PE NA maua moni e Iesu se olaga e aogā? Na ola aʻe Iesu i se aiga mativa, ma e leʻi tele ni ana meafaitino. E leʻi iai foʻi “se mea e moe ai o ia.” (Luka 9:57, 58) I le taimi e tasi, sa inosia, faileagaina, ma na iʻu ina fasiotia o ia e ona fili.

E te ono manatu la e leʻi maua e Iesu se olaga e aogā. Peitaʻi, e iai isi vala o le olaga o Iesu e manaʻomia ona iloiloina. Seʻi o tatou talanoa i ni vala se fā.

“O laʻu meaʻai, o le faia lea o le finagalo o lē na auina mai aʻu.”​—Ioane 4:34.

Na maumauaʻi Iesu e faia le finagalo o lona Tamā i le lagi o Ieova, * e ala i ana upu ma gaoioiga. Na ia faatusaina lenā tulaga i se meaʻai, e pei ona taʻua i le mau o i luga. Seʻi o tatou iloilo le māfuaaga na ia faia ai lenā faatusatusaga.

Na taʻua e Iesu na upu i se taimi o le aoauli. (Ioane 4:6) Na ia savalia mauga o Samaria i le taeao atoa, ma e mautinoa ua fia taumafa. O lea na tauanau ai o ia e ona soo: “Le Aʻoaʻo e, inā taumafa ia.” (Ioane 4:31) Ae o le tali a Iesu, e iloa ai sa fafagaina ma faamalosia o ia ona o le faia o le finagalo o le Atua. Ioe, sa maua e Iesu se olaga e aogā.

“Ou te alofa i le Tamā.”​—Ioane 14:31.

Sa māfana le faiā a Iesu ma lona Tamā i le lagi. O le alofa atoatoa o Iesu i le Atua, na uunaʻia ai o ia ina ia iloa lelei le Atua, Lona suafa, Ana fuafuaga, faapea Ona uiga. O upu, gaoioiga, ma uiga o Iesu ua matuā atagia mai ai lona Tamā. O le mea lea, ina ua talosaga atu Filipo iā Iesu: “Ia e faailoa mai iā i matou le Tamā,” na tali atu Iesu: “O lē ua vaai mai iā te aʻu, ua vaai foʻi o ia i le Tamā.”​—Ioane 14:8, 9.

O le alofa tele o Iesu i lona Tamā na ia usiusitaʻi ai iā te Ia seʻia oo i lona maliu. (Filipi 2:7, 8; 1 Ioane 5:3) O lenā alofa i le Atua, na maua ai e Iesu le tele o aogā i lona olaga.

“E leai lava se tasi e sili atu lona alofa nai lo o lenei, o le foaʻiina atu lea e se tasi o lona ola mo ana uō.”​—Ioane 15:13.

O lo tatou tulaga agasala ua leai ai so tatou faamoemoe mo le lumanaʻi. O loo taʻua i le Tusi Paia: “E pei ona oo mai o le agasala i le lalolagi ona o le tagata e toʻatasi [Atamu], o le oti foʻi ona o le agasala, ona oo mai ai lea o le oti i tagata uma auā ua agasala uma lava.” (Roma 5:12) E lē mafai ona tatou ʻaloese mai āuga o le agasala, aemaise lava le oti.​—Roma 6:23.

E tatou te faafetaia Ieova ona o lona alofa, lea ua ia saunia mai ai se vaifofō mo le fanau a tagata. Na lotomalie o ia e maliu lona Alo lelei atoatoa o Iesu, ina ia saunia ai le taulaga togiola e tuusaʻoloto ai tagata mai le agasala ma le oti. Na lotomalie foʻi Iesu e foaʻi mai lona ola ona o le alofa i lona Tamā faapea ma tagata. (Roma 5:6-8) Na ia maua aogā i lona olaga ona o lona alofa lē manatu faapito. *

“O loʻu Atalii pele lenā, o lē ua malie i ai loʻu loto.”​—Mataio 3:17.

O le fetalaiga lenā a Ieova mai le lagi i le taimi o le papatisoga o Iesu, e faailoa mai ai lona alofa ma lona finagalo malie iā Iesu. E lētioa a fetalai Iesu: ʻE alofa le Tamā iā te aʻu’! (Ioane 10:17) Na lototele Iesu ina ua feagai ma faigatā e oo i le oti, auā na ia iloa o loo finagalo malie ma alofa lona Tamā iā te ia. (Ioane 10:18) O le auala lenā na ia maua ai se olaga e sili ona aogā.

Ioe, sa maua e Iesu se olaga e aogā, ma e mautinoa e mafai ona tatou faaaʻoaʻo iā te ia i le auala e maua ai se olaga e aogā. O le mataupu o loo sosoo mai, o le a iloiloina ai fautuaga manino na tuuina atu e Iesu i ona soo, i le auala e mafai ona ola ai.