Aiseā ua Faaauau ai Pea Faiga Piʻopiʻo?

“Ua pule ai le tagata i le isi tagata ma ua matuā afāina ai o ia.”—FAILAUGA 8:9.

O LE faamatalaga e pei ona taʻua, ua faaalia ai le tulaga moni o pulega a tagata, ma le pogai o le tele o mafatiaga ma puapuaga. Ua autausagā o taumafai tagata lelei e aumaia se lalolagi amiotonu, ae e lē o taulau ona o le tele o le matapeʻapeʻa ma faiga piʻopiʻo. Aiseā ua faapea ai? Aiseā ua faaauau ai pea faiga piʻopiʻo? E māfua ona o aafiaga lē lelei e tolu o loo mulimuli mai.

1. Agasala.

Ua faaalia manino mai i le Tusi Paia, ua tatou “agasala uma lava.” (Roma 3:9) Ua “nofo” le agasala i totonu o i tatou e tai pei o se maʻi tuufaasolo e leai se vaifofō. Ua faitau afe tausaga o “pule” le agasala e pei o se tupu i tagata, ma ua iai lana “tulafono” i totonu o i tatou. O faanaunauga agasala ua taʻitaʻia atu ai nisi i le faaaogāina o le afu o isi, ina ia maua ai le tulaga pule ma mea e mananaʻo ai.—Roma 5:21; 7:17, 20, 23, 25.

 2. Taaʻiga a lenei lalolagi leaga.

Ua taatele le matapeʻapeʻa ma le manatu faapito i le lalolagi, ma ua faigatā ai mo nisi ona faaesea i latou mai i isi. O le manatu faapito ua mananaʻo tele ai nisi i le pule, ma tuʻinanau ai ina ia maua le tele o tupe ma meafaitino. E faanoanoa ona ua latou filifilia faiga lē faamaoni e faataunuu ai o latou faanaunauga. Nai lo o le tetee atu i nei aafiaga lē lelei, ae ua “mulimuli i le toʻatele ina ia faia o mea leaga.”—Esoto 23:2.

3. Satani le Tiapolo.

Ua “faasesēina le lalolagi atoa” e le foafoaga agaga fouvale o Satani. (Faaaliga 12:9) E matuā fiafia o ia e faatogafiti ona faasesēina tagata. O tagata uma lava, e iai se faanaunauga ina ia lelei lona tulaga tau tamaoaiga, ae e ono faaaogā e Satani lenā faanaunauga e maileia ai se tasi, ina ia manaʻo i le tele o mea ma iʻu ai i le faia o faiga piʻopiʻo.

Po o le uiga la o lenā mea, ua pei i tatou o ni pepe meataalo e faatonutonu e Satani? O le a tatou maua le tali i le mataupu o sosoo mai.