Alu i mataupu o loo iai

Alu i le lisi o mataupu

 SE TALANOAGA FAALE-TUSI PAIA

Po o Manatu Mamafa Mai le Atua i o Tatou Mafatiaga?

Po o Manatu Mamafa Mai le Atua i o Tatou Mafatiaga?

O le talanoaga o loo mulimuli mai, o se talanoaga e masani ona fai e se Molimau a Ieova ma se tagata i le talaʻiga. Seʻi faapea ua alu atu le Molimau e igoa iā Metala i le fale o se fafine e igoa iā Sofia.

E FAAPEFEA ONA IA FAATAGA LENEI MEA E TUPU?

Metala: I lenei taeao ou te fiafia e talanoa ma tagata e faatatau i lenei savali, Pe E te Fia Iloa le Upu Moni? Ia ou te fiafia e tuu atu lau kopi lea.

Sofia: O se mataupu faalelotu?

Metala: Ia saʻo lelei. Afai e te tagaʻi ane i le pito i luma, o loo iai fesili e ono, o fea o nei fesili—

Sofia: Seʻi faatali ea, e maʻimau lou taimi e te talanoa mai ai iā te aʻu.

Metala: Aiseā ua e saunoa mai ai faapena?

Sofia: E lē o mautonu a loʻu mafaufau pe e iai moni se Atua.

Metala: Faafetai mo lou taofi, ae seʻi oʻu fesili atu, ua leva ona e manatu faapena?

Sofia: E leai, sa ou ola aʻe o se tagata mapolotu, ae ua fai nei si umi ou te leʻi toe alu i se lotu.

Metala: O lea ua ou maua atu lou manatu. Ae seʻi faailoa muamua atu loʻu igoa. O aʻu o Metala.

Sofia: O loʻu igoa o Sofia.

Metala: Mālō le soifua Sofia.

Sofia: Mālō foʻi le soifua.

Metala: Ou te leʻi sau e faamalosia oe ina ia talitonu mai i laʻu talitonuga. Ae e iai se mea na tupu ua e manatu ai faapena i le Atua?

Sofia: Ioe, i le 17 tausaga ua mavae, na lavea ai loʻu tinā i se faalavelave tau taavale.

Metala: Talofa e, e leaga ni ona manuʻaga?

Sofia: Ioe, talu mai lenā taimi ua matuā pē atoa lona tino.

Metala: E mautinoa la ua e matuā mafatia lava.

Sofia: O le mea lenā ua lē mautonu ai loʻu mafaufau. Afai o iai se Atua, e faapefea ona ia faataga lenei mea e tupu? Aiseā ua ia lē taofia ai o tatou mafatiaga?

PE E SESĒ ONA FESILI PE AISEĀ?

Metala: Ou te malamalama lelei i ou faalogona. O se mea masani le manatu faapena pe a oo mafatiaga iā i tatou. O faalogona foʻi na sa oo i tane ma fafine faamaoni o loo taʻua i le Tusi Paia!

Sofia: E moʻi?

Metala: E talafeagai ma oe pe a ou faailoa atu se faataʻitaʻiga mai le Tusi Paia?

Sofia: E leai se mea o iai.

Metala: Mātau le fesili a le perofeta faamaoni o Sapakuka i le Atua, lea e taʻua i le Sapakuka mataupu 1 fuaiupu 2 ma le 3, fai mai le mau: “Ieova e, o le ā le umi ou te alaga atu ai mo se fesoasoani ae e te lē faafofoga mai? O le ā le umi ou te alaga atu ai iā te oe ona o faiga sauā, ae e te lē faaola mai? Aiseā ea ua e faaali mai ai iā te aʻu o mea tigā?” Pe e tutusa ou lagona ma lagona na oo i le perofeta o Sapakuka?

Sofia: Ioe.

Metala: E leʻi otegiaina e le Atua Sapakuka ina ua ia faia na fesili, e na te leʻi fetalai atu foʻi iā Sapakuka e tau lava o le faaalia o le faatuatua.

Sofia: E leʻi tau muamua loʻu mafaufau i lenā manatu.

E ʻINOʻINO IEOVA I MAFATIAGA

Metala: O loo taʻua i le Tusi Paia, e silafia e le Atua o tatou mafatiaga, ma e manatu mamafa mai i ai.

Sofia: O le ā le uiga o lau tala?

Metala: Seʻi oʻu faaali atu iā te oe se faamaoniga o lenā manatu lea e taʻua i le Esoto 3:7. E te finagalo malie ae e faitauina mai le ta mau lea?

 Sofia: Fai mai le mau: “Ua fetalai mai Ieova: ʻUa ou iloa lava le sauāina o loʻu nuu o loo i Aikupito, ma ua ou faalogo i lo latou ōi ona o ē e tutuli faamalosi i latou e faia galuega; ua ou iloa puapuaga o loo mafatia ai i latou.’”

Metala: Faafetai lava mo le faitau. E tusa ai la ma le mau, pe e manatu mai le Atua i ona tagata pe a mafatia?

Sofia: E foliga mai o le manatu lenā.

Metala: Ioe, e lē na o le tau lava ina silafia e le Atua o le mea o loo tupu. Toe tagaʻi foʻi i le vaega mulimuli o le fuaiupu. Ua fetalai le Atua: “Ua ou iloa puapuaga o loo mafatia ai i latou.” Faamata o ni faamatalaga na e faia e se Atua e lē alofa?

Sofia: E leai.

Metala: Ioe, e lē gata e silafia e le Atua o tatou faafitauli, ae e tigā foʻi lona finagalo pe a tatou feagai ma faafitauli.

Sofia: E saʻo oe.

Metala: E tusa ai ma lenā manatu, seʻi ta toe faitau i se isi faataʻitaʻiga i le Isaia 63:9, a o lona vaega muamua. Fai mai le mau: “Na mafatia o ia i taimi o o latou mafatiaga.” O le ā sou manatu, pe na aafia faalogona o le Atua ina ua mafatia ona tagata?

Sofia: E foliga mai o le manatu lenā lea e taʻua i le mau.

Metala: O le mea moni Sofia, e manatu mamafa mai le Atua iā i tatou, ma e lē fiafia o ia pe a tatou mafatia. Pe a tigā o tatou faalogona, e tigā foʻi faalogona o le Atua.

AISEĀ UA IA FAATUAI MAI AI?

Metala: Ae ou te leʻi alu, e iai se isi manatu ou te fia faailoa atu iā te oe.

Sofia: E leai se mea o iai.

Metala: Mātau le manatu o loo taʻua i le Tusi Paia e faatatau i le mana o le Atua. E mafai ona e faitauina mai le Ieremia 10:12 faamolemole?

Sofia: Fai mai le mau: “O Ia na faia le lalolagi i lona mana, o Lē na matuā faatumauina le laueleele i lona atamai, ma o Lē foʻi na fofola le lagi i lona faautauta.”

Metala: Faafetai mo le faitau. Mātau le manatu o loo taʻua i le mau. Pe na manaʻomia e le Atua le tele o le mana ina ia foafoaina ai le vateatea ma mea uma o loo iai?

Sofia: E mautinoa lava sa ia manaʻomia.

Metala: O lea la, afai sa iai i le Atua le mana e foafoaina ai mea uma, pe e tatou te lē faatalitalia o le a ia faaaogā foʻi lona mana e faamuta ai o tatou mafatiaga?

Sofia: Saʻo lelei.

Metala: Seʻi toe mafaufau i le mea na tupu i si ou tinā. Aiseā e te faanoanoa ai pe a e vaai atu i ona mafatiaga?

Sofia: Ona ou te alofa iā te ia. O ia o loʻu tinā.

Metala: Pe ana faapea e iai iā te oe le mana e faamālōlōina ai o ia, faamata e te lē faia faapea?

Sofia: Ae ā, o le mea lenā ou te faia.

Metala: Seʻi manatu i le uiga o lenā mea. O loo aʻoaʻoina i le Tusi Paia, e silafia e le Atua o tatou mafatiaga, e tigā alofa mai iā i tatou, ma e tele le mana o loo iā te ia. Seʻi faaāta la i lou mafaufau, o le ā le tele o loo onosaʻi mai ai le Atua, lea ua māfua ai ona ia lē faalaa mai loa e aveesea o tatou mafatiaga?

Sofia: Ou te leʻi mafaufau muamua i lenā manatu.

Metala: Faamata e iai se māfuaaga tatau ua lē faalaa mai ai le Atua e aveese o tatou mafatiaga? *

Sofia: Atonu e iai.

Metala: Pei a o lau telefoni la e tatagi mai, atonu la ou te toe asiasi mai i se isi taimi, ona ta talanoa atili lea e faatatau i lenei lava mataupu.

Sofia: Manaia lenā tonu. Ae faafetai lava mo lou asiasi mai. *

Pe e iai se mataupu faale-Tusi Paia o loo e mafaufau i ai? Po o e fia iloa talitonuga po o faiga faaletapuaʻiga a Molimau a Ieova? Pe afai o lea, ia talanoa atu i se tasi o Molimau a Ieova. O le a fiafia o ia e te lua talanoa i lenā mataupu.

^ pala. 61 Mo nisi faamatalaga, tagaʻi i le mataupu e 11 o le tusi O ā Aʻoaʻoga Moni a le Tusi Paia?, lomia e Molimau a Ieova.

^ pala. 64 O le a talanoaina i se isi mataupu o i luma, pe aiseā ua lē faalaa mai ai le Atua e aveesea mafatiaga o tagata.