Alu i mataupu o loo iai

Alu i le lisi o mataupu

Le Tala Lelei i Gagana e 500

Le Tala Lelei i Gagana e 500

Le Tala Lelei i Gagana e 500

I LE taimi o le vevesi o le taua i le va o tagata Rwanda lava latou, na sosola ese ai se vaega o tagata faaliliu mai i o latou aiga, ma tuua a latou mea uma. Ae peitaʻi, sa mafai ona latou aveina a latou komepiuta (laptop), lea na latou ō ma ave i nofoaga na latou sulufaʻi i ai. Aiseā? Ina ia faaauau pea ona latou faaliliuina lomiga faale-Tusi Paia i le gagana Kinyarwanda.

Sa galue se tamaʻitaʻi talavou i Saute i Sasaʻe o Asia i lana komepiuta seʻia oo i le leva o le pō, onosaia le vaivai, le vevela, ma le pē soo o le paoa lea e fai ma faalavelave i lana galuega faaliliu. O le ā lona sini? Ia ausia le taimi faatulagaina e lomia ai le lomiga.

O nei tagata faaliliu o se vaega o le ʻaufaaliliu e tusa ma le 2,300 o tagata tauofo, o loo galulue i le silia i le 190 vaipanoa i le lalolagi atoa. E eseese lo latou matutua mai i le 20 seʻia lata i le 90 tausaga, ma o loo latou galulue mamafa ina ia maua e tagata le feʻau o le Tusi Paia i gagana e 500.—Faaaliga 7:9.

Oo Atu i Tagata e Eseese Gagana

I tausaga talu ai nei, na faateleina ai le galuega faaliliu a Molimau a Ieova i se tulaga e leʻi faapea ona iai muamua. O se faataʻitaʻiga, i le 1985, na lomia ai Le Olomatamata i gagana e 23 i le taimi e tasi—o se galuega e mataʻina i lenā taimi. I aso nei, ua maua lomiga uma o Le Olomatamata i gagana e 176 i le taimi e tasi, ina ia mafai ona tutusa mataupu e suʻesuʻe e tagata faitau i le lalolagi atoa i le taimi e tasi.

I gagana pe tusa e 50, e pau le mekasini o loo lomia e lē aunoa, o Le Olomatamata. Aiseā? O kamupani lomitusi ua itiiti lo latou naunau e faia lomiga i gagana a le atunuu lava latou. Ae ua foaʻi atu ma le lotomalie e Molimau a Ieova i le lalolagi aoao ina ia faapaleni a latou alāmanuia, ina ia mafai ona maua le Afioga a le Atua ma lomiga faale-Tusi Paia, po o fea lava o loo manaʻomia ai.—2 Korinito 8:14.

E matuā faatāua e tagata le feʻau o le Tusi Paia i la latou lava gagana. O se faataʻitaʻiga, na saunia talu ai nei lomiga faale-Tusi Paia i le gagana Miskito, o se gagana e pe tusa ma le 200,000 tagata i Nicaragua e tautatala ai. Na talosagaina e se tasi o fafine le tusi, Laʻu Tusi o Tala o Le Tusi Paia * i le gagana Miskito, ma na iai se faifeʻau i le taimi na avatu ai lana tusi. I le vaai atu e manaia le tusi, na manaʻo ai le faifeʻau e ave ma ia le tusi. Sa musu le fafine, e ui lava foʻi na ofo atu i ai e le faifeʻau iā te ia le 50 pauna (20 kilokalama) o fatu kofe e fesuiaʻi ai ma le tusi!

I le sefulu tausaga ua mavae, na faaliliuina ai lomiga faale-Tusi Paia i le silia ma le sefululua gagana e tautatala ai tagata Mekisikō, e aofia ai Maya, Nahuatl, ma Tzotzil. I le itiiti ifo i le sefulu tausaga, na faateleina ai faapotopotoga e tautatala i le gagana a le atunuu ma faapotopotoga i gagana e faaaogā ai taga, i lenā atunuu mai le 72 i le silia i le 1,200. Atonu o loo totō e Molimau a Ieova le feʻau o le Tusi Paia i loto o tagata, ae e latou te tuu atu i le Atua e na te faatupu le fatu o le upu moni.—1 Korinito 3:5-7.

Se Faaliliuga Faaonapōnei o le Tusi Paia i Gagana e 80

I tausaga talu ai nei, na galulue malolosi ai Molimau a Ieova e saunia le Tusi Paia o le Lalolagi Fou, i le tusi atoa pe i ni vaega foʻi i gagana e 80. O le ā le tali atu i ai? Na faapea mai se tasi Molimau i Aferika i Saute e uiga i le Tusi Paia faa-Tswana: “Maʻeu se meafaigaluega ina a lelei. O le a faatuputeleina ai loʻu talisapaia o le Afioga a le Atua. O le gagana o loo faaaogā ai e faigofie ma manaia.” Na tusi se tagata e faitau i le gagana Tsonga mai i Mozambique e faapea: “E tusa pe e iai isi lomiga uma faale-Tusi Paia, ae a leai se Tusi Paia, ua pei lava e iai faititili ma uila ae leai se timu! Peitaʻi, na pei ua totō mai timuga ina ua tatalaina le Tusi Paia o le Lalolagi Fou i le gagana Tsonga.”

I se auala mataʻina, ua faataunuuina ai e i latou o loo faaliliuina ma faasalalauina le tala lelei o loo i le Tusi Paia, se valoaga anamua. O Iesu na fetalai e faapea: “E talaʻiina atu lenei tala lelei o le malo i le lalolagi atoa e fai ma molimau i atunuu uma, ona oo mai ai lea o le iʻuga.”—Mataio 24:14.

[Faaopoopoga i lalo]

^ pala. 8 Lomia e Molimau a Ieova.

[Siata i le itulau 25]

(Tagaʻi i le lomiga mo le ata atoa)

TUSI PAIA O LE LALOLAGI FOU

O loo maua i le tusi atoa pe i se vaega

1950 1*

1970 7*

1990 13*

2000 36*

2010 80*

ISI LOMIGA

1950 88*

1960 125*

1970 165*

1980 190*

1990 200*

2010 500*

AOFAʻIGA O GAGANA

[Ata i le itulau 24, 25]

E tusa ma le 2,300 tagata tauofo o loo faaliliuina lomiga faale-Tusi Paia i gagana e 500

BENIN

SLOVENIA

AITIOPE

PERETANIA