Alu i mataupu o loo iai

Alu i le lisi o mataupu

Se Tusitusiga na Natia

Se Tusitusiga na Natia

Na matuā ofo se tagata atamai i se tusitusiga anamua na ia mauaina. Na ia iloiloina ma le māeʻaeʻa lenei tusitusiga. O le auala na tusia ai, aemaise le kalama na faaaogāina, na ia mautinoa ai, o nisi ia o vaega mai se tusitusiga e sili ona tuai o le Tusi Paia i le gagana Georgia!

NA MAUA lenei tusitusiga iā Tesema 1922, ina ua suʻesuʻeina e Ivané Javakhishvili o se tagata atamai mai Georgia, le auala na faatulaga ai le alafapeta i le gagana Georgia. O lenei tusitusiga Eperu o se kopi o le Tusi Tulafono a Iutaia. A o ia iloiloina lenei tusi, na ia mātauina ai i tua atu o le tusitusiga Eperu, o loo ataata mai ai tusitusiga ua tapē ese i le gagana Georgia. *

O le tusitusiga lea na natia pe tapē ese, o se vaega o le tusi o Ieremia lea na tusia i le senituri lona 5 T.A. A o leʻi mauaina lenei tusitusiga, na manatu tagata Georgia, o le uluaʻi tusitusiga o le Tusi Paia i la latou gagana, na tusia lea i le senituri lona 9 T.A. Mulimuli ane, na maua foʻi isi vaega o le Tusi Paia, ma na tusia i le senituri lona 5 T.A. pe i tua atu foʻi. Seʻi mafaufau i le fiafia pe ana faapea e te mauaina nei tusitusiga, lea na tusia a o leʻi leva ona mavae atu Iesu ma le ʻauaposetolo!

O ai na tusia lenei faaliliuga? Faamata o se galuega a se tagata e toʻatasi, po o se galuega fai faatasi a ni tagata faaliliu maelega? E leai ni faamaumauga e iloa ai le tali o na fesili. Po o le ā lava le tulaga, ae o se faamaoniga lea e iloa ai na tusia le Tusi Paia, po o se vaega i le gagana Georgia a o lata i le senituri lona 4 T.A. Na masani foʻi tagata Georgia i le Afioga a le Atua i la latou gagana talu mai lenā taimi.

Na faamaonia lenā tulaga i le tusi The Martyrdom of St. Shushanik the Queen, lea na tusia i le senituri lona 5. I lenā tusi, o loo siiina mai ai nisi o vaega o le tusi o Salamo, Evagelia, ma isi vaega o le Tusi Paia. Na taʻua ai foʻi le taumafai o le tane a Shushanik o Varsken, ma o ia foʻi o le kovana o Kartli i Georgia, ina ia faafiafia tagata maualuluga o Peresia, i lona teena lea o le faa-Kerisiano, ae liliu atu i le lotu a le malo o Peresia o le Zoroastrian. Na ia faatonu foʻi lana avā e faia faapea. Peitaʻi, e leʻi faafitia e lana avā ona talitonuga faa-Kerisiano, ma na faamāfanafanaina o ia i manatu o le Tusi Paia seʻia oo i le taimi na fasiotia ai o ia.

 Talu mai le senituri lona 5, e leʻi toe taofia le faaliliuina ma le lomiaina o le Tusi Paia i le gagana Georgia. O le tele o kopi o le Tusi Paia na lomiaina, na faamaonia ai le galulue mamafa o le ʻaufaaliliu. Seʻi o tatou iloiloina vala e lua o lenei galuega fitā, o le faaliliuina ma le lomiaina o le Tusi Paia.

TELE FAALILIUGA O LE TUSI PAIA

I le senituri lona 11, na taʻua ai e Giorgi Mtatsmindeli o se monike mai Georgia, lona maelega ma le galue mamafa i le faaliliuina o le tusi o Salamo mai i le gagana Eleni i le gagana Georgia. Aiseā na manaʻomia ai ona toe faaliliu le Tusi Paia, ae o lea ua leva ona iai le faaliliuga i le gagana Georgia?

E oo ane i le senituri lona 11, o loo iai pea nisi o faaliliuga o le Tusi Paia i le gagana Georgia, ae o nisi faaliliuga ua lē o toe iai. I le taimi lea, ua iai se suiga i le gagana Georgia, ma sa faafaigatā ai i tagata faitau ona malamalama i nisi o tusitusiga mai uluaʻi senituri. O lea na manatu ai loa le ʻaufaaliliu e toe teuteu le Tusi Paia Georgia. Na tāua tele le matafaioi a Giorgi i le faaliliuina o lenā Tusi Paia. Na ia faatusatusa tusitusiga Georgia i tusitusiga Eleni, ma taumafai e faaliliu nisi o vaega e lē o iai, o nisi taimi o tusi atoa. E feagai Giorgi ma ona tiute o se taʻitaʻi ulu i le monaseri pe a oo i le ao, ae pe a oo i le pō, e na te faaliliuina le Tusi Paia.

Na fesoasoani se tasi o uō a Giorgi o Ephrem Mtsire i nisi o galuega faaopoopo. Na ia saunia taʻiala i le auala e faaleleia atili ai le faaliliu, lea e aofia ai mataupu silisili, ma taumafai e faatusatusa le gagana o loo tusia ai le Tusi Paia i le gagana Georgia, ma vaai po o sologa lelei i se faitau. O ia foʻi na amataina le faaaogāina o faasino mau ma faaopoopoga i le pito i lalo i le gagana Georgia. O taumafaiga a Ephrem, na matuā suia ai le auala na faaliliu ai nisi o vaega o le Tusi Paia. O galuega a Giorgi ma Ephrem, ua faataatia ai se faavae lelei i le auala e faia ai faaliliuga.

I le selau tausaga na sosoo ai, na tele tusi na lomia i Georgia. Na faavae foʻi nisi o aʻoga ma kolisi i Gelati ma Ikalto i Georgia. E talitonu le toʻatele o tagata atamamai, o le Gelati Bible, o loo teuina i le Georgian National Centre of Manuscripts, o se faaliliuga fou o le Tusi Paia na tusia e se tasi o tagata atamai mai Gelati po o Ikalto.

O le ā se aafiaga i tagata Georgia i le auala na faaliliuina ai le Tusi Paia? I le senituri lona 12, na tusia ai e se fatusolo e igoa iā Shota Rustaveli se tusi e taʻua o le Vepkhis-tqaosani (Knight in the Panther Skin). Na matuā telē se aafiaga i tagata i lenā senituri, ma na manatu i ai o le Tusi Paia lona lua lea i le gagana Georgia. Na suʻesuʻeina e K. Kekelidz o se isi foʻi tagata atamai i aso nei mai Georgia, le tusi lea na tusia e Shota Rustaveli, ma iloa ai, “o nisi o mea na ia taʻua,  sa sii saʻo mai i le Tusi Paia.” Sa logolelei nisi o ana tusitusiga, e aofia ai faamatalaga e faatatau i faauōga moni, agaalofa, faaaloalo i fafine, ma le alofa lē manatu faapito mo tagata ese. O nei tusitusiga ma isi mataupu silisili o le Tusi Paia e faatatau i tapulaa tauamio, na iai se aafiaga tele i mafaufauga o tagata Georgia e oo mai lava i aso nei.

GALUEGA NA FAATAUNUU E LE AIGĀTUPU

I le senituri lona 17, na naunau ai le aigātupu o le malo o Georgia e lomia se Tusi Paia i la latou gagana. O lea na fausia ai e le tupu o Vakhtang VI se fale lomitusi i le laumua o Georgia o Tbilisi. Peitaʻi, e leʻi oo i le taimi e mafai ona lomia ai le Tusi Paia. E pei ua toe natia le Tusi Paia i le gagana Georgia. E na o ni nai vaega o le manusikulipi sa maua, ma e leʻi faaaogāina foʻi le gagana sa tautatala ai i lea taimi. O lea na toe teuteu ai e Sulkhan-Saba Orbeliani le Tusi Paia, o se tasi e atamai i le faaaogāina o gagana.

Sa faia ma le māeʻaeʻa e Orbeliani ana galuega. E tele gagana sa ia malamalama ai, e aofia ai le gagana Eleni ma le Latina. O lea na ia iloilo ai nei faamaumauga eseese ma taumafai e faatusatusa i le manusikulipi i le gagana Georgia. Ae ui i lea, e leʻi fiafia le Lotu Orthodox ona e leʻi ōgatusa ana tusitusiga ma aʻoaʻoga a le lotu. Na tuuaʻia o ia ona o le fulitua i le lotu, ma na latou faatalitonu le tupu e taofia Orbeliani mai le faaliliuina o le Tusi Paia. Na taʻua i se tusi na faaulutalaina“The First Printery in Georgia” e faapea, i le fono a le Lotu Orthodox, na faamalosia ai e taʻitaʻi lotu ia Orbeliani, ina ia susunuina le Tusi Paia lea sa ia galue ai mo le tele o tausaga.

Ae o le itu e mataʻina ai, o loo maua i se tasi o manusikulipi lea e taʻua o le Saba’s Bible, ni faamatalaga na tusia e Orbeliani. E taumānatu nisi, ailoga o le Tusi Paia lea sa taumafai taʻitaʻi lotu e aveesea, auā e na o le faaopoopoga o loo i le Saba’s Bible o loo taʻua ai Orbeliani.

E ui i mea na tutupu, ae na naunau pea nisi o le aigātupu e lomia le Tusi Paia. I le va o le 1705 ma le 1711, na lomia ai loa nisi o vaega o le Tusi Paia. Ona o taumafaiga na faia e perenise o le malo o Georgia o Bakari ma Vakhushti, ua mafai ai ona lomia le Tusi Paia atoa i le 1743. O le mea moni, ua lē o toe natia lenei tusitusiga.

^ pala. 3 I aso anamua, sa taugatā ma mauagatā mea e faaaogā mo tusitusiga. O se mea masani la le tapē ese o tusitusiga tuai, ae toe tusia nisi tusitusiga fou. O na tusitusiga i pepa na fai i paʻu o laau, e taʻua o le palimpsests, lea e mai i le gagana Eleni, e uiga atu i le “toe tapē ese.”