Alu i mataupu o loo iai

Alu i le lisi o mataupu

 MATAUPU AUTŪ | PE E TATOU TE MANAʻOMIA LE ATUA?

Le Māfuaaga e Tatou te Manaʻomia ai le Atua

Le Māfuaaga e Tatou te Manaʻomia ai le Atua

Ua faapea mai tagata popoto i mataupu tau i le mafaufau, ina ia maua le fiafia moni, e iai se isi mea e sili atu nai lo o le tau ina faamalieina o manaʻoga faaletino. E faamaonia lea tulaga i le auala o loo ola ai tagata, e latou te mananaʻo ina ia iai se fuafuaga o o latou olaga, pe galulue foʻi mo se tasi e sili iā i latou. O lea, ua latou faaalu ai le tele o le taimi i tafaoga, musika ma le tele o isi mea. Peitaʻi, e latou te lē o maua ai se fiafia moni.

E finagalo le Atua ina ia ola fiafia tagata i le taimi nei faapea ma le lumanaʻi

Na fananau mai lava tagata ma se faanaunauga mo mea faaleagaga, ma e lē o se tulaga e faateʻia ai tagata faitau o le Tusi Paia. O loo faamatalaina i uluaʻi mataupu o le Kenese, ina ua uma ona foafoaina e le Atua le uluaʻi ulugalii, na masani ona feutagaʻi ma i laʻua ma atiaʻe ai sa latou faiā. (Kenese 3:8-10) E leʻi foafoaina e le Atua le tagata e ola e aunoa ma lana taʻitaʻiga. Na ia tuuina iā i latou le faanaunauga ina ia fesootaʻi pea ma ia. O loo taʻua i le Tusi Paia lenā faanaunauga.

O se faaaʻoaʻoga, i le Mataio 5:3 na fetalai ai Iesu: “E fiafia o ē e naunau i mea faaleagaga.” O lea, o se isi vala tāua i le mauaina o se olaga fiafia ma aogā, o le faamalieina lea o o tatou manaʻoga faaleagaga. E faapefea? Na fetalai Iesu: “E lē na o meaʻai e ola ai le tagata, ae o afioga uma e tulei mai i le fofoga o Ieova.” (Mataio 4:4) E faapefea i taʻiala mai le Atua ona fesoasoani iā i tatou ina ia maua se olaga fiafia ma aogā? Seʻi o tatou iloilo ni auala autū se tolu.

E Tatou te Manaʻomia Taʻiala Aogā

E toʻatele tagata atamamai e latou te aumaia fautuaga e faatatau i faiā, le alofa, olaga faaleaiga, foʻiaina o feeseeseaʻiga, mauaina o le fiafia, e oo lava i le auala e maua ai se olaga e iai se fuafuaga. Peitaʻi, e leai se tasi e sili atu ona agavaa e aumaia fautuaga aogā ma talafeagai mo le olaga, nai lo o Lē na foafoaina i tatou, o Ieova le Atua.

E pei le Tusi Paia o se tusi taʻiala mo tagata

O se faataʻitaʻiga: Pe a e faatauina mai se meapuʻeata po o se komepiuta, e te faatalitalia e iai  ma se tusi taʻiala i le auala sili e faaaogā ai lea oloa. E tai faapena le Tusi Paia, ua pei o se tusi taʻiala ua saunia e le Atua mo i tatou o ana foafoaga. O loo faamatalaina i lenei tusi le fuafuaga o o tatou olaga ma le auala sili e faaaogāina ai.

O loo iai i le Tusi Paia lapataʻiga i gaoioiga e ono faaleagaina ai o tatou olaga. Atonu e aumaia e nisi tagata fautuaga eseese e ono foliga mai e faigofie ona mulimuli i ai. Peitaʻi, pe a tatou mulimuli i taʻiala mai le Atua, o le a tatou maua ni iʻuga e sili ona lelei ma ʻalofia ai faafitauli.

“O aʻu o Ieova, lou Atua, o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai. E lelei pe a e faalogo mai i aʻu poloaʻiga! Ona pei ai lea o se vaitafe lou filemu, ma lau amiotonu e pei o galu o le sami.”​—Isaia 48:17, 18

E maua taʻiala faapea le fesoasoani e tatou te manaʻomia i le Afioga a le Atua

E ui e saunia e Ieova faatonuga ma taʻiala, ae e na te lē faamalosia i tatou e mulimuli i ai. O lona alofa iā i tatou faapea lona naunau e fesoasoani mai, na ia fetalai ai: “O aʻu o Ieova, lou Atua, o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai. E lelei pe a e faalogo mai i aʻu poloaʻiga! Ona pei ai lea o se vaitafe lou filemu, ma lau amiotonu e pei o galu o le sami.” (Isaia 48:17, 18) Ua faaalia manino mai i inei, ina ia taulau manuia o tatou olaga, e tatou te manaʻomia le taʻitaʻiga a le Atua.

E Tatou te Manaʻomia Se Vaifofō mo o Tatou Faafitauli

E manatu nisi e latou te lē manaʻomia le Atua, ona e feteenaʻi le talitonuga e iai se Atua alofa ma le tele o faafitauli o loo iai i le olaga. E latou te ono fesili: ʻAiseā ua mafatia ai tagata amiolelei?’ ʻAiseā e fananau mai ai nisi pepe e mamaʻi?’ ʻAiseā ua leai ai se faamasinotonu i le lalolagi?’ E tāua nei fesili, ma o le mauaina o tali e iai se aafiaga tele i o tatou olaga. O lea, nai lo o le vave tuuaʻia o le Atua mo nei faafitauli, seʻi o tatou iloilo po o le ā le aʻoaʻoga moni a le Tusi Paia e faatatau i lenei mataupu.

I le mataupu e tolu o le Kenese, o loo faamatala ai le auala na liliueseina ai e Satani o lē na faafoliga mai o se gata, le uluaʻi ulugalii mai le usiusitaʻi i le Atua e ala i lo la ʻaina o le fua o le laau e iloa ai le lelei ma le leaga. Na faapea atu Satani iā Eva: “E lua te lē oti lava. Auā ua silafia e le Atua, o le aso lava lua te aai ai e pupula ai o oulua mata, ona pei ai lea o oulua o le Atua, e iloa le lelei ma le leaga.”​—Kenese 2:16, 17; 3:4, 5.

O na upu ua tuuaʻia ai e Satani le Atua o sē e pepelo, ma e lē tonu le auala o loo ia pule ai. Na finau Satani e taulau manuia olaga o tagata pe afai e latou te usiusitaʻi atu iā te ia. O le ā le auala o le a foʻia ai lenā mataupu? Na filifili Ieova e tuu mai se taimi e faamaonia ai e tagata pe saʻo tuuaʻiga na faia e faatatau iā te ia. O lea, sa tuu  atu e Ieova iā Satani faapea i latou o loo lagolagoina o ia le avanoa e faamaonia ai, pe faamata e mafai e tagata ona ola e aunoa ma le taʻitaʻiga a le Atua.

O le ā sou manatu, o le ā le tali e tatau ona iai i tuuaʻiga a Satani? Pe e mafai e tagata ona ola e aunoa ma le taʻitaʻiga a le Atua? O mafatiaga, faiga lē tonu, maʻi, oti, soligatulafono, amioga leaga, taua ma isi lava amioga leaga, ua faamaonia ai le lē taulau o tagata e taʻitaʻia i latou lava. Nai lo o le tuuaʻia o le Atua o le pogai o faafitauli, ae ua faaalia i le Tusi Paia se tasi o māfuaaga autū: ʻUa pule le tagata i le isi tagata ma ua matuā afāina ai o ia.’​—Failauga 8:9.

Ua faaalia manino mai i inei, e tatou te manaʻomia le taʻitaʻiga a le Atua ina ia iloa ai tali i fesili o loo atugalu ai tagata faapea le vaifofō mo faafitauli. O le ā o le a faia e le Atua?

E Tatou te Manaʻomia Le Fesoasoani a le Atua

Ua tele tausaga o faaalu e tagata le tele o le taimi, malosi, faapea alagaʻoa e saʻilia ai se vaifofō mo maʻi, soifua matua faapea le oti. E talitonu foʻi nisi e mafai ona faatumauina o latou foliga talavou, i le inuina o ni vai eseese ua paluina, o se vai faapitoa, pe nofo foʻi i se nofoaga patino. E ui i na taumafaiga, ae e lē o mafai ona taulau tagata i le aveesea o na tulaga.

E finagalo le Atua ina ia ola fiafia tagata, auā o lana uluaʻi fuafuaga lava lenā sa iai ma o loo tumau lava. (Kenese 1:27, 28; Isaia 45:18) Ua faamautinoa mai e Ieova le Atua, e na te faataunuuina so o se mea e na te finagalo i ai. (Isaia 55:10, 11) O loo faamatalaina i le Tusi Paia le folafolaga a le Atua ina ia toe faafoʻisia le lalolagi e avea ma Parataiso. Ua faapea mai le Faaaliga 21:4: ʻE soloiesea e Ieova le Atua loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.’ E faapefea ona aumaia e le Atua nei suiga matagofie, ma e faapefea ona tatou maua aogā mai i lenei folafolaga?

Na aʻoaʻoina e Iesu ona soo e tatalo ina ia faataunuuina le finagalo o le Atua. Ua aʻo faatauloto e nisi lenā tatalo ma e latou te faaigoaina o le Tatalo a le Alii, lea o loo faamauina i le Mataio 6:9, 10 e faapea: “Lo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.” Ioe, e ala i lona Malo o le a aveesea ai e Ieova mafatiaga e māfua mai i pulega faaletagata, ma aumaia le lalolagi fou amiotonu na ia folafolaina mai. * (Tanielu 2:44; 2 Peteru 3:13) O le ā e tatau ona tatou faia ina ia maua ai aogā mai i lenā folafolaga?

 Na taʻua e Iesu se laasaga tāua i le Ioane 17:3 e faapea: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.” E mafai ona tatou maua le ola e faavavau i le lalolagi fou, pe a saʻili atu i le taʻitaʻiga a le Atua. O lenā faamoemoe e atili faamalosia ai lo tatou talitonuga e tatou te manaʻomia le Atua.

Ia Mafaufau i le Atua

I le 2,000 tausaga ua mavae i Areopako i Atenai, na faapea atu ai le aposetolo o Paulo i tagata Atenai e faatatau i le Atua: “Ua ia foaʻi mai lava i tagata uma le ola, ma le mānava, ma mea uma lava. . . . Auā o ia ua tatou ola ai, gaoioi ai, ma ua tatou iai foʻi ona o ia, e pei ona taʻua e ni tagata fatusolo o loo iā te outou e faapea, ʻAuā o i tatou foʻi o lana fanau.’”​—Galuega 17:25, 28.

O loo tumau pea le moni o lenā manatu, auā ua saunia e le Atua le ʻea o loo tatou mānavaina, meaʻai o loo tatou aai ai, faapea vai e tatou te feinu ai. E lē mafai ona tatou ola e aunoa ma mea lelei ua saunia e Ieova mo i tatou. Ae aiseā ua faaauau ai pea ona aumaia e Ieova nei sauniuniga mo tagata uma, e tusa pe e latou te manatu i le Atua pe leai? Ua faapea mai Paulo i le Galuega 11:27: “Ina ia latou saʻili i le Atua, pe mafai ona latou tautagotago iā te ia ma maua o ia, ae peitaʻi e lē o mamao o ia mai iā i tatou taʻitoʻatasi.”

Pe e te fia aʻoaʻoina atili e faatatau i fuafuaga a le Atua, faapea ana taʻiala aogā i le auala e maua ai se olaga fiafia i le taimi nei faapea le lumanaʻi? Afai o le tulaga lenā, e faalaeiauina oe ina ia talanoa i lē na tuuina atu lenei mekasini iā te oe, pe faafesootaʻi foʻi ē na lomia. E latou te fiafia e fesoasoani atu iā te oe.

^ pala. 20 Mo nisi faamatalaga i le auala o le a faaaogā ai e Ieova lona Malo e faataunuuina lona finagalo i le lalolagi, tagaʻi i le mataupu e 8 o le tusi O ā Aʻoaʻoga Moni a le Tusi Paia? lomia e Molimau e Ieova ma e maua i le Initaneti i le www.jw.org.