Alu i mataupu o loo iai

Alu i le lisi o mataupu

Fo‘iaina o Feeseesea‘iga

Fo‘iaina o Feeseesea‘iga

 O Auala e Fiafia ai le Aiga

Foʻiaina o Feeseeseaʻiga

Na fai mai le tane: “Ina ua uma la maʻua faaipoipoga, na ma nonofo ma Sara * i le fale o oʻu mātua. I se tasi aso, na manaʻo ai le uō teine a loʻu uso e momoli o ia i laʻu taavale i lo latou aiga. Sa ou malie i ai ma na matou ō loa ma loʻu atalii. Ina ua ou toe foʻi mai i le fale ua matuā ita lava Sara. Sa ma tau upu i luma o loʻu aiga, ma ia faapea mai o aʻu ou te fia fai teine. Sa oso aʻe loʻu ita, ma ou faia ai loa ni faamatalaga e toe faatigā atu ai iā te ia.”

Na fai mai le avā: “E tigāina le maʻi o si aʻu tama, ma o loo faalētonu le tulaga tau tupe a le aiga. E tele māfuaaga na ou ita ai i le ō o Felano ma la ma tama e momoli le uō teine a lona uso. Ina ua ia toe foʻi mai i le fale, na ou taʻu atu loa iā te ia oʻu faalogona. Sa vevela la ma taugāupu, ma na ma faia ni faamatalaga lē lelei. Sa matuā lē lelei oʻu faalogona ina ua uma le vevesi.”

PE AFAI e misa se ulugalii, po o lona uiga la ua lē o toe alofa le tasi i le isi? E leai! Sa matuā alofa Felano ma Sara i le tasi i le isi, lea na taʻua i luga. Peitaʻi, e oo foʻi i faaipoipoga e matuā fiafia, e iai lava feeseeseaʻiga mai lea taimi i lea taimi.

Aiseā e māfua ai misa? Ma o le ā le mea e mafai ona e faia e ʻalofia ai le malepe o la oulua faaipoipoga? Ona o le faaipoipoga o se faatulagaga mai le Atua, ua talafeagai ai ona iloiloina fautuaga ua aumaia e lana Afioga, le Tusi Paia, mo lenei mataupu.—Kenese 2:21, 22; 2 Timoteo 3:16, 17.

Malamalama i le Faafitauli

O le tele o ulugalii faaipoipo e mananaʻo e feutagaʻi ma le isi i se auala alofa ma agalelei. O lea la, ua faapea mai le Tusi Paia “ua agasala tagata uma lava, ma ua lē ausia le mamalu o le Atua.” (Roma 3:23) O le māfuaaga lenā e faigatā ai ona pulea faalogona pe a tulaʻi mai se faafitauli. Afai e amata se finauga, e avea ma luʻi i nisi le teena o masaniga leaga, e pei o le ʻeʻē ma upu masoā. (Roma 7:21; Efeso 4:31) O ā nisi mea e ono tupu ai feeseeseaʻiga?

E masani ona eseese le auala e tautatala ai le tane ma le avā. Na faapea mai Mioko, “Ina ua faatoʻā ma faaipoipo, na ou iloa ai le telē o le eseesega o le auala e ma te talanoa ai i mataupu. Ou te fiafia e talatalanoa e lē na o le mea na tupu, ae faapea foʻi le māfuaaga ma le auala na māfua ai. E foliga mai e na o le pau le mea e manaʻo i ai laʻu tane, o le iʻuga o le mataupu.”

E lē fou le faafitauli a Mioko. I le tele o faaipoipoga, e manaʻo le isi e talanoa umi i se feeseeseaʻiga, a o le isi paaga e lē fiafia e talanoa umi ma taumafai e ʻalofia lenā mataupu. I nisi taimi, o le tele e taumafai ai se tasi o paaga e talatalanoa i lenā mataupu, o le tele foʻi na e taumafai ai le isi e ʻalofia. Po o e iloa o tupu lenā tulaga i lau faaipoipoga? Po o oe o se tasi e manaʻo e talatalanoa i le mataupu,  po o se tasi e taumafai e ʻalofia le talanoaga?

O se isi māfuaaga e ao ona malamalama i ai, o le ituaiga aiga lea e ono aafia ai le auala e feutagaʻi ai se ulugalii faaipoipo. Na faapea mai Siale o lē ua lima tausaga talu ona faaipoipo: “Ou te sau mai se aiga e filemu, ma e faigatā iā te aʻu le talanoa i oʻu faalogona. E matuā lē fiafia laʻu avā i lea mea, auā o lona aiga e fetalatalanoaʻi, ma e leai ma se faigatā iā te ia o le faailoa mai o ona faalogona.”

Aiseā e Galulue Faatasi ai e Foʻia Faafitauli?

Na taʻua e ni tagata suʻesuʻe e faapea o le auala sili ona maufaatuatuaina e iloa ai le taulau o se faaipoipoga, e lē o le tele ona faapea atu le isi i le isi ou te alofa iā te oe. E lē o le lelei foʻi o feusuaʻiga po o le tele o le tamaoaiga le mea e sili ona tāua. O lea la, o le auala sili e iloa ai po o taulau se faaipoipoga, o le auala e taulimaina ai e le tane ma le avā faafitauli e tulaʻi mai.

E lē gata i lea, na faapea mai Iesu, pe a faaipoipo se ulugalii e lē faatasia i laʻua e se tagata, a o le Atua. (Mataio 19:4-6) O lea la, o se faaipoipoga lelei e viia ai le Atua. Afai e lē faaalia e le tane le alofa ma le magafagafa i lana avā, e ono lē faafofogaina e Ieova le Atua ana tatalo. (1 Peteru 3:7) Pe a lē faaaloalo le avā i le tane, ua lē faaaloalo foʻi o ia iā Ieova, o lē na tofiaina le tane e avea ma ulu o le aiga.—1 Korinito 11:3.

Auala e Taulau Ai—ʻAlofia Masaniga o le Faia o Upu Faatigā

E tusa lava po o le ā le auala e te feutagaʻi ai, po o le ā le ituaiga o aiga na e ola mai ai, e iai lava masaniga o le faia o faamatalaga faatigā lea e tatau ona ʻalofia, pe a e faatatauina taʻiala o le Tusi Paia ma taulimaina lelei faafitauli. Fesili ifo iā te oe lava i fesili nei:

‘Po o oʻu taumafai e foʻia le faanaunauga o le tauimasui?’

O loo faapea mai se faataoto atamai: “A oomi le isu, ua sau ai le toto; a faaoso le ita ua tupu ai le misa.” (Faataoto 30:33) O le ā le uiga o lenā faataoto? Seʻi iloilo lenei faaaʻoaʻoga. E ono amata mai i se feeseeseaʻiga i le auala e faasoa ai le tupe a le aiga (“e ao ona ta pulea lelei le faatau o mea e ala i le aitalafu”) e mafai ona vave suia le tulaga o mea ma amata ona tautuuaʻi e le tasi i le isi (“e ese lou lē faamaoni”). O lea la, pe a ‘⁠oomi lou isu’ e lau paaga e ala i le faatigā atu iā te oe, e te ono lagona foʻi le toe fia ‘oomi’ atu. Peitaʻi, o le toe taui atu e atili ai ona ita ma faatuputeleina ai le feeseeseaʻi.

Na lapataʻi mai Iakopo: “Vaai foʻi! O le afi itiiti e mafai ona mū ai le togāvao telē! O le laulaufaiva o le afi lea.” (Iakopo 3:5, 6) Pe a lē mafai e paaga taʻitasi ona pulea o la laulaufaiva, e mafai e feeseeseaʻiga laiti ona oo i ni faafitauli matuiā. O faaipoipoga e tupu soo ai vevesi ma faafitauli, e lē maua ai se siʻomaga alofa.

Nai lo le tauimasui, pe mafai ona e faaaʻoaʻo iā Iesu, o lē sa upuleagaina ae ‘leʻi toe upuleaga atu’? (1 Peteru 2:23) O le auala sili e ʻalofia ai le faateteleina o se finauga, o lou amanaʻia lea o manatu o lau paaga ma faatoese atu ona o lau mea na fai ua māfua ai lenā finauga.

FAATAʻITAʻI LENEI MEA: E toe tupu loa se isi feeseeseaʻiga, fesili ifo iā te oe lava: ‘Pe e faigatā iā te aʻu le amanaʻia o faalogona o laʻu paaga? O le ā laʻu vaega na faia i lea faafitauli? Aiseā e faigatā ai ona ou faatoese atu?’

‘Pe ou te manatu faatauvaa i faalogona o laʻu paaga?’

O loo faatonuina i tatou e le Tusi Paia, “Ia autasi outou uma, ia tigā alofa le tasi i le isi.” (1 Peteru 3:8) Seʻi manatu i māfuaaga e lua e te ono lē taulau ai i le faatatauina o lenei fautuaga. Muamua, atonu e te lē o iloa mafaufauga, po o faalogona o lau paaga. O se faaaʻoaʻoga, afai o loo sili atu le popole o lau paaga i se mataupu nai lo oe, atonu e te faapea atu, “Ua e faatāuaina tele ou manatu.” Atonu o lou faanaunauga e te fia fesoasoani i  lau paaga e saʻo lana vaaiga. Peitaʻi, e toʻalaiti tagata e fiafia i na manatu. E tatau i le tane ma le avā ona iloa lelei lana paaga ma taumafai e malamalama iā te ia ma faamāfanafana atu.

E mafai ona manatu faatauvaa se tasi i faalogona o lana paaga ona o le faamaualuga. O se tagata faamaualuga e taumafai lava e faasili o ia e ala i le manatu faatauvaa i isi. E na te ono faia lenei mea e ala i le faaaogā o ni igoa taufaaleaga po o ni faatusatusaga lē talafeagai. Seʻi mātau le faataʻitaʻiga a le ʻau Faresaio ma le ʻautusiupu i le vaitaimi o Iesu. Pe a faaalia e se Faresaio po o se isi lava se manatu e ese mai i manatu o nei tagata faamaualuluga, na latou faaaogā igoa ma faamatalaga taufaaleaga. (Ioane 7:45-52) E leʻi faapena Iesu, sa tigā alofa o ia mo isi pe a faailoa atu o latou faalogona iā te ia.—Mataio 20:29-34; Mareko 5:25-34.

Ia mafaufau i le auala e te tali atu ai pe a faailoa atu popolega a lau paaga. Po o atagia atu i lou leo, ma ou foliga vaaia lou tigā alofa mo lau paaga? Pe e te vave faalēaogāina faalogona o lau paaga?

FAATAʻITAʻI LENEI MEA: A o faagasolo vaiaso, ia mātauina le auala e te talanoa ai i lau paaga. Pe a vave ona e faalēaogāina se mea na fai atu ai lau paaga, ia vave ona faatoese atu.

‘Pe e fai ma e manatu e faaituʻau manatu o laʻu paaga?’

“Ua mataʻu fua ea Iopu i le Atua? Ua e lē siʻosiʻomia ea i le aupā o ia, ma lona fale, atoa ma ana mea uma i itu uma?” (Iopu 1:9, 10) Ina ua faaaogā e Satani na faaupuga, na ia fesiligia ai uunaʻiga o le tamāloa faamaoni o Iopu.

Pe a lē faaeteete paaga faaipoipo, e la te ono lolo atu i na faiga. O se faaaʻoaʻoga, pe a faia e lau paaga se mea lelei mo oe, pe e te mafaufau po o iai se mea o loo ia manaʻo ai po o taumafai e natia se masei? Pe a fai e lau paaga se mea sesē, po o le a e vaai i lenā mea o se faamaoniga o le faalētonu ma e manatu faapito ma faalēano o ia? Po o le a e toe manatuaina mea sesē mai taimi ua teʻa ma faaopoopo i ai i na masei?

FAATAʻITAʻI LENEI MEA: Ia fai se lisi o mea lelei na fai e lau paaga mo oe, ma uunaʻiga lelei lea atonu na fai ai na gaoioiga.

Na tusi le aposetolo o Paulo e faatatau i le alofa: “E lē faitauina mea leaga e fai atu iā te ia” e le alofa. (1 Korinito 13:4, 5) E ui tatou te alofa atu, tatou te iloa e fai mea sesē tagata uma. Ae i le taimi e tasi, e lē toe mātauina masei ona o le alofa. Na toe faapea mai Paulo “e talitonu i mea uma” le alofa. (1 Korinito 13:7) E lē faavalea gofie lenei alofa, ae e mafai ona fetalitonuaʻi ai. E lē masalosalo foʻi. O le alofa lea e faalaeiauina e le Tusi Paia, e nofosauni e faamagalo ma tuu avanoa i tagata e faamalamalama mai la latou itu. (Salamo 86:5; Efeso 4:32) Pe a fefaaaliaʻi e paaga taʻitasi lea alofa, o le a la maua se faaipoipoga fiafia.

FESILI IFO IĀ TE OE LAVA . . .

▪ O ā mea sesē na fai e le ulugalii o loo taʻua i le amataga?

▪ E faapefea ona ou ʻalofia le faia o na mea sesē i laʻu faaipoipoga?

▪ O lē fea manatu o loo taʻua i lenei mataupu e manaʻomia ona ou faaleleia?

[Faaopoopoga i lalo]

^ pala. 3 Ua suia igoa.