Alu i mataupu o loo iai

Alu i le lisi o mataupu

MATAUPU AUTŪ

O Mea ua Faia e le Atua mo Oe

O Mea ua Faia e le Atua mo Oe

“Ona o le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”​—Ioane 3:16.

O se tasi lenei o mau o le Tusi Paia e fiafia le toʻatele o tagata e faaaogā. Ua faapea mai nisi, e na o le pau lea o le mau ʻe sili ona manino le auala e faamatalaina ai le faiā a le Atua ma tagata, faapea le auala e maua ai le faaolataga.’ O le māfuaaga lea i le tele o atunuu, e masani ona vaaia lenei mau o tusi i puipui o fale, faapipii i taavale ma isi mea.

E manatu i latou o loo faia nei gaoioiga, o le alofa o le Atua o le a mautinoa ai lo latou faaolataga. Ae faapefea oe? O le ā le uiga o le alofa o le Atua iā te oe? Faamata o le ā se mea ua faia e le Atua e faaalia ai lona alofa mo oe?

“O LE ALOFA TELE O LE ATUA I LE LALOLAGI”

E viiviia e le toʻatele o tagata le Atua i mea na ia faia, e pei o le lalolagi paneta, siʻosiʻomaga ma tagata. Pe a manatunatu i le lavelave ma le maoaʻe o le auala na foafoaina ai meafaiola, e mautinoa lava e iai se tasi e sili atu ona atamai na faia nei mea. E faafetaia e le toʻatele i aso taʻitasi le Atua mo le meaalofa o le ola. E latou te iloa, ina ia maua pea le ola ma le fiafia, e latou te manaʻomia le tausiga a le Atua, lea e ala mai i le ʻea o loo mānavaina, meaʻai, vai faapea le faataamilosaga o mea i le natura.

E tatou te faafetaia le Atua mo nei mea uma, auā o ia o Lē na foafoaina i tatou ma o Lē faatumauina lo tatou ola. (Salamo 104:10-28; 145:15, 16; Galuega 4:24) E tatou te talisapaia lona alofa, pe a manatunatu i mea uma na ia faia ina ia tatou maua ai pea le ola. Ua faapea mai le aposetolo o Paulo: ʻUa foaʻi mai e le Atua i tagata uma le ola, ma le mānava, ma mea uma lava. Auā o ia ua tatou ola ai, gaoioi ai, ma ua tatou iai foʻi ona o ia.’​—Galuega 17:25, 28.

Peitaʻi, e lē na o le tausiga faaletino o loo faaalia mai ai le alofa o le Atua iā i tatou. Ua ia faasilia ma faamamaluina i tatou mai i isi ana foafoaga, e ala i le tuuina mai o se faanaunauga mo mea faaleagaga, ma fesoasoani mai ina ia faamalieina lenā faanaunauga. (Mataio 5:3) O lea, ua maua ai e tagata usiusitaʻi le avanoa e avea ai o se vaega o le aiga o le Atua, ma ua taʻua ai i latou o lana “fanau.”​—Roma 8:19-21.

O loo faamatalaina atili i le Ioane 3:16, o le alofa o le Atua na ia auina mai ai lona Alo o Iesu. Na auina mai Iesu ina ia aʻoaʻo i tatou e faatatau i lona Atua, faapea le māfuaaga na maliu ai o ia mo i tatou. Peitaʻi, ua faapea mai nisi e latou te lē o malamalama i le māfuaaga na tatau ai ona maliu Iesu mo tagata, ma pe e faapefea i lona maliu ona atagia mai ai le alofa o le Atua. Seʻi o tatou iloiloina le faamatalaga a le Tusi Paia e faatatau i le māfuaaga na maliu ai Iesu, ma le tāua o lona maliu.

ʻNA IA FOAʻI MAI LONA ATALII E TOʻATASI’

E leai se tagata e sao mai i maʻi o le tino, le soifua matua ma le oti. Peitaʻi, e lē o le fuafuaga lenā a le Atua sa iai i le amataga. Na ia tuuina atu i le uluaʻi ulugalii le faamoemoe e ola ai e faavavau i se lalolagi parataiso. Ae e tasi le mea sa tatau ona la faia: Sa tatau ona la usiusitaʻi i le Atua. Pe afai e la te lē faia faapea, o le a la feoti. (Kenese 2:17) Na fouvale le uluaʻi tagata i le pule a le Atua, ma o lea na oo ai le oti iā te ia ma tuufaasolo mai ai i lana fanau. Ua faapea mai le aposetolo o Paulo i le Roma 5:12: “E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.”

Peitaʻi, ʻe fiafia le Atua i le faamasinogatonu.’ (Salamo 37:28) E ui lava sa faasalaina e le Atua le uluaʻi tagata ona o lana agasala na faia ma le loto iai, ae e lē faapea ai o le a ia faasalaina e faavavau tagata uma i puapuaga ma le oti ona o le lē usiusitaʻi o lenā tagata e toʻatasi. Nai lo lea, ua ia faaaogā le taʻiala faaletulafono o le ʻavatu o le ola e sui ai le ola’ ina ia faaalia ai lana faamasinogatonu, ma toe tuu mai ai le avanoa i tagata usiusitaʻi e maua ai le ola e faavavau. (Esoto 21:23) E faapefea la ona toe maua mai le ola lelei atoatoa lea na leiloa iā Atamu? O le tali: E tatau ona ofoina atu e se tasi lona ola o se taulaga, ma e tatau ona lelei atoatoa e pei o le ola sa iā Atamu.

Na lotomalie Iesu e afio mai i le lalolagi, e foaʻi mai lona ola ina ia faasaoina ai tagata mai i le agasala ma le oti

E leai se tasi e agavaa e ofoina atu lona ola, ua na o Iesu o se tasi foʻi e lelei atoatoa. (Salamo 49:6-9) Na fanau mai o ia e aunoa ma le aafia i le agasala lea na tuufaasolo mai iā Atamu. O le ofoina atu e Iesu o lona ola, na ia faasaʻolotoina ai le fanau a tagata mai le nofo pologa i le agasala, ma tuuina mai ai i tagata le avanoa e toe maua ai le ola lelei atoatoa lea sa leiloa i le uluaʻi ulugalii. (Roma 3:23, 24; 6:23) O lea, o le ā e manaʻomia ona tatou faia ina ia maua ai aogā mai lenā faailoaga sili o le alofa?

ʻO TAGATA UMA E FAATUATUA IĀ TE IA’

Mātau upu o loo taʻua i le Ioane 3:16, “ina ia lē fano tagata uma e faatuatua iā te ia [Iesu], a ia maua le ola e faavavau.” O lona uiga, e lē otometi ona tatou “maua le ola e faavavau”, e iai mea e tatau ona tatou ausia. E manaʻomia ona tatou faatuatua iā Iesu ma usiusitaʻi iā te ia.

E te ono taumānatu e faapea: ʻE faapefea ona aofia le usiusitaʻi i le faatuatua iā Iesu? Pe e leʻi fetalai ea Iesu o “tagata uma e faatuatua iā te ia,” e maua le ola e faavavau?’ E tāua le faatuatua po o le talitonu, peitaʻi e tatau ona manatua ua faapea mai le Tusi Paia, o le faatuatua e lē lava le tau na o le talitonu. I le Vine’s Expository Dictionary of Old and New Testament Words, o le upu faatuatua lea na faaaogā e Ioane i le uluaʻi gagana, e uiga atu i le “maufaatuatuaina o se tasi, ae e lē na o le tau ina talitonu i ai.” Ina ia maua le finagalo malie o le Atua, e lē lava le tau ina iloa o Iesu o le Faaola. E tatau foʻi ona faia taumafaiga uma e faatatau mea na aʻoaʻo mai e Iesu, auā a leai ni galuega, e leai se aogā e faapea mai ai se tasi e faatuatua. Ua faapea mai le Iakopo 2:26, ʻe mate le faatuatua pe a leai ni galuega.’ I se isi faaupuga, e tatau i lē e talitonu ona faaalia le faatuatua iā Iesu, ma ola pe usiusitaʻi i ana aʻoaʻoga.

O loo faamatalaina lenā manatu e Paulo i le 2 Korinito 5:14, 15 e faapea: “Ua faamalosia i matou ona o le alofa o le Keriso, ma o lo matou manatu lenei, e toʻatasi lē na maliu [Iesu] mo tagata uma; . . . ma na maliu o ia mo tagata uma, ina ia lē toe ola i latou mo i latou lava, ae ia ola mo ia o lē na maliu mo i latou ma toe faatūina mai.” O lo tatou talisapaia o le taulaga togiola a Iesu, e uunaʻia ai i tatou e faia suiga i o tatou olaga, nai lo o le ola mo i tatou lava, ae ia ola mo Iesu o lē na maliu mo i tatou. O lea, e ao ona faamuamua i o tatou olaga le faatatauina o aʻoaʻoga a Iesu. O le faia faapea, o le a iai se aafiaga i mea e tatou te faatāua, o a tatou filifiliga ma so o se mea e tatou te faia. O le ā le taui o le a maua e i latou e talitonu ma faaalia le faatuatua iā Iesu?

ʻINA IA LĒ FANO, A IA MAUA LE OLA E FAAVAVAU’

I le vaega mulimuli o le Ioane 3:16, o loo taʻua ai le folafolaga a le Atua mo ē e faaalia le faatuatua i le togiola, ma ola e ōgatusa ma ana tapulaa. E finagalo o ia “ina ia lē fano” tagata faamaoni, “a ia maua le ola e faavavau.” Peitaʻi, e lua faamoemoe e maua e i latou na, ona o le alofa o le Atua.

E maua e se vaega o tagata le ola e faavavau i le lagi, lea na folafola i ai e Iesu. Na ia fetalai i ona soo faamaoni, o le a ia saunia se nofoaga mo i latou ina ia latou pule faatasi ma ia. (Ioane 14:2, 3; Filipi 3:20, 21) O le a avea i latou o le a toe faatutūina aʻe i le lagi “ma ositaulaga a le Atua ma le Keriso, e pule i latou o ni tupu faatasi ma ia mo le afe tausaga.”​—Faaaliga 20:6.

E na o se vaega toʻaitiiti o soo o Iesu o le a mauaina lenā faamoemoe. I le Luka 12:32 na fetalai ai Iesu: “Aua le fefefe le lafu mamoe itiiti e, auā ua finagalo malie lo outou Tamā e tuuina atu le malo iā te outou.” E toʻafia le aofaʻi o lenā “lafu mamoe itiiti”? Ua faapea mai le Faaaliga 14:1, 4: “Ona ou iloa lea, faauta foʻi! o loo tū mai le Tamaʻi Mamoe [Iesu Keriso ua toe faatū mai] i le Mauga o Siona [i le lagi], o loo faatasi ma ia le selau fā sefulu fā afe, o ē ua tusia lona suafa ma le suafa o lona Tamā i o latou muāulu. . . . O i latou ia ua faatauina mai i tagata o uluaʻi fua mo le Atua ma le Tamaʻi Mamoe.” Pe a faatusatusa atu i le faitau piliona o tagata, e na o le 144,000 i latou o loo faia aʻe ai le “lafu mamoe itiiti,” ma ua taʻua i latou o tupu. O ai o le a latou pule mai i ai?

Na taʻua foʻi e Iesu i le Ioane 10:16, se isi vaega o tagata faamaoni o ē o le a maua aogā mai le Malo i le lagi. Ua faapea mai le mau: “Ua iā te aʻu isi mamoe, o ē e lē o i lenei lotoā; e tatau foʻi ona ou aumaia i latou, ma latou te faalogo i loʻu leo, ona avea ai lea o i latou ma lafu e tasi, ma le leoleo mamoe e toʻatasi.” E tulimataʻia e nei “mamoe” le ola e faavavau i luga o le lalolagi, o le faamoemoe lava lea e tasi na tuuina atu iā Atamu ma Eva. E faapefea ona tatou iloa o lo latou faamoemoe o luga o le lalolagi?

E tele taimi i le Tusi Paia o loo faamatalaina ai le tulaga o le a iai le lalolagi, pe a avea ma Parataiso. Ina ia e iloa le moni o nei faamatalaga, e mafai ona e faitau i lau lava Tusi Paia pe i la matou tuatusi i le initaneti o le www.jw.org i mau nei: Salamo 37:9-11; 46:8, 9; 72:7, 8, 16; Isaia 35:5, 6; 65:21-23; Mataio 5:5; Ioane 5:28, 29; Faaaliga 21:4. O loo faamatalaina i nei mau le taimi o le a lē toe iai ni taua, oge, faamaʻi ma le oti. O le a fiafia tagata amiotonu e fausia o latou fale, galueaʻiina o latou lava fanua, ma tausia aʻe a latou fanau i se siʻomaga filemu. * Pe e te fia tulimataʻia le taimi o le a faataunuuina ai lenā faamoemoe matagofie? O le mea mautinoa, e lē o toe umi ona faataunuuina lea o na folafolaga.

E ANOANOAʻI MEA UA FAIA E LE ATUA

Pe a e tomānatu i mea uma ua faia e le Atua mo oe ma le fanau a tagata, e manino mai ai e anoanoaʻi mea ua ia faia. Ua tatou maua le ola, atamai, soifua mālōlōina, faapea le tausiga faaletino. O le meaalofa a le Atua o le taulaga togiola e ala mai iā Iesu, o le a tatou maua ai nisi faamanuiaga e sili atu lea na tatou aʻoaʻoina mai i le Ioane 3:16.

E mautinoa lo tatou maua o se olaga fiafia ma le tele o faamanuiaga, pe a tatou ola e faavavau i se lalolagi filemu e aunoa ma ni maʻi, taua, oge po o le oti. O lou mauaina o na faamanuiaga e faalagolago iā te oe. O lea, o le ā o loo e faia mo le Atua?

^ pala. 24 Mo nisi faamatalaga e faatatau i na valoaga, tagaʻi i le mataupu e 3 o le tusi O ā Aʻoaʻoga Moni a le Tusi Paia? lomia e Molimau a Ieova.