Alu i mataupu o loo iai

Alu i le lisi o mataupu

SUIA E LE TUSI PAIA OLAGA

“Sa Feita le Toʻatele o Tagata iā te Aʻu”

“Sa Feita le Toʻatele o Tagata iā te Aʻu”
  • TAUSAGA FANAU: 1978

  • ATUNUU: CHILE

  • TALAAGA: MATUĀ SAUĀ

OLAGA SA IAI:

Na ou ola aʻe i Santiago le laumua o Chile, lea e taatele ai le faaaogāina o fualaau faasāina, kegi leaga ma soligatulafono. Na fasiotia loʻu tamā i le lima o oʻu tausaga, mulimuli ane ae nonofo loʻu tinā ma se tamāloa e sauā. O lana masaniga o le fasi lea o i maʻua, ma e oo mai lava i le taimi lenei ou te manatuaina pea na taimi tigā.

A o ou tuputupu aʻe, na avea ai aʻu o sē e matuā sauā, faalogologo i musika malomaloā, inu tele, ma faaaogā fualaau faasāina i le tele o taimi. E tele ina matou fufusu ma tagata e faatauina fualaau faasāina, ma o le tele o taimi na toetoe ina a ou oti ai. I se tasi taimi, na totogi tupe ai e se kegi se tamāloa ua iloga i le fasioti tagata e fasiotia aʻu, ae na ou sao mai i lenā faalavelave ma ni manuʻaga. I se isi mea na tupu, na faasiilima ai aʻu e se tasi vaega e faatauina fualaau faasāina ma tuu le fana i loʻu ulu, ma taumafai e sisiina aʻu.

Peitaʻi i le 1996, na ma feoaʻi ai ma se tamaʻitaʻi e igoa iā Carolina ma na ma faaipoipo i le 1998. Ina ua fanau mai la ma tama muamua, na ou lagona le matuā popole ina neʻi avea loʻu uiga o le ita leaga ma itu ou te sauāina ai loʻu aiga, e pei ona sa faia e loʻu tamāfai. O lea na ou saʻilia ai le fesoasoani i se nofoaga e fesoasoani i tagata e toe faaleleia o latou olaga, e ala i togafitiga faafomaʻi ma isi auala. Peitaʻi e leʻi iai se aogā o na togafitiga iā te aʻu, sa na ona faateteleina ai o le leaga ma lē mafai ai ona ou pulea oʻu uiga sauā. Ou te leʻi toe manaʻo e sauāina loʻu aiga, o lea na ou taumafai ai loa e pule i loʻu ola, ae e leʻi mafai ona ou faia.

E ui lava ou te leʻi talitonu e iai se Atua mo le tele o tausaga, ae na ou taumafai pea e saʻili iā te ia. O lea sa ou auai ai i se lotu faaevagelia mo sina taimi. O le taimi lenā o loo suʻesuʻe laʻu avā ma Molimau a Ieova. Sa ou ʻinoʻino i Molimau a Ieova, ma o le tele o taimi ou te lafo iā i latou upu masoā. Peitaʻi e latou te tali mai lava ma le filemu, o se tulaga ou te leʻi faatalitalia.

I se tasi aso, na faapea mai ai Carolina ou te suʻe i laʻu lava Tusi Paia le Salamo 83:18, lea o loo taʻu manino mai ai le suafa o le Atua, o Ieova. Sa faateʻia aʻu, auā sa aʻoaʻoina i laʻu lotu se atua, ae lē o Ieova le Atua. I le amataga o le 2000, na amata ai loa ona ou suʻesuʻeina le Tusi Paia faatasi ma Molimau a Ieova.

SUIA E LE TUSI PAIA OLAGA:

A o faateleina pea mea ou te aʻoaʻoina e faatatau iā Ieova, na faamāfanafanaina aʻu i le iloa o Ieova o se Atua e alofa ma lotofaamagalo. O se faataʻitaʻiga, i le Esoto 34:6, 7 o loo faamatalaina ai Ieova o se “Atua e alofa mutimutivale ma alofa fua, e telegese lona toʻasā ae e tele lona alofa faamaoni ma fai mea moni, e tausia le alofa faamaoni e oo atu i afe o tupulaga, e faamagalo mea sesē, o solitulafono ma agasala.”

Na faamāfanafanaina aʻu i le iloa o Ieova o se Atua e alofa ma lotofaamagalo

E ui lava i mea na ou aʻoaʻoina, ae sa faigatā mo aʻu ona faatatauina. Sa ou manatu e lē mafai ona ou pulea loʻu uiga o le ita leaga. O taimi uma lava ou te lē taulau ai, e faalaeiauina aʻu ma le alofa e Carolina, ma faamanatu mai e lē o lilo i le silafaga a Ieova aʻu taumafaiga. O lana lagolagosua na aumaia ai le malosi e faia ai pea aʻu taumafaiga e faafiafiaina le finagalo o Ieova, e ui i le tele o taimi ou te manatu ai e leai soʻu aogā.

I se tasi aso, na faapea mai ai lē na faia laʻu suʻesuʻega o Alejandro ina ia faitau le Kalatia 5:22, 23, lea o loo aumaia ai le fua o le agaga o le Atua o le “alofa, o le olioli, o le filemu, o le faapalepale, o le agalelei, o le mataalofa, o le faatuatua, o le agamalu, ma le amio pulea.” Na ia faapea mai ina ia mafai ona ou atiaʻe nei uiga, e manaʻomia ona ou faalagolago i le agaga paia o le Atua ae lē o loʻu lava malosi. O lenā mea moni, na matuā suia atoa ai le auala ou te mafaufau ai.

Mulimuli ane, na ou auai i se tasi o tauaofiaga tele a Molimau a Ieova. O le maopoopo, tumamā ma le autasi na ou vaaia i lenā tauaofiaga, na ou talitonu ai o le tapuaʻiga moni lenei. (Ioane 13:34, 35) Na ou papatiso iā Fepuari 2001.

AOGĀ IĀ TE AʻU:

Ua suia aʻu e Ieova mai i se tagata sauā i se tagata e filemu. Ua ou lagona lona tuusaʻolotoina o aʻu mai i le olaga leaga sa ou pologa ai. Sa feita le toʻatele o tagata iā te aʻu, ma ou te lē tuuaʻia i latou. Peitaʻi, ua mafai ona matou auauna ma le filemu ma laʻu avā ma oʻu atalii e toʻalua iā Ieova i le taimi lenei.

E matuā lē talitonu oʻu tauaiga ma aʻu uō i suiga ua ou faia i loʻu olaga. O le iʻuga, o le toʻatele o i latou ua faaalia le naunau e suʻesuʻeina le Tusi Paia. O se faaeaga foʻi mo aʻu le fesoasoani i isi tagata e aʻoaʻoina e faatatau iā Ieova. Maʻeu le matagofie o le vaavaai atu i le auala na suia ai foʻi e le upu moni mai le Tusi Paia o latou olaga!