Alu i mataupu o loo iai

Alu i le lisi o mataupu

Pe e Iai se Tapuaʻiga e Maufaatuatuaina?

Pe e Iai se Tapuaʻiga e Maufaatuatuaina?

E mautinoa e te lē toe maufaatuatuaina so o se tapuaʻiga, pe afai na iai se tapuaʻiga na faia se mea e te lē fiafia ai. Peitaʻi, o loo iai pea se tapuaʻiga e mafai ona e maufaatuatuaina. A o iai Iesu i le lalolagi, na ia faapotopoto ai se vaega o soo faamaoni, ma aʻoaʻo i latou ina ia ola e tusa ma tapulaa a le Atua. O loo iai pea soo faamaoni o Keriso, o ē e latou te faatatauina ma le faaeteete mataupu silisili o le Tusi Paia i o latou olaga. O fea e te mauaina ai i latou?

Na faapea mai Estelle, lea na taʻua i se tasi o mataupu ua mavae: “Na amata ona ou aʻoaʻoina le Tusi Paia ina ua matou suʻesuʻe faatasi ma Molimau a Ieova. Na vave ona ou malamalama i le manatu o loo i le Ioane 8:32, lea e faapea mai: ʻE iloa e outou le upu moni, e tuusaʻoloto foʻi outou e le upu moni.’”

Na faapea mai Ray e pei ona taʻua i se tasi o mataupu: “O le suʻesuʻeina o le Tusi Paia faatasi ma Molimau a Ieova, na ou malamalama ai e lē faapogaia e le Atua mafatiaga o tagata. Ou te lagona foʻi le lotofaafetai, ona ua mafai ona ou iloa, e iai le māfuaaga ua lē taofia ai e le Atua le amioleaga i le taimi lenei, ma ua ia folafola mai ua toeitiiti ona ia tafiesea lea o le amioleaga.”

O le mea moni, e lē faigofie ona faia le mea saʻo a o tatou ola ai faatasi ma ē amioleaga. Ae e mafai ona tatou faia. E toʻatele o loo naunau e fia malamalama ma taumafai e faatatauina le Tusi Paia. O le māfuaaga lenā ua faia ai e Molimau a Ieova suʻesuʻega faale-Tusi Paia i le lalolagi aoao e aunoa ma se totogi. I vaiaso taʻitasi, e toʻatele ua latou aʻoaʻoina e faatatau i aʻoaʻoga a le Tusi Paia. O le iʻuga, ua latou faalatalata atu i Lē na foafoaina mea, ma atiaʻe ni olaga e sili ona fiafia. *

Aiseā e te lē fesili ai i Molimau a Ieova pe aiseā e latou te maufaatuatuaina ai la latou tapuaʻiga?

Aiseā e te lē fesili ai i Molimau a Ieova i se isi taimi e toe asiasi atu ai, i le māfuaaga e latou te maufaatuatuaina ai la latou tapuaʻiga? Iloilo pe faamata o ola Molimau a Ieova e tusa ma tapulaa o le Tusi Paia, ona faia lea o lau filifiliga pe faamata o le tapuaʻiga lea e te maufaatuatuaina.

^ pala. 5 Mo nisi faamatalaga tagaʻi i le tusi, O ā Aʻoaʻoga Moni a le Tusi Paia? lomia e Molimau a Ieova.