O le Tusi Paia o le Afioga lea a le Atua, ma e pei o se tusi mai i se tamā alofa. (2 Timoteo 3:16) O loo faamatala mai ai e le Atua le auala e tatou te faafiafia ai o ia, le māfuaaga ua ia lē taofia ai mea leaga, ma le lumanaʻi ua saunia mai mo tagata. Ae ua faauiga sesē e taʻitaʻi lotu aʻoaʻoga a le Tusi Paia, ma iʻu ina manatu ai tagata e lē taitai ona latou malamalama i le Tusi Paia.​—Galuega 20:29, 30.

E finagalo Ieova le Atua ina ia tatou iloa upu moni e uiga iā te ia. O le māfuaaga lea ua ia saunia mai ai se tusi e faigofie ona malamalama i ai.​—Faitau le 1 Timoteo 2:3, 4.

Ua fesoasoani mai foʻi le Atua ina ia tatou malamalama i le Tusi Paia, e ala i le auina mai o Iesu e aʻoaʻo i tatou. (Luka 4:16-21) Na fesoasoani Iesu i lana ʻaufaalogologo ina ia malamalama i Tusitusiga Paia, e ala i le faamatala o fuaiupu taʻitasi.​—Faitau le Luka 24:27, 32, 45.

Na faavaeina e Iesu le faapotopotoga Kerisiano ina ia faaauauina le galuega na ia amataina. (Mataio 28:19, 20) I aso nei, ua fesoasoani foʻi soo faamaoni o Iesu i tagata ina ia malamalama i le aʻoaʻoga a le Tusi Paia e uiga i le Atua. E fiafia Molimau a Ieova e fesoasoani iā te oe, pe afai e te fia malamalama i le Tusi Paia.​—Faitau le Galuega 8:30, 31.