Aʻoaʻoga a le Tusi Paia

E Faapefea Ona Tatou Filifilia ni Uō Lelei?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. Aiseā e ao ai ona filifili ma le faaeteete a tatou uō?

E mananaʻo le toʻatele ina ia talia i latou e isi. O lenei faanaunauga e masani ona uunaʻia ai i tatou ina ia faataʻitaʻi i isi. O lea la, e mafai ona iai aafiaga malolosi i o tatou uiga o loo atiaʻe i o tatou loto, ona o a tatou uō. O lea, o le auala e filifili ai a tatou uō e mafai ona aafia ai le ituaiga o tagata e iai i tatou.—Faitau le Faataoto 4:23; 13:20.

Na filifilia ma le atamai uō a Tavita, o se tusitala faagaeeina o le Tusi Paia. Sa faauō atu i ē na fesoasoani iā te ia ina ia tumau i lona faamaoni o se auauna a le Atua. (Salamo 26:4, 5, 11, 12) O se faaaʻoaʻoga, na fiafia Tavita i lana faauōga ma Ionatana ona sa faalaeiauina o ia e Ionatana ina ia faatuatua iā Ieova.—Faitau le 1 Samuelu 23:16-18.

2. E faapefea ona avea oe ma uō a le Atua?

E ui lava o Ieova o Lē e ona le malosi uma lava, ae e mafai lava ona avea i tatou ma ana uō. O se faaaʻoaʻoga, sa avea Aperaamo ma uō a le Atua. Na faatuatua ma usiusitaʻi Aperaamo iā Ieova, o lea na silasila ai Ieova iā te ia o sana uō. (Kenese 22:2, 9-12; Iakopo 2:21-23) Pe afai e tatou te faatuatua iā Ieova ma faia le mea e finagalo i ai o ia, ona mafai foʻi lea ona avea i tatou ma ana uō.—Faitau le Salamo 15:1, 2.

 3. E faapefea ona e maua aogā mai i ni uō lelei?

O uō moni e faamaoni ma fesoasoani iā te oe ina ia faia le mea saʻo. (Faataoto 17:17; 18:24) O se faaaʻoaʻoga, e ui lava e 30 tausaga e matua ai Ionatana iā Tavita, ma e foliga mai sa tatau ona sosoo atu e avea ma tupu o Isaraelu, ae sa ia lagolagoina ma le faamaoni Tavita, o lē na filifilia e le Atua e avea ma tupu. E lototetele foʻi uō moni e faasaʻo oe pe afai e mātauina o loo e faia se mea sesē. (Salamo 141:5) O uō e alolofa i le Atua e fesoasoani iā te oe ina ia atiaʻe masaniga lelei.—Faitau le 1 Korinito 15:33.

E mafai ona e feiloaʻi ma tagata e pei o oe i le faaalia o le naunau i le mea saʻo, i le Maota mo Sauniga a Molimau a Ieova. O le a e maua ai i inā tagata, o ē e faalaeiauina oe i au taumafaiga ina ia faafiafia le Atua.—Faitau le Eperu 10:24, 25.

Peitaʻi, e oo lava i uō e alolofa i le Atua, e latou te faia lava i nisi taimi mea e faatigā ai i tatou. Aua neʻi vave ona e ita ona o mea sesē ua latou faia. (Failauga 7:9, 20-22) Ia manatua, e leai se uō e lelei atoatoa, ma e tāua tele iā i tatou uō e alolofa i le Atua. Ua apoapoaʻi mai le Afioga a le Atua ina ia faaauau ona onosaʻi, pe a fai mai e se uso Kerisiano se mea e tatou te tigā ai.—Faitau le Kolose 3:13.

4. Ae faapefea pe afai e tetee mai a tatou “uō”?

E toʻatele tagata ua iloa le tetee mai o nisi o a latou uō sa iai, ina ua amata ona latou maua le fesoasoani e malamalama ai i le Afioga a le Atua. Masalo e lē o malamalama na uō i fautuaga aogā, po o le faamoemoe mautinoa ua e maua i le Tusi Paia. Atonu e mafai ona e fesoasoani iā i latou.—Faitau le Kolose 4:6.

I nisi tulaga, atonu e tauemu mai a tatou “uō” i le tala lelei o loo i le Afioga a le Atua. (2 Peteru 3:3, 4) E ono tauemu mai nisi i au taumafaiga ina ia faia le mea e saʻo. (1 Peteru 4:4) Pe afai e tupu lenā mea iā te oe, atonu la e tatau ona e filifili pe e fia avea oe ma a latou uō, po o le avea ma uō a le Atua. Afai e te filifili e avea ma uō a le Atua, ua e filifilia la se uō e sili ona lelei.—Faitau le Iakopo 4:4, 8.

Mo nisi faamatalaga, tagaʻi i le mataupu e 12 ma le 19 o lenei tusi, O ā Aʻoaʻoga Moni a le Tusi Paia? lomia e Molimau a Ieova.