Alu i mataupu o loo iai

Alu i le lisi o mataupu

Fesaga‘ia o Mala Faalenatura

Fesaga‘ia o Mala Faalenatura

 Fesagaʻia o Mala Faalenatura

E faapefea ona fesagaʻia e se tasi tulaga e tusa ai ma le faatuputeleina o mala faalenatura, ma mea ua matuā faaleagaina? Seʻi o tatou vāai i nisi o laasaga aogā e mafai ona tatou faia.

Ia ʻalofia mala. Ua faapea mai le Tusi Paia: “O lē ua iai le utaga mamao e na te iloa atu le mala ma lafi ai, a o lē ua leai se poto masani e alu atu pea o ia ma malaia ai i āuga leaga.” (Faataoto 22:3) O lenei fautuaga atamai e mafai ona aogā i taimi o mala. Pe a iai se lapataʻiga o se mauga mū o le a pā, se lologa o le a oo mai, po o se afā o loo faaloloʻi mai, o se gaoioiga atamai la ona ō ese mai ma ō atu i se nofoaga saogalemu. E sili atu ona tāua le ola nai lo o se fale po o isi meafaitino.

Atonu e mafai e nisi ona filifili e ʻalofia le nonofo i vaipanoa e aafiagofie i mala. Ua faapea mai se tasi o tagata atamai: “E tele mala e tutupu i nisi o nofoaga ona o le tulaga aafiagofie o na vaipanoa. E ui lava e lē tele ni vaipanoa faapena, ae o le a aafia i ni mala tetele i le lumanaʻi.” O se faataʻitaʻiga, e moni lenei faamatalaga pe a fua i nofoaga maualalalo ma nofoaga e aafiagofie i mafuiʻe. Pe afai e te ʻalofia le nofo i se nofoaga faapena, pe e siitia atu foʻi i se nofoaga e saogalemu, atonu la o le a e lē afāina tele i mala.

Fuafua lelei mea e fai. E tusa lava foʻi pe e te utagiaina lapataʻiga, ae e mafai lava ona e aafia i se mala e lē faatalitalia. O le a faigofie ona e fesagaʻia na tulaga pe afai e te fuafua lelei a o leʻi oo mai mala. E ōgatusa foʻi lenei manatu ma le fautuaga o loo i le Faataoto 22:3, lea na taʻua muamua. Po o iai sau ato o loo iai mea e manaʻomia mo faalavelave faafuaseʻi (emergency kit)? I le lomiga 1-2-3 of Disaster Education, o loo fautuaina ai mea e tatau ona iai i lenā ato, lea e aofia ai: Mea e manaʻomia mo le fesoasoani muamua, fagu vai, meataumafa e lē vave leaga, ma faamaumauga tāua. E atamai foʻi le toe talanoaina faatasi e le aiga o ituaiga o mala e ono oo mai, ma mea e mafai ona fai.

Ia tausia se mafutaga māfana ma le Atua. E mafai ona fesoasoani lenei mea i so o se tulaga lava. O loo faamatalaina le Atua i le Tusi Paia, o “le Tamā o le alofa mutimutivale, ma le Atua o faamāfanafanaga uma, o lē na te faamāfanafanaina i tatou i o tatou puapuaga uma.” O loo faapea mai se isi fuaiupu, o ia o le Atua “o lē na te faamāfanafanaina ē ua lotomafatia.”—2 Korinito 1:3, 4; 7:6.

Ioe, e silafia lelei e le Atua mea e tutupu i ē e faatuatua iā te ia. O ia o le Atua alofa ma e eseese auala e na te saunia mai ai faalaeiauga. (1 Ioane 4:8) Ia tatalo e lē mo ni vavega, ae mo le agaga paia malosi o le Atua lea e mafai ona fesoasoani iā i tatou i so o se tulaga. E mafai e le agaga paia ona faamanatu mai mau o le Tusi  Paia lea e faamāfanafanaina ai i latou o loo mafatia. O le mea moni, o le a iā i latou lagona sa iā Tavita, le tupu o Isaraelu anamua, o lē na faapea mai: “E ui lava ina ou savali i le vanu e matuā pogisa, ou te lē fefe lava i se mea leaga, auā o oe e ta te faatasi ma aʻu; o lau laau ma lou tootoo e faamāfanafanaina ai aʻu.” —Salamo 23:4.

E fesoasoani le tasi uso Kerisiano i le isi. I le uluaʻi senituri, na faailoa mai ai e le perofeta Kerisiano o Akapo “se oge tele o le a oo mai i le lalolagi uma; o le mea moni, na tupu lenā mea i le taimi o Kalaotio.” Na matuā aafia nisi o soo o Iesu i Iutaia i lenei oge. O le ā na faia e soo sa nonofo i isi vaipanoa, ina ua faalogo i mafatiaga o o latou uso Kerisiano? Ua faapea mai le Tusi Paia: “Ona filifili ai lea o le ʻausoo e aauina atu se fesoasoani i uso o loo nonofo i Iutaia, e tusa ma le mea ua mafai e le tagata.” (Galuega 11:28, 29) Sa latou tali mai ma le alofa e ala i le saunia o fesoasoani laveaʻi na manaʻomia.

O le auala lava lenā e tasi o loo tali atu ai auauna a le Atua i aso nei pe a oo mai mala mataʻutia. Ua lauiloa Molimau a Ieova i le fesoasoani i o latou uso talitonu. O se faataʻitaʻiga, ina ua aafia le atunuu o Chile i se mafuiʻe iā Fepuari 27, 2010, na vave lava ona tali atu Molimau a Ieova e fesoasoani i ē na aafia. Ua faapea mai Karla o lē na faaleagaina lona fale i le sunami: “O se matuā faamāfanafanaga ma o se faalaeiauga le vaaia i le aso na sosoo ai ua taunuu [uso Molimau a Ieova] mai vaipanoa eseese, ina ia fesoasoani iā i matou. E mautinoa, sa faamāfanafanaina i matou e Ieova e ala i le agalelei o nei uso na tauofo. Na ou lagona le alofagia ma le malupuipuia.” Sa mātauina e le tamā o le tinā o Karla e lē o se Molimau a Ieova, le fesoasoani na ofoina atu. Na faapea mai o ia: “E matuā ese lava mai i mea na ou vaaia i le tele o tausaga i laʻu lotu.” O mea na ia vaaia na uunaʻia ai o ia e talosaga atu i Molimau a Ieova, ina ia faia sana suʻesuʻega faale-Tusi Paia.

O le fesoasoani sili mo taimi o mafatiaga o le auaufaatasi lea ma ē e alolofa i le Atua. E ui lava i lea, ae pe e iai se taimi o le a lē toe iai ni mala i le lalolagi? Seʻi o tatou vāai po o le ā le faamatalaga a le Tusi Paia e tusa ai ma lenei tulaga.

[Ata i le itulau 6]

Po o iai sau ato o loo iai mea e manaʻomia mo faalavelave faafuaseʻi?

[Faamatalaga faaopoopo i le itulau 7]

Ia tatalo e lē mo ni vavega, ae mo le agaga paia malosi o le Atua lea e mafai ona fesoasoani iā i tatou i so o se tulaga

[Faamatalaga faaopoopo i le itulau 7]

E fesoasoani le tasi uso Kerisiano i le isi ina ia fesagaʻia aafiaga o mala

[Ata i le itulau 7]

“Na ou lagona le alofagia ma le malupuipuia”