MATAUPU AUTŪ: AISEĀ UA TELE AI MAFATIAGA? O AFEA E MUTA AI?
Ua Tele Soifua o Ē Lē Sala ua Maʻimau
O Noelle o se teineitiiti e alofagia e le toʻatele, ma e fiafia e tusi ata. I se tasi o afiafi i le vaitau māfanafana, sa faafuaseʻi ona paʻū o ia i le vai taʻele a lo latou aiga o loo i tua o le fale ma malemo ai. Na tupu lenā mea ae toe lua vaiaso faia lona aso fanau, lea e atoa i ai le fā o ona tausaga.
Charlotte, Daniel, Olivia, Josephine . . . O nisi na o igoa o alo ma fanau e taʻi ono pe taʻi fitu tausaga, na aofia ai i tagata e toʻa 26 na tafanaina i se aʻoga i Connecticut i Amerika, iā Tesema 14, 2012. I se tasi o sauniga o maliu mo i latou nei, na taʻua ai e le peresitene o Obama o latou igoa ma faapea atu iā i latou o loo faavauvau: “Ua tatau ona faaiʻuina nei faalavelave.”
I le 1996, na tuua ai e Bano o se tamaʻitaʻi e 18 ona tausaga Iraq ae siitia atu ma lona aiga i Norway. E masani ona faaigoa o ia e ana uō iā Sun Rays. Peitaʻi, iā Iulai 22, 2011, na aofia o ia i tagata e toʻa 77 na fasiotia e se tagata faatupu faalavelave. Na faapea mai lenei tagata ma le faamaualuga: “Ou te fia faatoese atu . . . ona e leʻi tele nisi ola na mafai ona ou fasiotia.”
O loo tele pea nisi tala faamomoiloto faapena o loo faaauau pea ona lipotia mai i so o se vaipanoa o le lalolagi. Seʻi mafaufau i le faanoanoa ma le tigā ona o faalavelave tutupu faafuaseʻi, soligatulafono, taua, faiga faatupu faalavelave, mala faalenatura, faapea ma le tele o isi faalavelave. Ua tele ola ua maʻimau ma pagatia e aunoa ma se māfuaaga tatau.
E tuuaʻia e nisi le Atua o Lē na foafoaina mea uma e faapea e lē o manatu mamafa mai i le fanau a tagata. Ua faapea mai nisi, o loo silafia e le Atua o tatou puapuaga ae ua filifili e lē faalaa mai ma faamuta. Peitaʻi, e iai lava nisi e manatu o nei faalavelave o ni mea ua tuupōina. E taofi eseese uma tagata i lenei mataupu. O fea e mafai ona tatou maua ai ni tali e maufaatuatuaina ma faamalieloto? I mataupu o loo mulimuli mai, o le a tatou iloiloina ai mai le Afioga a le Atua le Tusi Paia ni tali i le pogai o nei mafatiaga, ma le auala o le a faaiʻuina ai.
