Alu i mataupu o loo iai

Alu i le lisi o mataupu

Pe e A‘oa‘o Atu Fafine Molimau a Ieova?

Pe e A‘oa‘o Atu Fafine Molimau a Ieova?

Ua Fesili Mai le ʻAufaitau . . .

Pe e Aʻoaʻo Atu Fafine Molimau a Ieova?

▪ Ioe, e faitau miliona fafine Molimau a Ieova o loo aʻoaʻo atu i le lalolagi aoao. O i latou o se vaega toʻatele o loo talaʻia le tala lelei o le Malo o le Atua. Ua faamatala faavaloaga i latou i le Salamo 68:11 e faapea: “Ua tulei mai le afioga a Ieova; o fafine e folafolaina atu le tala lelei o le ʻautau e toʻatele i latou.”

Peitaʻi, e lē tatau ona manatu e tutusa le auala e faia ai le auaunaga a fafine Molimau a Ieova, ma fafine o loo avea ma faifeʻau i isi lotu. E matuā eseese lava a latou matafaioi. I le ā le itu?

E eseese tagata e aʻoaʻo atu i ai. O faifeʻau fafine a isi lotu e iai o latou tofiga maualuluga i totonu o le lotu, ma e aʻoaʻo atu i tagata o le ʻaulotu. Ae o fafine Molimau a Ieova, e aʻoaʻo atu i tagata i le lautele i taimi o le talaʻiga, ae lē i le faapotopotoga.

O le isi eseesega, o matafaioi i totonu o le faapotopotoga. O faifeʻau fafine a lotu e vaavaaia ma aʻoaʻo le ʻaulotu i aʻoaʻoga a le lotu. Ae e lē aʻoaʻo fafine Molimau i totonu o le faapotopotoga pe afai o iai se tane ua uma ona papatiso. E na o tane ua tofia e aʻoaʻo atu e mafai ona faia faapea.—1 Timoteo 3:2; Iakopo 3:1.

Ua taʻua i le Tusi Paia, e na o tane ua tuu i ai le tiute tauave e vaavaaia le faapotopotoga. Mātau le faaaʻoaʻoga na faataatia e le aposetolo o Paulo ina ua tusi atu i le ovasia o Tito: “O le mea lea na ou tuua ai oe i Kereta, ina ia . . . tofia ni toeaina i lea aai ma lea aai.” Na taʻua atili e Paulo, e tatau i tane ua tofia ona “ lē taʻuleagaina, o se tane e tasi le avā.” (Tito 1:5, 6) O le faatonuga lava lenā na avatu e Paulo ina ua tusi atu iā Timoteo: “Afai e fia aapa atu se tasi i le tofi o se ovasia, e naunau o ia i galuega lelei. E tatau i le ovasia ona lē taʻuleagaina, o se tane e toʻatasi lana avā, . . . ma e agavaa e aʻoaʻo atu.”—1 Timoteo 3:1, 2.

Aiseā ua na o tane ua tuu atu i ai lenā tiute tauave? Na faapea mai Paulo: “Ou te lē faatagaina se fafine e aʻoaʻo atu, pe pule foʻi i se tamāloa, a ia lē tautala o ia. Auā na muamua ona faia o Atamu, ona faia ai lea o Eva.” (1 Timoteo 2:12, 13) O lea la, o le foafoaina muamua o Atamu, ua tatou iloa ai le māfuaaga ua tofia ai e le Atua tane ina ia vaavaaia le faapotopotoga ma aʻoaʻo atu.

E mulimuli faifeʻau talaʻi a Ieova i le faaaʻoaʻoga a lo latou Taʻitaʻi o Iesu Keriso. Na tusi le soo o Luka e uiga i le faiva a Iesu e faapea, na “malaga atu loa o ia mai i lea aai i lea aai, ma mai i lea nuu i lea nuu, ua talaʻi ma folafola atu le tala lelei o le malo o le Atua.” Mulimuli ane, na auina atu e Iesu ona soo e faia le galuega lava lea e tasi: “Ona latou ō atu lea i le oganuu atoa, mai i lea nuu i lea nuu, ua folafola atu le tala lelei.”—Luka 8:1; 9:2-6.

I aso nei, o loo maelega faifeʻau talaʻi uma a Ieova, e aofia ai tane ma fafine, i le galuega lea na valoia mai e Iesu e faapea: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.”—Mataio 24:14.