Alu i mataupu o loo iai

Alu i le lisi o mataupu

Le Faasaoina Mata‘ina o le Tusi Paia

Le Faasaoina Mata‘ina o le Tusi Paia

Le Faasaoina Mataʻina o le Tusi Paia

O LE Tusi Paia le tusi ua sili ona faasalalauina i le talafaasolopito, e tusa ma le 4.8 piliona kopi ua salalau atu. I le 2007 e sili atu i le 64,600,000 kopi na lomia. Pe a faatusatusa atu i ai, e sili atu Tusi Paia na faasalalauina i lo le tusi o tala fatu na sili ona alumia i lenā tausaga e na o le 12 miliona ona kopi na lomia i le Iunaite Setete.

I lona talafaasolopito mai anamua, ua sao mai le Tusi Paia mai mea e ono faatamaʻia ai. A o faagasolo mai tausaga, ua faasāina ma susunuina, ma na sauāina, ma fasiotia i latou na taumafai e faaliliu. Peitaʻi e lē o mea na sa sili ona lamatia ai le sao mai o le Tusi Paia, ae o le faasolo ina pala o mea na tusia ai. Aiseā ua faapea ai?

O le Tusi Paia o se tuufaatasiga o tusi laiti e 66, ma o kopi e sili ona leva, na tusia ma tuufaatasia e tagata Isaraelu i le sili atu ma le 3,000 tausaga ua mavae. O ē na tusia ma i latou na faia kopi, sa faaaogā mea palagofie e iai paʻu o laau ma paʻu o manu. E aunoa ma se kopi o na uluaʻi tusitusiga o maua. Ae faitau afe kopi o vaega laiti ma vaega tetelē o le Tusi Paia na eli aʻe i le eleele. O se vaega o ia tusi, o le tusi a le Evagelia a Ioane, e tusa ma le 20-30 tausaga e va aʻi ma le uluaʻi tusi na tusia e le aposetolo o Ioane.

Aiseā ua mataʻina ai le sao mai o ni kopi o le Tusi Paia? Ma po o saʻo atoatoa le feʻau o iai i le Tusi Paia i aso nei pe a fua i tusitusiga a tusitala anamua?

O le ā na Tupu i Isi Tusitusiga Anamua?

E maoaʻe le sao mai o le Tusi Paia pe a fua i le mea na tupu i tusitusiga a nuu na iai i le vaitaimi o Isaraelu. O se faataʻitaʻiga, sa tuaoi tagata Foinie ma Isaraelu i le uluaʻi meleniuma T.L.M. Na soo nuu o le Metitirani i tusitusiga e faaaogā ai le alafapeta a nei tagata faatauʻoa o le vasa. Na tele a latou tupe na maua mai fefaatauaʻiga o paʻu laau ma Aikupito ma Eleni. Peitaʻi, na taʻua e le mekasini National Geographic e faatatau i tagata Foinie: “Na faaleagaina le tele o ā latou tusitusiga na faia i paʻu laau, ma o mea ua tatou iloa e faatatau i tagata Foinie, e maua mai tala e lē faatuatuaina a o latou fili. Na tele tusitusiga mananaia a tagata Foinie, ae ua leva ona leai.”

Ae faapefea tusitusiga a Aikupito anamua? E lauiloa a latou ata na vaneina ma valiina i puipui o malumalu ma isi mea. Na lauiloa foʻi tagata Aikupito i le faia ma le faaaogāina o paʻu laau e tusitusi ai. Peitaʻi, ua faapea mai se tagata e poto faapitoa i mea faa-Aikupito, o K. A. Kitchen: “E tusa ma le 99 pasene o tusitusiga i paʻu laau mai le 3000 seʻia oo i le taimi o Eleni ma Roma ua faaleagaina uma.”

Ae faapefea faamaumauga a Roma na tusia i paʻu laau? O se faataʻitaʻiga, e tusa ai ma Faamaumauga a le Vaegaau a Roma na tusia i Paʻu Laau , e foliga mai e faatolu i le tausaga ona totogi fitafita Roma, ma sa faamaumau totogi i lisiti e fai i paʻu laau. A fua atu i ai, i le 300 tausaga mai le vaitaimi o Aokuso (27 T.L.M.–14 T.A.) e oo iā Diocletian (284-305 T.A), e 225,000,000 lisiti o totogi na faia. E fia ni lisiti na sao mai? E na o le lua e mafai ona faitau.

Aiseā ua itiiti ai faamaumauga anamua na tusia i paʻu laau o loo sao mai? Ona o mea e pei o paʻu o laau ma paʻu manu sa masani ona faaaogā e tusitusi ai, e vave ona pala pe a susū le tau. Ua fai mai le Anchor Bible Dictionary: “Ona o le tau, e foliga mai e pau tusitusiga na faia i paʻu laau na sao mai i lenā vaitaimi, [le uluaʻi meleniuma T.L.M.] o ia na maua i le toafa mātūtū, se ana po o se mea na malu ai.”

Ae Faapefea Tusi o le Tusi Paia?

E foliga mai na tusia tusi muamua o le Tusi Paia i mea e palagofie e pei o mea na faaaogā e tagata Foinie, Aikupito, ma Roma. Aiseā la ua sao mai ai tusi o le Tusi Paia ma avea ai ma tusi e sili ona faasalalauina i le lalolagi? Ua faamatala mai e le polofesa o James L. Kugel se isi māfuaaga. Ua fai mai o ia, “na matuā tele lava ni [kopi] na faia o uluaʻi tusitusiga, e oo lava i vaitaimi o le Tusi Paia.”

Po o saʻo atoatoa faaliliuga o le Tusi Paia i aso nei pe a faatusatusa i manusikulipi anamua? Ua faapea mai le polofesa o Julio Trebolle Barrera, o se sui o se vaega atamamai o loo gafa ma le iloiloina ma le faasalalauina o manusikulipi anamua ua taʻu o Tusi Taai o le Sami Mate: “E maoaʻe le saʻo o tusitusiga o le Tusi Paia Eperu, e lē faatusatusaina i tusitusiga Eleni ma le faa-Latina.” Ua fai mai le tagata e atamai i le Tusi Paia o F. F. Bruce: “Ua sili mamao atu faamaoniga ua iai o le Feagaiga Fou na i lo o faamaoniga o le tele o tusitusiga tāua mai anamua, ae e leai se isi e fesiligia le saʻo o na tusi.” Ua ia toe faapea mai: “A na faapea o se tusi faalelalolagi le Feagaiga Fou, e aunoa ma se masalosalo i le moni o mea o iai.” O le mea moni, o le Tusi Paia, o se tusi mataʻina. Po o sema sou taimi i aso taʻitasi e faitau ai?—1 Peteru 1:24, 25.

[Faamatalaga faaopoopo i le itulau 13]

“E matuā mataina le saʻo aʻiaʻi o le faaliliuina o le Tusi Paia Eperu po o le [Feagaiga Tuai] e aunoa ma ni faamatalaga e tutusa ai ma tusitusiga Eleni ma le gagana Latina anamua.”—Le Polofesa o Julio Trebolle Barrera

[Faamatalaga faaopoopo i le itulau 14]

E tusa ma le 6,000 kopi na tusilimaina o le Tusi Paia Eperu, po o le Feagaiga Tuai o loo iai, ma le 5,000 kopi o Tusitusiga Eleni po o le Feagaiga Fou

[Ē Ana le Ata]

Agavale: Todd Bolen/Bible Places.com; right: Shrine of the Book, Israel Museum, Jerusalem

[Ata i le itulau 13]

Mai i le tusi The Parallel Bible, The Holy Bible, 1885