Alu i mataupu o loo iai

Alu i le lisi o mataupu

MATAUPU AUTŪ | PO LE OTI O LE IʻUGA LEA O MEA UMA?

O le Oti e Lē o le Iʻuga o Mea Uma!

O le Oti e Lē o le Iʻuga o Mea Uma!

E lua maila (3 km) le mamao e va ai Petania o se tamaʻi nuu ma Ierusalema. (Ioane 11:18) A o toe o ni nai vaiaso maliu Iesu, na iai se mea faanoanoa na tupu ai i Petania. Na maliu Lasalo o se tasi o uō mamae a Iesu, ona o se maʻi na aafia ai.

O le taimi muamua na faalogo ai Iesu i le mea na tupu, na ia faapea atu i ona soo o loo moe Lasalo, ma o le a ia alu e fafagu iā te ia. (Ioane 11:11) Peitaʻi, e leʻi malamalama ona soo i le uiga o lana fetalaiga. O lea na ia fetalai saʻo atu ai iā i latou: “Ua oti Lasalo.”​—Ioane 11:14.

Ina ua mavae aso e fā talu ona iai Lasalo i le tuugamau, na taunuu ai Iesu i Petania ma saʻili e faamāfanafana iā Mareta. Na faapea atu Mareta: “Ana e iai i inei, semanū e lē oti loʻu tuagane.” (Ioane 11:17, 21) Na tali atu Iesu: “O aʻu o le toetū ma le ola. O lē e faatuatua mai iā te aʻu, e ui ina oti o ia, ae e toe ola mai lava.”​—Ioane 11:25.

“Lasalo e, inā sau ia i fafo!”

Na faamaonia le moni o na upu ina ua faalatalata atu Iesu i le tuugamau ma alaga atu ma le leotele: “Lasalo e, inā sau ia i fafo!” (Ioane 11:43) Na taufaiofo tagata na vaavaai atu, ina ua savali mai i fafo le tagata na oti.

A o leʻi faatūina Lasalo, e toʻalua isi tagata na faatutūina e Iesu mai le oti. I se tasi taimi, a o leʻi faatūina e Iesu le afafine o Iairo, na ia fetalai ai o loo moe o ia.​—Luka 8:52.

Mātau, ina ua maliliu Lasalo ma le afafine o Iairo, na faatusa ai e Iesu lo la feoti e faapea o loo momoe. Aiseā? Pe a moe le tagata e na te lē toe iloa se mea, ma ua talafeagai lelei ona faailoa mai ai le manatu o le mālōlō mai i tigā ma mafatiaga. (Failauga 9:5; tagaʻi i le ulutala  “Pe a Oti le Tagata e Pei Lava o Loo Moe Gase.”) Na malamalama lelei uluaʻi soo o Iesu i le mea e tupu i le tagata pe a oti. Ua faapea mai le Encyclopedia of Religion and Ethics: “E faatusa e soo o Iesu le oti i se tagata ua moe, ma o le fanuaoti o se nofoaga e mālōlō ai . . . i latou na maliliu o loo faamaoni pea.” *

E faamāfanafanaina i tatou i le iloa o loo momoe ē ua maliliu i le tuugamau ma e lē o pagatia. O lea, e leai se māfuaaga e tatou te fefefe ai, ona o lea ua tatou malamalama i le mea e tupu pe a tatou feoti.

“PE A OTI LE TAGATA, PE E TOE OLA MAI EA O IA?”

E ui e tatou te fiafia e maua se mālōlōga lelei i le pō, ae mautinoa e leai se isi e manaʻo e moe ai pea e faavavau. E faapefea ona tatou mautinoa o le a toe faatutūina mai i latou ua maliliu, e pei ona sa faia iā Lasalo ma le afafine o Iairo?

Ina ua maʻi tigāina Iopu, na ia fesili: “Pe a oti le tagata, pe e toe ola mai ea o ia?”​—Iopu 14:14.

Na toe tali lava e Iopu lana fesili e faapea: “E te valaau mai, ona ou tali atu ai lea iā te oe. Auā ua e matuā naunau i le galuega a ou aao.” (Iopu 14:15) Na mautinoa lelei e Iopu e matuā naunau Ieova i le taimi o le a ia toe faatūina mai ai lana auauna faamaoni. Pe sa moomoo Iopu i se mea e lē mafai ona tupu? E leai.

O i latou na faatutūina e Iesu, ua avea ma faamaoniga malosi na tuuina e le Atua iā Iesu le mana e aveesea ai le oti. Ua faapea mai le Faaaliga 1:18, o loo iai iā Iesu “ki o le oti.” Pe afai sa iā Iesu le mana e toe faatūina ai Lasalo, e mautinoa e iai foʻi iā te ia le mana e toe faatutūina ai tagata i le lumanaʻi.

E tele taimi o loo taʻua ai i le Tusi Paia le faamoemoe o le toetū. Na faamautinoa atu e se tasi agelu i le perofeta o Tanielu e faapea: “E te mālōlō ae e te tū mai i lou tofi i le iʻuga o aso.” (Tanielu 12:13) I le Mataio 22:23, 29, na fetalai ai Iesu i le ʻau Satukaio po o taʻitaʻi lotu Iutaia, o ē na lē talitonu i le faamoemoe o le toetū e faapea: “E sesē outou, auā tou te lē iloa Tusitusiga Paia po o le mana o le Atua.” Na faapea mai le aposetolo o Paulo: ʻOu te faamoemoe i le Atua e toetutū mai tagata amiotonu ma tagata amiolētonu.’​—Galuega 24:15.

O AFEA E TOETUTŪ MAI AI Ē UA MALILIU?

O afea o le a toetutū mai ai tagata amiotonu ma tagata amiolētonu? Na faapea atu le agelu iā Tanielu, o le a toe faatūina o ia “i le iʻuga o aso.” Na talitonu foʻi Mareta o le a toe faatūina lona tuagane o Lasalo “i le toetū i le aso mulimuli.”​—Ioane 11:24.

I le Tusi Paia, e iai le sootaga o le “aso mulimuli” ma le pulega o le Malo o Keriso. Na tusi Paulo: “Auā e tatau ona pule o ia [Keriso] o se tupu seʻia tuuina e le Atua fili uma i lalo o ona vae. Ona faaumatia lea o le fili mulimuli, o le oti lea.” (1 Korinito 15:25, 26) O se tasi lea o māfuaaga autū e tatau ai ona tatou tatalo ia oo mai le Malo o le Atua, ma ia faia lona finagalo i le lalolagi. *

Na malamalama lelei Iopu, o le finagalo o le Atua ia toe faatutūina i latou ua maliliu. Pe a tupu lenā mea, ona faaumatia loa lea o le oti. E leai foʻi se tasi e toe fesili, ʻPo o le oti o le iʻuga lea o mea uma?’

^ pala. 8 O le upu “fanuatanu” e sau mai i le upu Eleni e uiga atu i se “nofoaga e moe ai.”

^ pala. 18 Ina ia aʻoaʻo atili e faatatau i le Malo o le Atua, tagaʻi i le mataupu e 8 o le tusi O ā Aʻoaʻoga Moni a le Tusi Paia? lomia e Molimau a Ieova.