetolo o Paulo i lana tusi e faapea: “A o oʻu laʻitiiti, sa ou tautala faatamaitiiti, mafaufau faatamaitiiti, ma manatunatu faatamaitiiti.” (1 Korinito 13:11) Na faapea mai Robert: “O le mea na fesoasoani iā te aʻu e faasaʻo ai loʻu mafaufau ma lē soona mateletele ai, o le manatua lea o mea na ou faia foʻi a o ou tamaitiiti.”

E tāua ona e iloa mea e mafai ona faia e lau fanau, ae i le taimi e tasi, aua le manatu māmā i mea sesē e latou te faia. O le iloa o mea e mafai ona latou faia ma mea e lē mafai ona fai, o le a e faamautinoa ai ua saʻo ma fetaui le aʻoaʻiga e avatu.

Ua faapea mai le Malaki 3:6: “O aʻu o Ieova; ou te lē liliu lava.” E iloa e auauna a le Atua le maufaatuatuaina o lenei manatu. E maua foʻi e fanau aogā pe a maumauaʻi mātua e avatu aʻoaʻiga. Ae afai e femoumouaʻi mātua i le avatuina o aʻoaʻiga, e ono fenuminumiaʻi ma lē fia faalogo ai le fanau.

Ia manatua na fetalai Iesu: “Ia avea la outou upu o le Ioe, ia Ioe; ma le Leai, ia Leai.” E faatatau atu foʻi lenā manatu i le tausia aʻe o fanau. (Mataio 5:37) Ia maumauaʻi e faataunuu so o se folafolaga e te faia i lau fanau. Pe afai e te lapataʻia lau fanau i se faasalaga e oo i ai pe a lē usitaʻi, ia maumauaʻi e faataunuu.

E tāua le lelei o fesootaʻiga a mātua ina ia maumauaʻi ai i a la faaiʻuga. Na faapea mai Robert: “Pe afai e taumafai laʻu fanau ina ia ou ioe atu i se mea na faasā e laʻu avā ae ou te lē iloa, ou te toe suia laʻu faaiʻuga ina ia lagolago ai laʻu avā.” Pe afai e lē malilie faatasi mātua i se auala e taulima ai se faafitauli, e lelei ona talanoa na o i laʻua ina ia tasi ai le la faaiʻuga.

Pe afai e te faaaʻoaʻo iā Ieova i le avatuina o aʻoaʻiga i se auala alofa, fuafua lelei ma le maumauaʻi, e mafai ona e mautinoa o le a aogā foʻi i lau fanau. O lau aʻoaʻiga alofa, e ono fesoasoani i lau fanau ina ia tutupu aʻe o ni tagata matutua e maufaatuatuaina, ma iloa fuafua lelei le olaga. Ua faapea mai le Tusi Paia: “Ia aʻoaʻo le tama e tusa ma le ala saʻo; a oo ina toeaina lava e lē liliuese ai o ia.”​—Faataoto 22:6.