“O le faafitauli sili o loo oʻu fesagaʻia, o faalogona o le leai o se aogā.” O le faamatalaga lenā a se tamaʻitaʻi na manatu e lē mafai ona alofa Ieova iā te ia. Pe e faapena foʻi ou faalogona? O lea, e te ono taumānatu, ʻPe e alofa moni Ieova i ona tagata tapuaʻi taʻitoʻatasi?’ O le tali o le ioe! E faamaonia lenā manatu i upu a Iesu.​—Faitau le Ioane 6:44.

O le ā le manatu o Iesu, o lē e sili ona malamalama i uiga faapea le finagalo o Ieova? (Luka 10:22) Na faapea mai o ia: “E lē mafai ona sau o se tagata iā te aʻu pe a lē tosina mai o ia e le Tamā o lē na auina mai aʻu.” O lea, e lē mafai ona avea i tatou ma soo o Iesu, po o ni tagata tapuaʻi o Ieova, pe afai e lē tosina mai i tatou e Ieova. (2 Tesalonia 2:13) O le malamalama i upu a Iesu, o le a iloa ai faamaoniga maumaututū o le alofa o le Atua.

O le ā le uiga o le tosina mai e Ieova o i tatou? O le upu Eleni ua faaliliuina i le “tosina” e faasino atu foʻi i le toso mai o se upega. (Ioane 21:6, 11) Po o lona uiga e faamalosia i tatou e Ieova e auauna iā te ia? E leai, auā ua ia tuu mai le saʻolotoga e filifili ai, ma e na te lē tauanauina i tatou e faailoa atu mea o loo i o tatou loto. (Teuteronome 30:19, 20) Na taʻua e se tagata atamai, e lē mafai e se isi tagata ona faamalosia le isi tagata e sasaa mai ona faalogona, seʻi vaganā ai o ia lava. O loo silasila mai Ieova i loto o le faitau piliona o tagata i le lalolagi, ina ia saʻili ē o loo naunau moni e fia iloa o ia, ma tali mai iā i latou i se auala alofa. (1 Nofoaiga a Tupu 28:9) E faapefea?

E tosina mai ma le alofa e Ieova tagata taʻitoʻatasi, “o ē ua saunia o latou loto.” (Galuega 13:48) Ua ia faia faapea e ala i le tala lelei o loo i le Tusi Paia, faapea lona agaga paia. Pe a mātauina e Ieova se tasi o loo naunau lona loto i upu moni o le Tusi Paia, ona Ia faaaogā lea o lona agaga paia e fesoasoani ai i lenā tagata e malamalama i na upu moni ma faatatauina i lona olaga. (1 Korinito 2:11, 12) Pe a aunoa ma le fesoasoani a Ieova, o le a lē mafai ona avea i tatou ma ona tagata tapuaʻi maelega, po o ni soo moni o Iesu.

O le ā la ua tatou aʻoaʻoina e uiga iā Ieova mai i le Ioane 6:44? E tosina mai e Ieova tagata, ona o loo ia mātauina se mea lelei i loto o tagata taʻitoʻatasi, ma e alofa mai o ia. O le malamalama i lenei upu moni na faamāfanafanaina ai le tamaʻitaʻi o loo taʻua i le amataga. Na ia faapea mai: “O se faaeaga sili le avea ma auauna a Ieova. Afai ua filifilia aʻu e Ieova e avea ma ana auauna, o lona uiga e matuā tāua aʻu iā te ia.” Ae faapefea oe? Pe e uunaʻia oe e mafuta atu iā Ieova, ona o lea ua e iloa e alofa o ia i ona tagata tapuaʻi taʻitoʻatasi?