Alu i mataupu o loo iai

Alu i le lisi o mataupu

E te Silafia?

E te Silafia?

E te Silafia?

Na faapefea ona aauina atu tusi i taimi o le Tusi Paia?

I Peresia, sa faaaogā ai se auaunaga tau i meli a le Malo, e auina atu ai tusi e patino i le malo. O loo faamatala i le tusi o Eseta lenā auaunaga e faapea: “Ona tusia lea e [Moretekai se] tusi i le igoa o le Tupu o Asueru ma faamauina i le mama faamaufaailoga a le tupu, ma ua aauina atu nei tusi e ala i lima o avefeʻau o ē e tiʻetiʻe i solofanua, o solofanua televavave na faaaogā i le auaunaga a le tupu, o tama a solofanua fafine televavave.” (Eseta 8:10) O le auala foʻi lenā na faaaogā e le Emepaea o Roma i galuega faaofisa, ma mataupu uma tau i vaega ʻau.

O tusi a le tagata lava ia, e pei o tusi a le aposetolo o Paulo ma isi, sa lē mafai ona faaaogā ai le auaunaga a le Malo. Afai o se tagata mauʻoa, e na te auina atu se pologa ma le tusi. Ae o le toʻatele sa faaaogā so o se tagata, e aofia ai tauaiga, uō, fitafita, se tagata faipisinisi, po o se tasi foʻi e lē masani ai o loo agaʻi atu i le mea e fia ave i ai le tusi. O le mea e sili ona tāua, o le maufaatuatuaina lea o le tagata o loo alu ma le tusi, ma ia saʻo le feʻau e na te taʻu atu. Ua tatou iloa mai i le Tusi Paia, sa maufaatuatuaina e Paulo ona uso Kerisiano sa faimalaga, ina ia ave nisi o ana tusi.—Efeso 6:21, 22; Kolose 4:7.

Na faapefea ona faia fefaatauaʻiga i Isaraelu anamua?

Na faalagolago le tamaoaiga o Isaraelu i faatoʻaga, lafu manu, ma oloa e fefaatauaʻi. O loo taʻua i le Tusi Paia maketi sa i faitotoʻa o le aai, e pei o le “Faitotoʻa o Mamoe,” “le Faitotoʻa o Iʻa,” ma “le Faitotoʻa o le Taʻega Ipu Omea.” (Neemia 3:1, 3; Ieremia 19:2) O nei nofoaga na faaigoaina i mea o loo faatau atu ai. O loo taʻua foʻi i le Tusi Paia nisi o auala sa faaigoa i oloa na faatau atu, e pei o le “auala o le ʻaufaifalaoa.”—Ieremia 37:21.

Ae faapefea tau o mea? Na faapea mai se faitofā o le Tusi Paia: “A o faagasolo senituri, e tele ina lē iloa le tau saʻo o se oloa masani, ona o le fesuisuiaʻi o tau.” O lea, o loo faailoa mai i faamaumauga anamua faapea le Tusi Paia, sa sii tau o mea i le uluaʻi senituri, e pei o le faatauina o pologa. O se faataʻitaʻiga, na faatau atu Iosefa mo le 20 tupe siliva, atonu o ni sekeli, ma e foliga mai o le tau masani lea o se pologa i le senituri lona 18 T.L.M. (Kenese 37:28) I le tolu selau tausaga mulimuli ane, na sii ai i le 30 sekeli. (Esoto 21:32) I le senituri lona valu T.L.M., e 50 sekeli. (2 Tupu 15:20) Ae i le lua senituri mulimuli ane i le pulega a Peresia, na sii ai le tau o se pologa i le 90 sekeli pe sili atu foʻi. O le mea moni, o le siitia o tau o mea, o se faafitauli sa iai i le uluaʻi senituri e oo mai lava i aso nei.

[Ata i le itulau 22]

Se ave meli Peresia

[Ata i le itulau 22]

Ata o se maketi o fualaau ʻaina

[Ē Ana le Ata]

© DeA Picture Library / Art Resource, NY