Alu i mataupu o loo iai

Alu i le lisi o mataupu

O le ā o le a Tupu i le Aso Faamasino?

O le ā o le a Tupu i le Aso Faamasino?

Aʻoaʻoga a le Tusi Paia

O le ā o le a Tupu i le Aso Faamasino?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. O le ā le Aso Faamasino?

E pei ona faaalia i le ata i le itu taumatau, e talitonu le toʻatele, o le Aso Faamasino o le a tutū ai tagata i luma o le nofoālii o le Atua, ona faamasinoina lea e tusa ma a latou amio, ma o le a ola isi i le lagi, ae susunu isi i le afi i seoli. Ae ua faamatala mai i le Tusi Paia, o le fuafuaga o le Aso Faamasino o le aveesea lea o faiga lē tonu. (Salamo 96:13) Ua tofia e le Atua Iesu e fai ma Faamasino, ina ia toe faafoʻisia le amiotonu.—Faitau le Isaia 11:1-5; Galuega 17:31.

2. E faapefea ona toe faafoʻisia le amiotonu?

O le agasala ma le loto iai o Atamu, ua māfua ai le agasala, mafatiaga ma le oti. (Roma 5:12) Ae o le a toe faafoʻisia le amiotonu, pe a toe faatutū mai ē ua maliliu i le pulega a Iesu i le afe tausaga.—Faitau le Faaaliga 20:4, 11, 12.

E faamasinoina ē o le a toetutū mai, e lē i amioga sa latou faia a o feola, ae e tusa ma mea o le a latou faia i le afe tausaga, e faavae i le tusi tāʻai lea o loo taʻua i le Faaaliga e 20. (Roma 6:7) O le a toetutū mai “tagata amiotonu ma tagata amiolētonu,” ma maua le avanoa e toe aʻoaʻoina ai e uiga i le Atua.—Faitau le Galuega 24:15.

3. O le ā o le a faataunuuina ai?

O i latou na maliliu ae e leʻi iloa Ieova le Atua, o le a maua le avanoa e suia ai o latou olaga. O ē e filifili e faia mea lelei, o le a “toetutū i le ola.” A o ē e mumusu e aʻoaʻoina ala o Ieova, o le a “toetutū i le faamasinoga.”—Faitau le Ioane 5:28, 29; Isaia 26:10; 65:20.

I le iʻuga o le Aso Faamasino e afe tausaga, o le a toe faafoʻisia e Ieova le ola lelei atoatoa i tagata usiusitaʻi. (1 Korinito 15:24-28) Maʻeu se faamoemoe matagofie mo i latou. Ae i le tofotofoga mulimuli, o le a toe tatala ai Satani mai le tō lea sa saisaitia ai i le afe tausaga. O le a ia toe faasesē tagata ina ia liliu ese mai iā Ieova. A o ē e manumalo iā Satani, o le a maua le ola e faavavau i le lalolagi.—Faitau le Isaia 25:8; Faaaliga 20:7-9.

4. O le ā le isi aso faamasino e maua ai aogā?

Ua taʻua foʻi i le Tusi Paia le iʻuga o lenei lalolagi pe a faaumatia tagata amioleaga, o se “aso faamasino.” E faafuaseʻi ona oo mai e pei o le Lolo i aso o Noa, lea na tafiesea ai na o tagata amioleaga. O le tafiesea o “tagata faalēmataʻu,” o le a maua ai le avanoa e “mau ai le amiotonu” i le lalolagi fou.—Faitau le 2 Peteru 3:6, 7, 13.

Mo nisi faamatalaga, tagaʻi i le itulau 213-215 o lenei tusi, O Ā Aʻoaʻoga Moni a le Tusi Paia? lomia e Molimau a Ieova.

[Ata i le itulau 16]

“Le Aso Faamasino Mulimuli,” Tusia e Gustave Doré, 1832-1883

[Ē Ana le Ata]

Engravings by Doré

[Ata i le itulau 16]

[Ata i le itulau 17]